سمة ..ونجوم و..علامات

فاروق سلوم

الحوار المتمدن-العدد: 1481 - 2006 / 3 / 6 - 11:15
المحور: مواضيع وابحاث سياسية
    

الى عزيز السماوي ..في الرحيل الأخير
الى مظفر ..في لقائنا الأخير

شايل سمه هموم وخطوتي رحّال..وجف جوري ..وتدمي الجف ..و ما توصف الجلمات هذي الحال.. حزن ومجتف ومرصوص .. تكول النجمة وتنعثل شعرها على جتاف الخوص :
موكواك اشوفك ..صفرتك.. صينية نحاس ..والغيمة تذب دمعة غوه..ومايمتلي هالكاس
جن الليلة ضحكتنه زعل .. جن السوالف دوه ..التنكال منهه وأبد .. ماتنكال....ذهب يلصف حجينة ووحشة السكته وصف ..للصورة من خوف الوكت لمّن يجي الوسواس ..وكل شفة تعب لمن يدور الراس.. وكل نكطة كرم للكاع .. من رجفة الأيد أو ّوغف ماينداس.. شكد جان الهوه .. .. فوك الجراجف..لو على القمصان....رسم مثل الوهم ويزين ا لحيطان..كل موعد وجه ..
يحجي ..وجه يبجي ..ووجه تعبان
وكل تأخير تاخذنا القطارات.. وحزن مضموم بالغصة..وعذر ميبات ..سفن راحت ..ومواني الغركت
الأسماء بيهه و الدفاتر خالية . .. وماتنقري الجلمات..التعب وحدة يثكل الروح.. ..الأمل بعده مثل قفل المراد ..يلوح.. و(مثل رصاص بالرّية* ) تصب هذي الليالي وأحنة نترجة أ تّصافة الوادم ..وتصفن وكت.. وتتلاكة هم لوجوه....
وحزنّة مشتت ومنثور ..حزنّه مثل ..حمل البوه
ياصفنة صبح فوك المخدّة ..الروح.. تحجي والعيون الشابحة ..الساعة تدك و.تدور.. ولفكار السارحة.. ويكفي أمدد و مطروح
الف موعد ..والف مامش سبب و تروح
جم مرة جزت طلقة على همومك ..وتراب الوكت ماغير هدومك..وكتابك بعد لاما وصل يومك
يمعود ددوس..وشّله ..الخنياب سومه ..وروجه لايسومك..بشر مثل الدفاتر..تنقري من غلافهه
..أظافر صفره ..ولعيون آممّولحة ..وحمره..أوساس الرمل ينداس بالغبرة .. اذا ماروجة الخنياب عدّت سهلت العبرة .. ياخلطة الشهوة ويه الدعا.. بموسم زيارة حزن وتوهدنت روحي..وبعد ما كمّلت بالحزن عدّتهه..يانار الحجي..شماعد بعد ماعدّت جروحي
وياخذني غفل شباج الزيارة لبو الحسنين ..ودخيلك ..ترة ..لونين ..بعده ونين
وجنة ..ثنين ....
وما ادري ..نعلتللّه ..على الشيطان ..ثالثنة..وسوالفنة.. بعد لساع بألأيدين
من حزن الوكت ..غبنة.. مثل الشمع لمّة يموع....وحّدنة أثنين محتركين
ومن ليل ..البقة ليل السوالف والبجة ..وشلال من صفنة محبة وبوسة نعسانة ..وعذر ..للفجر لمن بالغلط جانة..و بخور الهنود ..آ مشلوش ويمشي علىالحيطان
جن الروح مو.. انسان
وجن صفنتنه تمثال وعبر فوكه المطر ..غركان بهمومة..بوسات الرماد ..ويه الفجر..نتعلّة بيهه من الخطة..وأننّشف هدومة..
خطايانه ويمكثرههة خطايانه ..تراهه مزار ..حركة وبوسة من غفلة خصر يتوجّة .. .بأردانه!!
مثل فخّار منقوشة على هدومي
جلماتك .. يجفّيّة بجي ..مليانة من يومي
أحبك ياوطن لا ..لاأحب موتك..خلاص وكافي ياحجي العقل ماوّصلت ظلمة وعدنه
وما عبر نعسان ..ذاك هلالنه الجذّاب ..فوك بيوت اهلنه ..
معلك وتعبان
جنّ أهلالنه ابنادم ..وجنه بغيمة الدنية عمر غركان
العشب يعرف خطاوينة ..عشب ظلمة ليالينه.. يوّجد ريحة انفاسك على ثيابة ..وحلفة جالي حنطة بموسم ترابة ..مثل شوك الدروب الضاع من ورد السوالف .. يشوف وجوهنة ..لو جنّة مو عارف لجن لوعود ذابت لوعة الهجرة وسفر لسنين..أشتهتنة الغربة ببلاد الغرب لو بلبلاد ..وجنج ابد ماتدرين.. يسنين السكوت المّر..عبر فوكج سهيل ..ومر .. غرز بالروح دنبوس البجة بالليل..
جن موليل . . جن مو ليل ..رصاص الموت يضوي دم
وبعد لاخوّة لانخوة..وماي العطش من تطلب يجيك الساعة شربة سم
شعد بعدك ..شجابين الحزن والهم
وحزنّة امضمّر ملثم
وجن كتال أهلنه.... ياحرامي البيت
فز من كبرة ..لوفزّة الحي ..الميت
أهيّس كل صبح بعده الوكت يوعدنه..باليمكن ..وكيت وكيت
لكن من اشوف اوجوه يكرطهه الصفار ..ومو وكت خريّط.. اشوف الباقي من ارواحنة مربوط بس بخيط..
بس بخيط !!

بغداد..

* من قصيدة لعزيز السماوي:
كل ليلج ينكط موت
يصب رصاص بالريةّ
نحرتي بكلبي ياصلفة
حمامة شوك عذريّة

#فاروق_سلوم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل