اشكالية مقتدى الصدر ...حاج زعيبل يشكك

عودة وهيب

الحوار المتمدن-العدد: 5106 - 2016 / 3 / 17 - 09:24
المحور: كتابات ساخرة
    

اشكالية مقتدى الصدر ..حاج زعيبل يشكك


لم تشهد التظاهرات أية خلافات تذكر طيلة فترة التظاهر الطويلة فالجميع متفقون على شعارات مطلبية تمس حياة كل الناس . لكن دخول تيار الصدر على خط التظاهرات احدث ارباكا كبيرا في معسكر حاج زعيبل حيث ظهر تيار يقوده (محمد ابو الجرايد) يدعوا الى قيام جبهة وطنية بين تيار حاج زعيبل وتيار الصدر . حاول حاج زعيبل اقناع محمد ابو الجرايد قائلا:
( خوية ابو جاسم شنهي سالفتك .. شنهي اللي جرى لعقلك ؟ جاانت ماتعرف تاريخ الجماعة ؟ نسيت سوالف جيش المهدي ؟ نسيت المحاكم الشرعية ؟ نسيت بان الصدر شريج بحكومات المحاصصة وشريج بالفساد وربعه فاسدين .. شلقصه ابو جاسم )
رد محمد ابو الجرايد وهو يحرك يديه بعصبية : ( حجي انت ليش مجلب بالماضي .. احنه ابناء الحاضر... اليوم مقتدى يختلف عن مقتدى السابق . ماسمعته اشكال)
رد حاج زعيبل بهدوء : ( أي خوية ابو جاسم سمعته ومامقتنع ولافرحان مثلك )
قال محمد ابو جرايد باستياء : ( شنوا اللي سمعته وشلون مامقتنع)
اعتدل حاج زعيبل في قعدته وقال :( السيد كال نرحب بمشاركة التيار المدني بمظاهرات الاسلاميين )
قاطعه محمد ابو الجرايد : ( وهاي الحجاية موزينه ؟ )
قال حاج زعيبل مبتسما : ( نعم موزينه . لو عنده مالت الله مو مالت عبد الله جا كال نرحب بمشاركة الاسلاميين ومو نرحب بمشاركة المدنيين لان احنه جماعة التيار المدني اللي بدينه بالمظاهرات وشبعنه تواثي من حزب الدعوة وهسه الصدريين من صارت كلهه تحجي علفساد يريدون يشاركون .. احنه اللي نرحب بيهم او مانرحب مو هو يرحب .. لكن السيد يكلب الحجي لوجه الله)
قال محمد بنفاذ صبر : ( وبعد ...)
- بعد ...ايكول خل نحط الخلاف بين الاسلاميين والمدنيين على صفحة
- حجي زعيبل هذا شي زين .. الظرف يستوجب ترك الخلافات
- ابو جاسم انا خل اسالك : شنو خلاف التيار المدني وي الاسلاميين هل هو على عدد ركعات الصلاة لو على عدد ايام رمضان
- لا حجي احنه انريد دولة مدنية تفصل الدين عن السياسة والاسلاميين يريدون دولة اسلامية او نص ونص
- بعد سؤال : هذا الخلاف اشلون نتركه وشلونا نحطه على صفحه ؟ هل يقصد احنه نتنازل عن هدف الدولة المدنية لو السيد يتنازل عن هدف الدولة الدينية ؟
- السيد قصده انركز على الاصلاح بهاي المرحلة
- هم خوش حجي ...الاصلاح ممتاز .لكن عندي سؤال زغيرون ، اكول هذا الفساد شنو سببه ومنو سرق اموال العراق ودمر البلد وشنو دور الصدريين بهذا الفساد؟
بربك ابو جويسم منو خرب العراق غير الاحزاب الاسلامية اللي السيد الصدر جزء مهم منهم ..
مولاي ابو جاسم ، الصدر شريك بالفساد ومايكدر ايبري روحه.
هو شكّل وياهم الكتله الانتخابية الشيعية ( التحالف الوطني ) وهو شارك بالمحاصصة واخذ حصة الاسد من وزراء ومدراء عامين ومجالس محافظات، وماتطلع وظايف بالدولة الا وللصدريين بيهه حصة ، فليش يرمي المسؤولية على باقي الاسلاميين ويسوي نفسه بريء ومعارض ...ليش من جانت الفلوس هوايه جان يسرق وياهم ومسويله لجنه اقتصادية مثلهم ،لكن من وشلت الخزينه استيقض ضميره وصار معارض ... هذا تقشمر وروح خالي زاير غطى.
بان الانفعال على وجه محمد ابو الجرايد وعاد يحرك يديه بقوة وعصبية قائلا : ( السيد شعبيته كاعد تتصاعد وراح يحاصر الخضراء واحنه اذا مانصير وياه ننعزل عن الناس .. )
قال حاج زعيبل وهو يحاول تهدئة النقاش : ( خوية ابو جويسم احنه ندري السيد عنده شعبية وعندة (جكسارات) بيض اكثر من شعر لحيتي، وعنده حمايات بالالاف وذوله عدهم كتلة الزلمه مثل كتلة الجلب . وادري عنده جيش موازي لجيش الدولة وادري عنده اسلحه وعنده فلوس ... ادري بيه قوي ونشيط ويجوز ربعه ايشكون حلكي ، بس مع هذا اسمعهه صريحه من حجي زعيبل : ماامشي تحت ظل الصدريين لو يشنقوني... هو يتظاهر او يعتصم بصفحه واحنه بصفحه ثانية
شعر محمد ابو الجرايد بضعف حججه وعدم قدرته على الدفاع عن فكرة الانضواء تحت مظلة الصدريين فقال بما يشبه التوسل : ( حبيبي حاج زعيبل .. افهمني .. انه موقصدي نصير صدريين ولانصير تابعين الهم .. قصدي اكو تقاطع بالاهداف .. يعني التيار المدني والتيار الصدري هدفهم واحد بهاي المرحله وهو محاربة الفساد)
قال حاج زعيبل بحزم : ( لا ابو جاسم انت هواي مشتبه .. هدف التيار المدني يختلف عن هدف السيد الصدر ...احنه هدفنه الاصلاح الحقيقي وترك المحاصصة ومحاسبة المفسدين الكبار .. اما الصدر فكل اهدافه شخصية ولمصلحته .
اولا يريد يتخله عن مسؤوليته بخراب العراق في حين هو مسؤول حاله حال باقي الاسلاميين لانه شريكهم..
ثانيا يحاول ان يضعّف حزب الدعوة والباقين حتى هو يقوى على حسابهم وياخذ منهم مكاسب اكثر
ثالثا هو شعر بان ارادة الشعب راح تتحقق فيريد يسرق جهود التيار المدني..
اسالك سؤال : ليش ماشارك بالمظاهرات اول بدايتهه ؟ ليش هسه تحرك ؟ اخوي ابو جاسم احنه مو ازواج

ساد الهرج والمرج،بين جماعة حاج زعيبل فهذا يريد التعاون مع الصدريين وذاك يصرخ مستنكرا التعاون مع الصدريين ووصل الامر الى الاشتباك بالايدي .
صرخ حاج زعيبل عدة مرات فسكت الجميع فقال حاج زعيبل :
( راح اسولف الكم هاي السالفة وبعدهه كلمن بكيفة ...
ذيج السنة طلعت عصابة بوحدة من العشاير ... رئيس العصابة اسمه (مرشاك المسودن ).. امسودن من صدك وقوي جدا او مستهتر... هتلية العشاير كلهه التمت عليه وصار مرشاك عشيرة بداخل عشيرته.. صار ينهب بكيفة ويحبس بكيفة واللي يعصي امره يعذبه عذاب شديد ..استمر على هل حال اكثر من عشر سنوات والناس ماتعرف عدمن تشتكي ....
ذاك اليوم (مرشاك المسودن) اعلن بانه راح يروح للحج ويتوب توبه نصوحه .. الناس بين مصدكه وبين مجذبه ومحد يعرف شنو الاسباب اللي خلت مرشاك يتوب..هذا يكول هداية الله وهذا يكول شبع وخزاينه انترست وهذا يكول شاف الديره امحلت .. مااطولهه عليكم اجه يوم سفره الى بيت الله وطلعت الناس تودعه وهي فرحانه بتوبته ..مرشاك خطب بالناس وكال الهم بانه بريء من أي سرسري من جماعته .الناس تعجت من هاي البراءة لان ربع مرشاك كلهم سرسرية ، فهل يتبرا مرشاك من كل ربعه؟
المهم راح مرشاك للحج ورجع يحمل لقب (حاج مرشاك) والناس استقبلته استقبال حار، وفعلا مرشاك جر عدل وي الناس فترة من الزمن ..
ذاك اليوم ربع مرشاك السرسرية سيروا على حاج مرشاك بنص الليل ..
- ها خيرا اشجابكم عليه ؟ مو تدرون انا تبت
- حجي مانشوف الا شوفتك .. (حجي خلافك ذلينه) وكتلنه الجوع ومحد يخاف من عدنه .. الناس تقوّت علينه ومانعرف شنسوي ، هيبتنه انكسرت ..علمنه شنسوي حتى نسيطر علعشيرة؟
عدل حاج مرشاك عكاله ومسد اشواربه والتفت الهم وكال الهم وهو يتبسم :
(والله مثل ماتعرفون انه حجّيت وتبت ، لكن لوما رايح للحج جاعلمتكم بالحل ،لوما انه تايب ونايب جاكلت الكم القضية بسيطه .. كلش بسيطة .. اكسروا السدة بنص الليل . العشيرة راح تغرك .. الوادم تلتهي بالفيضان ، انتم اهجموا علعشيرة. طلقه بالراس وانته ماشي، ومايصبح الصبح الا والديره صافية الكم .. هذا هو الحل ياجماعتنه ، بس انه مااكدر اعلمكم لان صرت حجي.

عودة وهيب

[email protected]

#عودة_وهيب (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل