سوالف متخلص من حي النصر

محسن لفته الجنابي
كاتب عراقي مستقل
(Mohsen Aljanaby)

الحوار المتمدن-العدد: 5098 - 2016 / 3 / 9 - 00:16
المحور: كتابات ساخرة
    

اليوم رحت لـوكيل الطحين لأن صار أربعة أشهر مارايح گـلت بلكن أستلم الحصّة , لأن حصة الطحين من يوم ما صارت كل أربعين يوم تاه علينا الحساب وما نعرف موعدها بحيث كلما أمر أباوع دكان الوكيل ألگـاه معزّل , ولذلك صرنا نعتمد على الخبازه بالدربونه ومرّات نشتري صمّون من الفرن براس الفرع
المهم اليوم العصر لما رجعت شفت الدكان مفتّح ولگـيته للوكيل گاعد وعم البلسم جوارح نفسي وأستلمت أربعة أكياس ننثرها بعين العدو , لكن الفرح لايدوم عندنا فمن سوء حظّي شفت الحجّي أبو مثنى عنده وسلّمت عليه (شلونك عمّي) , هذا أبو مثنى فد واحد نقناقي وحقنة, سألني من وره خشمه وين ماوين أشو صار سنتين مشايفك , جاوبته : عمي والله بالدوام وأرجع متأخر ويادوب أخلص شغلاتي وتعرف نهار الشتا گـصيروني وأرجع بالليل أتطوطح من التعب , حاولت أبرر كأنما مطلوب أقساط متأخرة لجمعية الأرامل الثكلى , لكن شأسوّي لأن رجّال چبير وأعرفه من أيام حرب الشمال لازم أسمعه وأحترمه , الحجّي أبو مثنى طبعه مايختلف عن طبع غالبية ربعنا ,فهو نموذج للكبار المتغطرسين اللي مايعجبهم العجب
ولذلك حاول مثل كل مرّة يبحث عن شي يعجّزني بيه ويطلعني موخوش آدمي
فلذلك كلما أجاوبه بفد جواب يفنّده ويگـول العكس
مثلاً سألني بيش الساعه يبدي دوامك وأشوكت ينتهي؟
جاوبته : عمي يبدي بالثمانية الصبح وينتهي بالثلاثة العصر
ضحك وصفق أيده وگال وين أكو هيچ فلم , أنت لو تجّذب لو عساس تمثل دور الخوش ولد , خايب وين أكو دوام بهيچ وكت , گول دوامك بس يوم الراتب أعترف !
سكتت على مضض وراها طلعلي بسالفة رأسمالية وراد يتعنقر وسأل:
-وين توّدّي فلوسك ؟
حقيقة السؤال فاجئني , لأن معقد وتعال أشرح لجنابه ألتزامات الحياة ومصاريفها اللي مالها أول ولاتالي , فلذلك سكتت وتركته يثرد ويرعد .. من خلّص النوبه صار بروليتاري وگـال:
تدري أكو بنات بالمدرسة بمنطقتكم داومن الشتا بطرك القمصان الخفيفه ومحّد أنتبه ولاداير بال عبّالك مو بنات منطقتهم , ماعدهم نخوه والله مطيّح حظهم
هاي السالفه حمسّتني فجاوبته بسرعه : بهاي أنت متوّهم عمّي أبو مثنى , لأن أكو ناس من أهل الخير جمعوا فلوس وأشتروا ملابس وجنط وزعوها على المدارس بمنطقتنا وآني شاهد وعندي أدلّة
لم يجد بد أبو مثنى إلا أن يلجأ للخطة ب وهي الهجوم من عدة محاور على محاوره فطفح منه سيل من الأسئلة :
أگلّك صحيح داعش راح تغيّر أسمها وتلبس كاوبوي وتزيّن شعرها ؟
سمعت أنو العصابات المنفلته راح تنهزم؟
صدك أمريكا راح تبقى أربعين سنة بالمنطقة ؟
سمعت بـ هيلاري مرت كلنتون متقدمة بالأنتخابات أنت هم سمعت؟
شتگول إذا فاز ترامب أبو گذله يضربنا نووي؟
زين ذولي ربعك بالحكومة شنو قضيّتهم وين راح يوّدونا أشو حايرين بالفرهود ويومية مجتمعين يتقاسمون بوگاتهم والناس محّد ألها واللي يعترض لو يشيل راسه يذبحونه وراح يخلص الشعب؟
كل تلك الأسئلة رماها الحاج أبو مثنى الگاعد ركبه ونص من وضع الصلي , النوبه صارلي محلل سياسي شرق أوسطي مدري عالمي , أكيد يريد يجرجرني لحديث يخلّص بيه وقته الطويل لأن ماعنده لاشغل ولاعمل
ولذلك أتبعت أسلوب الهجوم حتى أخلص , فسألته نفس السؤال اللي سبق هاي الأسئلة :
عمي أبو مثنى وين أتوّدي فلوسك ؟ أكيد سمعت بالتقديم للحج , قدّمت ماقدّمت ؟
أومأ برأسه دلالة على الرفض
بهذا الجواب خذلني , فقد توقعت أنه سيقول قدمت للحج فأقول له : أليس الأولى أن تعطي مبلغ تكاليف الحج للمحتاجين بالمنطقة وهم أولى , مومشكلة خلي أفوّتها وأستغل الفرصة بلكي أعيد الأعتبار لنفسي لأن حيل ضوّجني
فبادرته بسرعة :
حجي لاتزعل منّي , أشو أنت گاعد تتفرج عبالك جاي من كوكب المشتري رغم مكانتك وصيتك وفلوسك بگد الدود والنمل و مالك أي دور بالمشهد وفلوسك ماتنطي منها وحتى للحج ما سجلت وماعندك سالفة غير تجريح الناس ذاكه طويل وهذا گصير بس تريد تنتقص منهم , متگولّي شنو مشكلتك, أريد أعرف شنو سوّيت بدنياك وأنت ما كو فائدة منك غير السب والقرض .. أنا أخوك .. خطيّه صفن خلّه أيده على خدّه يمكن زعل !
المهم أخذت بثاري وطفرت وأنا أردد بصوت مسموع :
اللي عنده كُلشي وكلاشي ويندعي نفسه مثقّف وماينفع غيره .. مايسوى فلس .. مايسوى فلس .. ما أدري زعل أو مازعل , المهم أرتاحيت وخلص!

#محسن_لفته_الجنابي (هاشتاغ)       Mohsen_Aljanaby#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل