رسائل اعتذار على اللي كان وصار

جان نصار

الحوار المتمدن-العدد: 5056 - 2016 / 1 / 26 - 15:54
المحور: كتابات ساخرة
    

الرساله الاولي:من ملاين من الشعب العراقي للرئيس الراحل صدام حسين.
سيادة الرئيس المرحوم بعد تصريح احد خلفائك بحكم العراق السيد اياد علاوي واللي بقول في انو العراقين بترحموا على زمانك وجدنا انو الزلمي معاه حق واحنا ندما نين حينما لا ينفع الندم على رحيلك ونهايتك المأساويه.
اينعم انت كنت دكتاتوري وحاكم مستبد وكانوا ضحايك بالعشرات بالسنه وهدا شيئ محتمل.والعراق كان موحد ودوله قويه وجيشها قوي والفساد واللهط كان بمعدلاته الطبيعه .الك شغلات تحسب لك مثل انو الشعب كان في بحبوحه والصراع الطائفي مكنش ظاهر ومنقدر نقول انو الامن مستتب وفي امان.يمكن كنت علي بابا ومعاك 40 حرامي وكمان هدا مش غريب على وطن عربي ما في ديمقراطيه وعداله اجتماعيه وحريه بس في وحدة اراضي وتماسك ودوله ماشالله عليها الها هيبه والشعب ما كان جوعان.
اليوم دوله فيها صراع طائفي سني شيعي كردي وهادا ازيدي وهاد مسيحي وهاد تركماني والذبح شغال 24 ساعه مع خدمة الاخد والتوصيل للبيوت جثث هامده. واللي بدك اياه.جيش مهرول وضعيف وما الو اعتبار.ارهاب ضارب بالنخاع والفساد مستفحل واللهط والنهب والشفط لا تسأل.باليوم بموتوا في المئات والعشرات مش بالسنه.وفي 4000 الاف دكتاتور و علي بابا وكل واحد عنده 4000 حرامي.
من الاخر ايامك كانت عز والعراق بدو 50 سنه تيرجع زي ما كان على زمانك هدا اذا رجع وما تفتفت اكتر من ماهو مفتفت.
ملحوظه :من يوم ما احتل العراق وسقط حكمك فرطت المسبحه والدول العربيه فرطت يعني انت كنت البدايه.

الرساله الثانيه:من الشعب المصري الى الرئيس مبارك
بالبدايه احنا منعتذر منك لاننا كنا فاكرين اننا راح نتخلص من حكم العسكر ومع الاسف تيتي تيتي متل ما رحتي جيتي, هربنا من تحت الدلف اجينا تحت المزراب. العسكر ورانا ورانا وكان لازم نرضى باللي منعرفه احسن من اللي منعرفوش.
الفساد حدث ولا حرج ولا في عيش ولا حريه ولا عداله اجتماعيه واللي ضحوا باروحهم كله كان فشوش.
السيسي مش احسن منك بكتير قمع الحريات والسجون البكوكينغ فيها يعني الحجوزات كاملة العدد وكل الزنزنات عمرانه والوضع يبان مستتب بس هو منيل بستين مليون نيله والفقر ضارب اطنابه. وابقى سلملينا على الغاز والكهربا دول وحشونا اوي.حرية الصحافه دي خرافه. وماله الفقر دى حلو ولذيذ واحنا اتعودنا عليه ومش عايزينه يفارقنا دى احنا من غيروا ولا حاجه.

الرساله الثالثه: من الشعب الفلسطيني الى القياده الفتحاويه والحمساويه.
بصراحه احنا ندمانين على الانتفاضه الاولى اللي كان من نتأجها عودتكم الى فلسطين وبعدها انبثاق حركة حماس لانو بصراحه انتو قياده مطقعه من الجهتين .قسمتونا اكتر من ما كنا مقسمين.
طالما انكم غير قادرين انو توصلوا شعبكم لبر الامن وتقودوا هالسفيني حالو عن سمانا وافرقونا بريحه طيبه.
اقرفنا من خلافاتكم ومن مزواداتكم ومن فسادكم ومن كل نهجكم.لا بترحموا ولا بتخلوا رحمة الله تنزل علينا.
لا مصالحه نافعه معاكم ولا مقاومه ولا مساومه طالع بأيدكم تعملوا. حسوا على دمكم وسلموا الجمل بما حمل لغيركم وقولوا مش طالع بأيدنا نعمل اكتر من هيك.صرنا مثل بالفساد والمحسوبيه والمزودات.
نازلين بالمحصصه وتقسيم الورث ولا سألين على الشعب.
المفروض منا كشعب نعمل بالاول انتفاضه عليكوا وننفضكم نفض وبعدين منشوف الحل مع اسرائيل.
لاء وبتزاودوا على بعض بالتنسيق الامني وكانوا بس السلطه بتنسق وحماس لاء. مهو كلو بنسق بلاش عنتريات ,وكلوا بلهط وبعبي الجيبي والشهداء مجرد ارقام .
اعادة ترتيب البيت الفلسطيني هاي اول خطوه مطلوبي اليوم.

الرساله الرابعه:من دائرة الارصاد الجويه الاردنيه الى الشعب الاردني والفلسطيني:
والله يا اخوان بدكوا تسامحونا بقرأة حالة الطقس وتوقعاتنا للعاصفه الثلجيه ومنهديكم اغنية مش عم تزبط معي.
بصراحه خربطنا وكان قدامنا خارطة الولايات المتحده وشفنا انو في عاصفه جاي هادا من جهه ومن جهه تاني مش بقولكم انو كذب المنجمون ولو صدقو, مين الكم تصدقونا.
وشغله تالتي وهي الاهم انو وزارة التموين والتجاره نصحونا بهالتوقعات على اساس انكم شعب مطرطئ وكلمه بتوخدكم وكلمي بتجيبكم, وبهالحالي كل البضائع المنتهية الصلاحيه لحستوها من السوق الله يعطيكم العافيه وصار في حركه نشطه بالاسواق.
تجار المواد التمونيه والخضار واللحوم بشكروكم على تعاونكم وشرائكم الاخضر واليابس وبقولولكم الله يزيدكم هبل ويزيدنا مصاري.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل