الولايات العراقية المُتحِده..

سامر رسن الواسطي

الحوار المتمدن-العدد: 4782 - 2015 / 4 / 20 - 00:32
المحور: كتابات ساخرة
    

حوار جانبي مع صكَبان ابو الغاز...
*عاش من شافك صكَبان،صاير مثل هلال العيد..
_إنت العايش،وداعتك ملتهي بالفواتح والتشييع،تدري سامر هذا البلد لو يتقسم أحسن،على الأقل السِنه يرتاحون من الشيعه الروافض،والشيعه يرتاحون من السنه النواصب،والعرب يرتاحون من الكورد العملاء والكورد يرتاحون من العرب المتخلفين المجرمين....
*هاي شنو ابو الصكوك،لعد وين كلامك عن العراق الواحد،وموقفك ضد التقسيم؟..
_سويمر،الهندوس والمسلمين من شافوا نفسهم ما ممكن يتعايشون بدولة وحده كَعدوا بيناتهم وقسموا بلدهم،الهنود الهندوس عاشوا بالهند،والهنود المسلمين عاشوا في باكستان،وبعدين مو عيب إذا اتراجع عن رأيي فحضرت جنابي لامرجع ديني ولا بان كي مون...
*بس صكَبان أكو هواي ناس ضد التقسيم...
_شوف سويمر راح اعددلك أنواع الناس الضد التقسيم....
1-عراقيين عايشين خارج العراق،وأغلبهم ينتظر الإقامة أو جنسية الدولة العايش بيهه،ومن يجي للعراق يلبس كمامات و֤-;-كفوف يخاف من التلوث...
2-ناس بطرانه مثلك و"مثلي قبل سنتين"،ومن كل المذاهب والقوميات ما تتجاوز نسبتهم 1% ، وما ينسمع صوتهم من شدة الصوت الطائفي والعنصري..
3-ناس ما فاقدة عزيز،سواء بحروب صدام العبثيه او بالمعارك الحاليه أو بالتفجيرات الأرهابيه..
4-ناس ما رايحه تلزم سِره على حصتهه من ادوية الأمراض المزمنه بالمستشفيات..
5-ناس مخلصه يومهه بين الكتب والمكاتب وما مظطره تشتغل..
6-ناس تبحث عن الشهرة وخاصةً من تبسط وتسفه الموضوع وتختصر هذا الخراب بتصويرهه للوطن على إنه "صينية بيهه شمع وكليجه وعصير وريحة هيل"....
*زين صكَبان ونظرية مؤامرة التقسيم..
_حتى لو كان أكو مؤامرة فخلص كافي مكابره وخلي نعترف إنه نجحت..
*طيب صكَبان واشلون راح نقسم الوطن،ولابد أكو ثمن..
_هواي طرق للتقسيم،من ضمنها تصير لجنة خاصة من الأمم المتحدة لهذا الموضوع،أما الثمن فأكيد ما راح يكون بحجم الثمن الخسرناه...
*صكَبان الموضوع مو بهاي البساطه،وخاصة بوجود هاي الاحزاب والتيارات والمُعممين..
_ميخالف،على الأقل راح تخلص من تهمة الطائفيه،وإذا تمكنت مجتمعات الأطراف الثلاثه من بناء دول متحضرة مو بعيده يطالبون بالإتحاد من جديد وتشكيل دولة إسمها الولايات العراقيه المتحده...
*والأضرحه الدينيه والحسينيات والجوامع والكنائس؟
_دم الناس وكرامتهم أهم من الأضرحه الدينيه والحسينيات والجوامع والكنائس وبيت الله...
*زين استاذ صكَبان ولو دوختك بالأسئله،بس برأيك راح يكون أسماء هاي الدول الثلاثه بعد التقسيم شيعستان وكوردستان وسنستان لو غير أسماء...
_سويمر حتى لو يكون الإسم نعالستان هَم مو مشكله،المهم تتوقف مسيرة تشييع شهيد جديد كل نص ساعه،ها تسمع هذا الرمي؟الظاهر هَم جابوا شهيد جديد،خلي أروح اشوفه منين،في امان الله..

#سامر_رسن_الواسطي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل