إبعد شوية يمكن نفوق

محمد أبو قمر

الحوار المتمدن-العدد: 6577 - 2020 / 5 / 29 - 09:56
المحور: العلمانية، الدين السياسي ونقد الفكر الديني
    

فتح المساجد في ظروف الزيادة المتنامية لحالات الإصابة بكورونا سوف يؤدي إلي منح كورونا فرصة إلتهام أكباد المصريين ، وربما ، بل من المؤكد أن سلوك الناس في المساجد سوف يؤدي إلي استفحال المصيبة ، ومن ثم زيادة الضغط علي المستشفيات ووضع الأطباء المحاهدين في وضع لا يحسدون عليه.
وإذا حدث ذلك فإن المساجد ستصبح مفرخة للموت ، وتصبح الصلاة وسيلة للخراب ، ويصبح الإيمان المزعوم الطريق الأمثل للعذاب والألم.
قرار إعادة فتح المساجد في الظرف المؤلم ده من وجهة نظري يعود إلي أن رجال الدين وحشهم رؤية ضحاياهم ، وحشهم الاستمتاع بخضوعهم لخرافاتهم ، خايفين أحسن الناس تنساهم وتنسي كلامهم إللي لا بيودي ولا بيجيب ، خايفين أحسن بمرور الوقت يستقر في أذهان الناس إن رجال الدين ملهمش لازمة في حياتهم ، وهم في الحقيقة لم يضيفوا شيئا لحياة الناس بل خصموا منهم العقل وسلبوهم إرادة الفعل وعطلوا قدرتهم علي الإبداع . تقدر تقولي إيه هي الإضافة إللي بيضيفها رجل الدين لحياة الناس عموما ، مفيش غير إنه متسلطن علي أفئدة الناس باعتباره عالم وهو لا عالم ولا نيله ، هو في عالم في الدنيا كل معارفه هي أقوال الفقهاء السابقين ؟؟!! . هايجري إيه لو الناس أدت صلواتها في بيوتها ، إيه إللي هاينقص لو حصل ده ؟ ، وإيه إللي هايزيد لو فتحنا المساجد غير زيادة فرص انتقال العدوي؟؟؟؟؟؟؟؟؟!!.
الدين مش هو الجامع ولا الكنيسة ، الدين هو ما وقر في القلب وصدقه العمل ، والإيمان هو حسن التعامل بين الناس وبعضها ، والدين مش هو الشيخ ولا القسيس ، الحلال بيّن والحرام بيّن ، ورجل الدين بيقعد يقولك دا حرام ودا مكروه ومع ذلك الحرام بيكبر والمكروه بيزيد ، وبيني وبينك كلام المشايخ عن كقار مكة وعن محاولاتهم قتل الرسول وعن تعذيبهم للمؤمنين وعن الهجرة بينفي الزمن ويعيش الناس في الماضي وياخد عقلهم ووجدانهم وأرواحهم لزمن يعميهم عن حاضرهم ويغبش رؤيتهم لمستقبلهم .
رجل الدين ما يعرفش حاجه في التاريخ ، ولا في علم النفس ، وعمره ما قرأ كلمه في علم الاجتماع ، ما يعرفش غير بخاري ومسلم وابن عباس وابن حنبل وابن تيمية وغيرهم من المفسرين ونقلة الأحاديث ، وياريته بيجتهد زي ما الناس اجتهدت وفق زمانها وظروفها ، هو بس حافظ إللي قالوه وإللي كتبوه ويقعد يردده وهو مش فاهم إن كلامه ده بيضرب الزمن في مقتل وينفي حركة التاريخ ومشوار الحضارة الإنسانية وينكر قوانين الحركة والتغير والتطور.
هايفتحوا المساجد ، وقال إيه هايفرشوا المساجد بسجاجيد جديدة متعلم عليها مكان وقوف المصلين مراعاة للتعاليم الصحية الخاصة بالتباعد ، طيب من قالك يا أبو مخ أصغر من مخ نملة إن الناس هاتلتزم بالكلام ده ؟! ، ما إنت في دروسك وفي خطبك حطيت في أذهان الناس إن لو مكتوبلك إنك تاخد كورونا هاتاخدها حتي لو حطيت نفسك في قمقم ، إنت إللي نشرت بين الناس ثقافة الاستهتار بكلامك عن إن كل شيء مكتوب سلفا ، وأنا بصراحه عايز أعرف مادام كل شيء مكتوب إحنا هانتحاسب ليه ، طبعا هاتقولي إن رغم إن كل شيء مكتوب فالانسان له عقل وبإمكانه أن يختار بين الصح والخطأ ، طيب هو فين العقل ده إللي الناس يمكن أن تختار به بعد ما حضرة جنابك صادرته بخرافاتك وحكاويك إللي إنت جايبها من مجاهل الصحراء ومن كهوف الزمن البعيد؟؟.
أنا بحسبك مؤمن بصحيح وفي دماغك عقل وكنت فاكر إن قرارك هايكون تحويل المساجد إلي مستشفيات لإنقاذ المصابين بالفيروس ، بحسبك هاتجهز الجوامع بأجهزة مسح وأدوية ومعدات وأطباء بدل السجاجيد إللي متعلمه ومتخططه إللي مش هاتمنع أبدا احتمال حدوث مصيبة إحنا مش أدها ولا إمكانية مستشفياتنا أدها ولا عدد أطبائنا يمكن أن يحتملوها.
إفتح يا اخويا الجوامع لاستقبال المصلين وتعالي نشاهد جمال طلعتك وانت بتحكيلنا عن أبو جهل وعن الفتوحات وعن أبو هريرة ، تعالي ياسيدي نعيش مع بعض أيام حفر الخندق ، ومعركة صفين ، ومقتل عمر ومقتل عثمان واغتصاب معاوية للخلافة وتوريث ابنه يزيد ، تعالي نتباهي مع بعض بالتراث إللي خلا العرب يحطوا قدم في الصين والقدم الأخري في الأندلس ، تعالي نبكي سوا علي سقوط غرناطة ، تعالي كلمنا عن صحيح بخاري وقول لنا إزاي هو أصح كتاب بعد القرآن ، تعالي كلمنا عن طارق ابن زياد وعقبة بن نافع وسعد ابن أبي وقاص ، تعالي قول وعيد وزيد والحكاية إللي تقولها النهارده تعالي فكرنا بها بكره ، مهو إنت معندكش غير كده ، تعالي قولنا كل يوم إزاي نتوضأ وازاي ندخل الحمام ، افتح ياعم الجوامع وافرش السجاد الجديد وتعالي نغرق سوا في الماضي وننسي حاضرنا وننسي إن إحنا عايشين في مصيبة اسمها كورونا.
هي الجوامع هاتطير ، استنا شوية لما المصيبة دي تنزاح ، هو هاتبقي إنت والكورونا ؟؟ .
الناس مش هاتموت لو أدت الصلاة في بيوتها أسبوعين كمان ، وإنت مش هاتفطس لو بعدت عننا شويه ، إبعد ياعم شوية خلينا نعرف إحنا فين وإحنا ليه وإحنا كده إزاي.

#محمد_أبو_قمر (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل