انسى الدنيا وريح بالك

جان نصار

الحوار المتمدن-العدد: 4739 - 2015 / 3 / 5 - 13:18
المحور: كتابات ساخرة
    

يا جماعه انا رافع شعار انسى الدنيا وريح بالك بس بالرغم من هيك من الصعب اني انفذوه بحذافيرو لانو الاوضاع كل مالها لورا.بنضربها يمين بتجي شمال .
كيف ممكن الواحد ينسى ويريح باله والدنيا عم تغلي هون وهناك.
اخبار ارهاب داعش الداهش الطاحش الفارش الناهش والقارش والجاحش والطاشش والخاشش والنادش والناتش والراشش عن الذبح والنحر والقتل والاغتصاب والسبي و و. خلت عقلي فارش ومش عايش.
بقية الاخبار فيها العجب العجاب والهبب الهباب.
قال نتنياهو راح على الكونغرس الامريكي وقال شو انا مش جاي للسياسه.
طب دخلك لشو رحت على امريكا من اسرائيل.سياحه وسفر او زياره والا بزنسس والا رايح أطبقلك شي موزه او شلخه امريكيه لالا اكيد رايح شوبنغ.
يمكن هيك بالصدفه كان معك ورقة مكتوب فيها خطاب ضد المشروع النووي الايراني وقلت يللى طالما اني وصلت خليني افقعهم اياه بالعضل.
طبعا مش راح نقول دعايه انتخابيه ومع هيك حلال عليك اسهمك بالصدفه ومن غير تخطيط ارتفعت وصار حظك بالعلالي.
الرئيس الامريكي اوباما زعلان شويه وماخد على خاطره من نتنياهو لانو اجا بلا دعوى ومع هيك بقولك انا مع حل القضيه الفلسطينيه وهو مش ناسيها(ما تخافيش انا مش ناسيكي) وكل هاي الفيتوهات اللى ضد الشعب الفلسطيني وقضيته ما هي الا محبه لتطويل مسلسل حل القضيه الفلسطينيه مشان الاثاره والتشويق.
يا خوي يا اوباما بتطل في نسبة مشاهده عاليه لهلمسلسل خليصنا على الاقل زحزحه شويه في عهدك الميمون قبل ما تودع الكرسي.مش المثل عنا بقول يا رايح كتر الملايح. افرجها علينا بركي الله فرجها عليك.
الرئيس الفلسطيني عباس مش قادر المسكين يرضي حد لا اسرائيل راضيه عليه ولا الامريكان راضين ولا جماعة حماس راضيه وبالاخر طز والسلام عليكم كمل النقل بالزعرور وطلعلنا بالسحبي الاخ محمد دحلان بدو يصير الرئيس علينا ..والله هزلت .لهيك انا بهديه اغنية والله وتجمعنا تاني يا قمر.
طب شو اللي بمنع اني اترشح لرأسة امريكا مثلا رغم اني مش امريكاني وما معي الغرين كارت (الكرت الاخذر) ها يا خوي ابو فايك.
خلال دعواتي المستمره من عشرين سنه واخرها كان احد مقالاتي في الانتخابات الماضيه للكنيست الاسرائيلي ان الاخوه العرب يتوحدو وعملوها اخيرا .على الاساس اللي بقول مكرهين اخوانكم مش ابطال لانهم بعد رفع نسبة الحسم كان ممكن يرحوا فيها ويودعو..ولهيك هاي مني احلى زرغوطه: اويها والسبع تنعام عليكو.اويها واسم الله حولينا وحواليكو. واويها والله لأفرجيكو.اويها واللي ايجانا يجيكو .لولولولوليش.
طبعا القائمه الاسلاميه فرع الشمال رافضه الانتخابات والتمثيل بالكنيست مشان هذا عتراف بالاحتلال وما في فايده من اللعب بهذا الملعب والجماعة مش معترفين بالدوله اصلا بس حاملين هويات وجوزات سفر على اساس انهم اخذوهم بالعافيه وكان صعب تمزيعهم.
هاي كل اللي بنتسبو لداعش بمزعو وبحرقوا الهويات وجوزات السفر .
كلمة طيب عنا احنا الفلسطينيه الها كتير معاني واستعمالات.
طيب:يعني زاكي وشهي.
طيب:يعني موافق
طيب:يعني نعم.
طيب بصوت عالي:يعني فهمنا
طيب وانت بتشد على اسنانك:يعني بفرجيك او بتحلفلك او بتوعدلك.
طيب انزل اذا كنت زلمي:يعني تعال كول اتلي(علقه)
طيب بنشوف:يعني انشالله خير
طيب:يعني افهمنا
طيب:حل عنا وورجينا عرض اكتافك او افرقنا بريحه طيبه.
واخيرا طيب يا حضرة الكاتب زهقتنا وحل عنا وبكفي وخلص ونقطه وفشق السطر.
طيب يا جماعه هاي مواضيع عن القضيه وكيف بقية القضايا شو انا يا هالمسكين بدي الحق تا الحق.
العالم مشغول بالوان وظاهرة الفستان العجيب وانا مشغول باللي لابسه الفستان ابيض وذهبي والا ازرق واسود.
طيب انا شو بعرفني.. عندي عمى الوان وازهايمر النسيان وبسمع قارئة الفنجان وببحث عن مكان في هذا الزمان اكون فيه بأمان وبعيد عن النسوان.
على فكره انا بكتب وعارف انو القراء زي حالاتي...بكتب مشان اهرب من المدام وتعليقاتها وغرغرتها(ثرثرتها) وكل ما حكت كلمي بقولها هوس او هوش مش فاضي عم بكتب ,حلي عني موضوع مهم فيو تقرير المصير .وزي ما نتوا شايفين كتابه فستق فاضي.
الاحلى من هيك انو حرمنا المصون صارت تكتب بلغتين مش بس بلغه وحدي وصارت على الطالعه والنازلي وكل ما فتحت تمي وهس اسكت عم بكتب وما تشغلنيش واقلي بيض وتعشى لحالك.
شفت عزيزي القارئ من حفر حفرة لزوجته وقع فيها.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل