ما عنا حريم تبان على الرجال

جان نصار

الحوار المتمدن-العدد: 4744 - 2015 / 3 / 10 - 18:28
المحور: كتابات ساخرة
    

قال بقولك انو وزيرة خارجية السويد الست مارغو فالستروم اظن هيك اسمها مش متأكد كتير لاني الاسماء الاجنبية يا دوب احفظها.صارلي 30 سنه متجوز ويا دوب بعرف اتهجى اسم زوجتي.
المهم شو بدكم بالطويلي خلينا بموضوعنا هاي وزيرة خارجية السويد كان بدها تلقى كلمه في مؤتمر وزراء خارجية العرب وجماعتنا المسؤولين المسهولين السعودين منعوا هاي الحركه القرعه من سيادة الوزيره, على اساس ما عنا نسوان وحريم تبان على الرجال. وفوق كل هاد وهاد الاخت سافره وغير منقبه او على الاقل محجبه.وحتى لو كانت محجبه من امتى صار كلام النسوان بمشي علينا احنا الرجال.. باطل.
طب علي الطلاق من نسواني الاربعه اللي لساتني ما تجوزتهم ابصريش هالكلام.يا ابو فايك.
اكيد المسؤولين السعودين بقدروا يحلفوا هيك يمين لانه الاربعه موجودين وغيرهم راحوا لبعيد وتركوني لحالي.
يا جماعه بالفعل اخوتنا السعودين معهم حق يعني من قلة الرجال ببعتولنا مرا. شو السيره وين احنا عايشين بالسويد.
يا حضرة الكاتب:بردون منك احنا عم نحكي عن السويد بالفعل.
ولو مش مهم همي ببلادهم يعملوا اللي بدهم اياه بس عنا لع .
ثم شو جنابها بدها تحكيلنا او تنصحنا بكلمتها؟ احنا اطلعنا على الكلمي.
بدها تحكي عن الديمقراطيه والحريات وحقوق الانسان و النسوان وموضوع رائف بدوي وتغبيصات من هذا النوع.
احنا مالنا ومال الديمقراطيه وحقوق الانسان هاي شغلات خليهم همي بالسويد والغرب يلعبوا فيها لانها شغلات تفسد وتضعف الامه وتفسد النسيج الاجتماعي لشعوبنا وكمان تدعو الى الزيله.
ومالنا ومال الحريات. عنا احسن من الحريات ,عنا جمالات وصفيات وعنيات واهات وعذابات وقهرات وفلاقات.
وهادا رائف بدوي اصلا مسجون وجلدناه مشان الست حريه بنت حريات ....
على صعيد اخر وبعدنا في السعوديه الملك الجديد اخر طبعه الملك سلمان ابن ساندوكان قال بدو يغير سياسة سلفه الراحل عبدالله اللي اخرج الاخوان من الباب وهاي جلالته دخلهم من الشباك لانو هدول الفرس جماعة ايران مش مصلين على النبي ومش ناوين يجبوها البر.
غير مشروعهم النووي اللي راح يحطوه بالثلاجه ويجمدوه لعشر سنين وامتى ما بدهم مواد الطبخه اللي هو اليورانيوم وكل البهارات وتوابعه موجودي وجاهزين للطبخ بأي لحظه في حال قدوم ضيوف. هاي هم (الايرانين) اليوم بصرحوا كل مسؤولينهم ان الهلال الخصيب وبلاد الشام كلها لازم تصير هلال شيعي .
بالمختصر الحديدي حاميه والاخوه السعودين لازم يجمعو كل السنه ومن ضمنهم الاخوان واذا لزم الامر الدواعش ضد الخطر الشيعي.
في الواقع يا عزيزي القارئ الوضع مكهرب ومخربط ومدمر ومفتفت ومقسم بعالمنا العربي. وممكن ها مش اكيد ممكن اننا دول فاشلي.
ايران اليوم قوه اقليمي كبيري وبتلعب دور البطولي والها وزنها وصارت حاطه 4 دول عربيه تحت جنحانها سوريا ولبنان والعراق واليمن اللي كان سعيد ايام العيد.وما مننسى ان البحرين مرشحه للدخول الى برنامج ايران غوت تلنت .
السعودين والقطرين اليوم ندمانين على اللعب بالنار في سوريا. اي نعم الجماعه ولعوعا بزيادي فوق ما هي كانت ولعاني لكن تجري الرياح بما لا تشتهي السفن. اليوم ومن بعد اربع سنين بقولوك ماذا لو بقي الاسد.
خلينا نرجع لموضوع الحريم والنسوان لانو كاتبنا مرات كتيره صار يشطح ويمرح وبدخلنا بمتاهات خارج سياق النسوان والموزز.
الرئيس ابو مازن اليوم بصوره مع الموزه وزيرة الاتحاد السويسريه ..بصراحه وحدي ميدل ايج يعني اربعنيه على خمسينيه بتعقد, يا هيك الوزيرات يا بلاش.
احنا العرب وكاتب السطور ما منشوف وزيرات ومسؤلات منشوف بس نسوان ومزز وشلخات واهتمامنا ما بنصب على ما تمثله هذه النساء من وظائف حكوميه او تمثيل لبلادها او او , لانه كل هاد مش مهم, المهم الاخلاق والخلفيات الثقافيه.
رئيسة وزراء النرويج بتفلج طويلي وشقراء من قومي عيسى عليها كل ابتسامي يا دخيلو الله.الرئيسه ميركيل بزياره لليابان ووفد رفيع المستوى وعلى رأسه ربوت جنتلمان بستقبلها.
باختصار وزيرات وملكات ورئيسات ومهندسات وطبيبات ومحاميات و و و , كلهم نسوان بالغرب بمارسوا هيك مهمات ووظائف طبعا من قلة الرجال مش مشان المساواه . وهاي اللي احنا بنعيب عليه واللي بثبت صحة كلامنا انهم مجتمع منحل وساقط ونسوانهم دايما طالعين بين الرجال وما في حد يشكمهم ويحطلهم حد.
تفضلوا هالمثال دوله مطقعه وفاشلي مثل المانيا بتحكمها مرا.دوله الاقتصاد السادس على العالم ودولي هزيلي مثل البرازيل بتحكمها مرا .وين الرجال وينهم.
عندنا الدول الحديثي والمش متخلفي والبعيدي عن الاميه والمرض والفقر يحكمها الرجال.هيك دول مش فاشلي والا بلا .
اي الرئيس السوداني الجنرال البشير لما هدد امريكا بالعصا اللي دايما حاملها كان الو هيبي وبرستيج اشي ساخر على الاخر.
الرئيس الصومالي والا اليمني والا اللبناني والا... .
ستوب يا حضرة الكاتب صرعتنا خلص بكفي.وللعلم فقط لبنان صارلهم 8 اشهر مش قادرين ينتخبوا رئيس.الصومال مع كل الاحترام هاي مش دوله هاي مجموعة حارات ودوله افشل من فاشله.
اليمن الرئيس السابق مختلس 60 مليار دولار والبحث عنه جاري والحالي هارب وراح عند امه.الرئيس العراقي يادوب يحكم بغداد ولساه تحت التجربه والاسد شرحه بحكم دمشق .والسيسي في مصر رئيس تحت الاختبار بلعب بالوقت بدل الضائع.وتونس تبحث عن رئيس يخلف الرئيس.والسعوديه ملك منتهي الصلاحيه.وقطر امير على الملوخيه والمغرب ملك على الكسكس المغربيه والجزائر الرئيس في اجازه مرضيه وبقية الزعماء العرب في مقهى الجامعه العربيه.بالمختصر حزمني شويه لأرقصلك رقصه شرقيه واغنيلك اغنيه طربيه .

#جان_نصار (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل