رسالة مزّقها ساعي البريد

أمال رقايق

الحوار المتمدن-العدد: 6552 - 2020 / 5 / 2 - 14:56
المحور: الادب والفن
    

______________________


مرسال إلى القمر.

عزيزي القمر: ما دّير في بالك والو قصدي ما ديرش في بالك بلي ما نقدرش نحبك إنسانا لإنسان خاطر بالعكس، كي يفرغ الواحد من كل شي يبقى فالخاطر غير المعنى..

الدنيا مقوّدة وشي غاشي اكثر منها مقوّد وفي الصدارة هذي الي قاعدة تكتب لك.. انا.. أمال..
بعيدا عن رمضان والدورة الدموية انتاعك.. بعيدا عن كورونا والدورة الشهرية انتاعي، نفتح
جبهتي بالموس الحافي ونقرا.. كل شي هنا هنا زكارة فالعدميين أولهم انا..

والله والله ما نخسّر النية ايلا كانت صح صافية واحنا مراض نحسوا بالعكس.. احنا قصدي، شي غاشي مقوّد ويسجد جهة المرّيخ ويلبس النهار بالمقلوب. يقولو فالأسطورة: قشّ جديد!

حبيبي القمر، الي ما يلقاكش لداخل فيه ما عندو وين يلقاك.. القصيدة نصّ مراية ونصها يبدا كي تطفا الباطري..
راك مليح؟ هداك هو الصح.. راني فرحانة enfin بنادم مشي منامة!

خويا القمر، كاين فالدنيا شي حوايج ما يهموناش زعما بصح هايلين، شي ناس، قلال فالحق، ماشي ما يكتبوش، ما يقراوش أصلا، بصح نموت بالحشمة كي نلقاهم ضاويين نزيد نتأكد قدّاش راني مظلّمة، قد السّكات الي فالبير، وراسك العزيز، قدّ السّكات الي فالبير!

كي نعرّي جرح مخلوق، زعما راني فايتة ابليس فالفهامه؟! علاش رانا نضّاربو؟ نوح تّنسى فالمتحف، البابور ديالو كلاه السُّوس واحنا مازال نضّاربو.. قابيل وهابيل من بكري مكانش الي يحكم فيهم! شفت الغراب الي حط عليك؟ كان على كتفي، حسب روحو فالبالكو انتاع جارتو البومه.. مشي على كتفها! قولّو يعطيك الطّالع.. أنا في بلاصتك عييت.. من نهار خلق نوح وأنت تضرب في خط الرمل.. وزدت عْديت مرايتي!

حرت حرت من لداخل ومن برّة يا القمر.. ما فهمتش، تقول شي بالهيروغليفية راني نتنفّس، تقول شي نشقّ روحي كما نشقّو رمّانه ونوزّع روحي حبّة حبّة على شحال من مليار قلتلي؟ وزيد ليهم الحشرات، الحشيش، الكلام والنّوّار والرّهابن وبوجغلال..

يا درى يا درى يا سيدي القمر، واش رايك واش تقول؟ نتخاطر معاك على تحويسة في قلبك ايلا ما رماونيش بحجر!

احنا الي كيفنا قلال فالزهر وكي نتفرعنو بغلطة ولا.. تسمع بينا الحضارات البائدة وآلهة العهد الرقمي ونتعاقبوا برعاية الأمم المتحدة.. مفضوحين هكذا من عند ربي، ومن عند ربي مايلين.

يرحم باباك ما تزيدش تضحك هديك الضحكة المسلوخة كي نشوف معاك.. وما تزيدش دّير مكياج الزومبيات.. راني نقلق وتتحتم عليا نتيه بعينيا فالديار والزبالة والقطوطه المدوّدين دايرين عليها..

من عندك يا القمر لتحت رجليا.. الطريق طويلة وقلب الواحد قريب يحبس!

#أمال_رقايق (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات