اذكريني

راجي مهدي

الحوار المتمدن-العدد: 5026 - 2015 / 12 / 27 - 22:52
المحور: الادب والفن
    

اذكُريني ..
لمَّا يغمُرني التاريخ بأوساخه
و يحاصرُوني العِدا بالسوء
قوليلهم كان ف السُكات صوتي
حين كان الكلام مَخْنوق
اذكُريني ف كُل طَلعِة شمس
اذكُريني ف الكلام و الفِعل
اذكُريني ف الصُراخ و الهَمس
اعلنيني عَبدِك المَملوك
و اعلنيني رَبك المَالِك
ده أنا لما هايجي اليوم
هاكون قُربانِك الهَالِك
بدون ما تحسِي أفديكي
أزيح الضَباب اللي ف عنيكي
و ف ليلِك اقيد النار
و حارِس دار ..
أغزِلِك بُكرة م الازهار
يا غيط نَرجس علي نُوار
يا وَاخدَة قلبي كالاعصار
مافيش بعدِك هوا يتعاش
و قلبي عُمره ما يكفَر بِك
مهمّا تطاطي للأوباش
** ** ** **
حبيبتي ..
و إن يعلِنوا ف إذاعَاتهُم اني شيطان
قوليلهم شيطَان وَطني
و لا مَلاك خَايِن
مَهما كان الضَلام طَوِّل
و نور الفَجر مش بَايِن
انا يا مَصر مش قلقَان
جايِلك فُوق سنين الصَبر و الأحزَان
لكِن ما بابِعش ..
و لو رَفعُوا التَمَن فيكي
لضِعف الضِعف
انا مُجمَل سنين الضَعف قوِتني
نظرة ف عِينك تقوِتني
جيوش جَرّارة قاتلتني
و قتَلِتني لكن ما باموتش
** ** ** **
يا حَبيبتي مهما حاصرونا
تلاقي وَرَقنا تَحت الارض
و ف السراديب
مهما قالوا اننا ضِعنا
تلاقينا م السِكك طالعين
نموت لَجلِك كما المَجاذيب
نرفع رايتِك الحَمرا
تنوّر ليلِك كانها شَمس
يا مصر احنا اللي جاي و الأمس
و حُبِك داء و ماله طبيب
** ** ** **
اذكُريني ..
لما يجيني الظابِط بعريضة التَوقيف
يقابلوني بحَفلِة استقبال
و دَمي يسيح ف شَمس الصيف
و يطلع بيَان حالَة من الجَلاد
كان مُتمرِد ..
و كان ع الثَورَة بيحرض
و ضد الحُكم بيألِف
كلام زي حد السِيف
قبضنا عليه ف ايدُه كتاب
و فكر مُعادي للأغراب
وطني جداً بشكل مُخيف
فاذكريني ..
من غير ما تقيمي لي ضَريح
انا الفِكرة اللي لونها صَريح
لا تحبسني زِنزانَة
و لا يحاصرُوني سَجّانة
و لا يكسرني عَصْف الريح
اذكريني ..

#راجي_مهدي (هاشتاغ)      

---

اشترك في قناة ‫«الحوار المتمدن» على اليوتيوب
حول الانتخابات في البرازيل مع عالم الاجتماع والفيلسوف الماركسي ميكائيل لووي - اضواء على احداث ساخنة	حوار مع صلاح عدلي الامين العام للحزب الشيوعي المصري حول اوضاع ومكانة القوى اليسارية والتقدمية في مصر

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات