جاسمية تغضب على ربع ابو جاسم

مؤيد عبد الستار

الحوار المتمدن-العدد: 5956 - 2018 / 8 / 7 - 14:34
المحور: كتابات ساخرة
    

مشهد تمثيلي الحلقة 12
* اللهم لا تجعلنا من المغضوب عليهم ولا الضالين
- يبين زادت صلاتك ركعتين اليوم .. شنهي القصة.... مسويلك مكسورة جديدة ؟
* لا والله جاسمية .. بس تذكرت الاخرة .. اللهم ارزقنا حسن العاقبة
- يا حسن العاقبة ابو جويسم .. انت وربعك خليتو عاقبة وراكم .. اشو ايدكم بالدهن وسنونكم ناشبه بركَاب الوادم مثل المنشار .. صاعد نازل ماكل .
* يعني هاي بدال ما تدعيلي بالخير والبركة حتى الله يرزقني .. صرتيلي سجينة خاصرة
- انا سجينة خاصرة لو انت بالي الوادم بلوه بصويحبك مجلوب السلف ، كل يوم مسويله دكَه وفضيحة ما تنحجي .
* يافضيحة جاسمية ...!! انتي ليش تصدكين بحجي الناس المايخافون الله ، مجلوب السلف يوزع بها الخيرات وما يلحّـك ، البارحة جاب عشـر بنكات هديه لاهل السلف .
- عشر بنكات ! هي وينها الكهرباء حتى يجيب بنكات ياحظي ، اشو حتى المولدات ما يشتغلن ، يكولون ما عدهم نفط . هاي عود احنا اهل النفط .. الله يجرم .
* جاسمية .. قابل الرجال يجيب كهرباء بشليلة للسلف .. هاي شغلة حكومة .. هو العليه سواه .. بعد بيش تطلبيه .
- شلون ما اطلبه .. مو كبل شهرين اشتريتوا صناديك الانتخابات وبكَـتوا بطاقتي الانتخابية من صندوك العرس .. حتى فطومة العمية تكول بايكَـين بطاقتها ومزورين اسمها
* هاي سالفة الانتخابات صارت قوانه مشخوطة ... حتى الحكومة جازت منها .. وانت بعدج مجلبة بيها .. بس عاد يا جاسمية .. فكي ياخة .
- افك ياخه ، ها .. حتى تبوكون على كيفكم .. والله اوكَـفـلكم بالمرصاد
* هاي جديدة جاسمية بالمرصاد .. منين لا كطتها .. بس لا تقرين كتب مشبوهة من ورايه
- ليش كتب مشبوهة ... قابل كتبكم الصفـرة أحسن من كتبي
* اي بينت السالفة .. شنو يابه كتبنا صفرة وكتبج حمره ... ها
- حمرة ... زركة ... المهم كتب بيها علم .. مو مثل كتبكم مليانه خرافات وسوالف خرط
* انا اخو المتصرف .. النوب كتبنا كلها خرافات وسوالف خرط ... لا.. لالا .. هذا الحجي ماينلبس عليه عكال ، اني لازم اشوفلي جاره .
- والله آني اللي لازم اشوف لي جاره مو انته .. آنه اللي بطاقتي انباكت وصندوك العرس مالي صار خرده ينباع بسوك مريدي .
* اهو ... هم رجعنه على حجي عام الاول .. بويه الناس اتبرعت بصناديك الذهب لمجلوب السلف وانتي بالج يم صندوك العرس مال زمان العصملي .
- آنه مالي شغل .. لازم نطلع مظاهرة غضب على مجلوب السلف وربعه ، كبل ما يبوكون كل شي من عدنه ، لان ما بقه عدنه شي ، واحنا ما نقبل بالذلة .
* ليش ما بقه عدنه شي ، مو مواعدنه مجلوب السلف على بيت ابو اربع دنك ، ده اصبري جم يوم وخلي يطلع اسمه بمجلس النواب وشوفي شلون يجي الخير .
- والله الخير اللي يجي من وره مجلوب السلف لا اريده و لا اريد خيره ، عوذه ولوذه منه ومن اسمه . انه ما اريد فلوس حرام .
* اي هي بت الاوادم .. هي جايتنه فلوس حلال واحنه ما رايديها ... هذا المقسوم النا ، ماكو غير فلوس مجلوب السلف ، قابل نذب الخير ورانا ، احنا منو عدنه بالحكومة غير ها المجلوب .
- شوف ابو جويسم .. انه كلامي واحد .. ما اريد شي اسمه مال حرام .. ولمعلومك احنا باجر طالعين مظاهرة غضب و ها ها ها :
فكـوله الجنطة / / وهز ذيله ... فكوله الجنطة // وهز ذيلة

رابط الحلقة السابقة
http://www.ahewar.org/debat/show.art.asp?aid=607185

#مؤيد_عبد_الستار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل