جاسمية تشارك في مظاهرات البصرة بدون ابو جاسم

مؤيد عبد الستار

الحوار المتمدن-العدد: 5994 - 2018 / 9 / 14 - 03:22
المحور: كتابات ساخرة
    

مشهد تمثيلي ساخر 14

* المايسوكه مرضعه ، سوك العصا ما ينفعه .
- يبين جاسمية صايرة حكيمة !! جا ليش شاده راسج وركض للمظاهرات من الصبح ، صايرتلي عنتر بن شداد .
* كل هذا الفساد اللي صار من جوه راسكم ، و الناس تلوبح على شربة ماي ، وماتريدني اركض للمظاهرات !
- ليش شصار ، قابل اهل البصرة لازم يشربون ماي اربعه وعشرين ساعة ، شو ازمة المياه بكل العالم ، حتى بمصر ام الدنيا ازمة ماي ، خو مو بس بالبصرة ...قابل احنا احسن من ام كلثوم لو من السيسي .
* بمصر بالسودان .. آنه ياهو مالتي .. آنه اشوف بعيني الناس بالبصرة كاتلها العطش ، والتسمم طايح بيهم كبار وصغار ، المستشفيات مليانه .. شنو ماكو ذمه .. ماكو ضمير ... شلون نسكت ..!!
- جا ما طول هيجي .. ما طلعتي مظاهرات يومن بوش سمم العالم بالنابالم وضرب البصرة باليورانيوم ! هم كولي ما ادري ..!
* بوش طلابته جانت وي صديم .. اثنينهم بلوه بيهم ابتلينه .. مخلص السالفة .. لا تلف وتدور .. انت ويه اهل البصرة العطاشى لو ويه الحرامية ؟
- والله يا جاسمية آنه ما داشوف الخيط الاسود من الخيط الابيض ، وروح يدج السالفة لاكفه طين ، ما كو جاره .
* لا تسوي نفسك غشيم .. الخيط الابيض مبين .. هذوله اهلنه .. ما عدهم لا ماي ولا كهرباء .. وين يرحون .. مو حقهم يهجون بالشوارع يطالبون بحقهم .
- يعني هسه بس همه ضايع حقهم يا جاسمية .. احنا شمحصلين .. مو هم ضايع حقنا .. فوكاها نروح نتظاهر وي المكاريد ونخسر الاول والتالي !
* ابو جويسم .. احنه شعدنه حتى نخسر الاول والتالي .. آنه حتى بيت سكن ما محصله .. يوميه ابو الملك جاي يريد ايجار الغرفة ويزيّـد الايجار بكيفه .. عليمن خايفين !
* اي شجاج ما تصبرين .. مو مواعدنه مجلوب السلف ببيت ابو اربع دنك .. على كيفج ويانه .. خلي يصير بالحكومة وتدللي .
- شوف ابو جويسم .. آنه لا اريد من الحكومة صدقه ولا من مجلوب السلف رشوة .. آنه اطالب بحقي بيدي .. وباجر من الصبح طالعه للمظاهرة .. تريد تجي اهلا وسهلا .. ما تجي .. الله وياك . كلمن على خـرّ اذنه .

#مؤيد_عبد_الستار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل