جاسمية تشارك في المظاهرات ضد ربع ابو جاسم

مؤيد عبد الستار

الحوار المتمدن-العدد: 5943 - 2018 / 7 / 24 - 09:42
المحور: كتابات ساخرة
    

مشهد تمثيلي

* ها جاسمية .. هاي زين .. حسج مطبك و زردومج يابس
- جا تريدني مثلك .. اشوف الاعوج واسكت .. مو تكولون الساجت عن الحك شيطان اخرس
* وشلون شفتي الحك وياه المظاهرات .. شو كلهم حفاي ومهتلفين .. هذوله يردون يصيرون حكومة!!
- مو احسن من ربعك الفرهدو مال الله وعباده .. شفت شلون شردو .. كَـبل للطيارات .. روحه بلا رده ،
دفعت مردي .
* لا شردوا ولا شي .. هي مناسبتين .. اولا ... حارة وراحوا يصيفون بلبنان وتركيا ويمكن لاربيل و مناك للندن .
- وشنهي المناسبة الاخرى بويه .. ؟؟
* شنهو ما تدرين .. تسوين روحج غشيمة !
- لا .. بالله ، ده كلي بروح يـدّك!
* جاسمية .. الحج .. نسيتي بيت الله .. الله واكبر .
- ابو جويسم .. ربعك مال حج .. اشو ايديهم بالحرام للعكس .. ما يعرفون غير البوك والنهب !!
* لا تديرين بال .. كربت الساعة .. الانتخابات كملت .. دستروها على اربعه وعشرين حباية ، وبراس الدستة مجلوب السلف .. كلشي راح يصير على المرام .. وانا ما ناسي سوار الذهب اللي مواعدج بيه .
- انت ده حصل النعال التسكام وبعدين احجي على سوار الذهب ، هو صويحبك يطلع منه نعال حتى تـجـيب سوار ذهب .
* لا وداعتج جاسمية .. بس تكمل حسبة الانتخابات نفرهد خزينة المحافظة ترفهد .. الا ابنيلج بيت يدك نوبه .
- شوف ابو جويسم .. انا ما اريد لا سوار ولا بيت .. انه ناذره نذر بس ينزاحون ربعك اذبح ديج واوزعه على الفقره .
* ايباه .. ديج توزعه على الفقره ... شنو ذابحه عجل .. الديج لكمتين ما يصير .. شتوزعين منه على الفقره ..خلي نسويه مزه انا ومجلوب السلف .. احسن ما ياكلوه ربعج الحفاي .
- حفاي مو حفاي .. اقلها ما يبوكون .. هالطالعين مظاهرات حتى ينظفون الولاية من الحرامية ، من مجلوب السلف وربع مجلوب .
* انتي تظلين بهالعكل .. ماكو وره المظاهرات غير شلعان الكلب .. باجر عكبه تقوى الحكومة ولزموكم مثل الجريدية .
- ماطول احنه على حق ، لازم نجيب أجلهم ... احنه منصورين :
هاها .. منصورين ... اسمع يالبايك .. منصورين.. اسمع يالبايك .

#مؤيد_عبد_الستار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل