الموبايل...نعمه ام نقمه

جان نصار

الحوار المتمدن-العدد: 4664 - 2014 / 12 / 17 - 13:21
المحور: كتابات ساخرة
    

كل شعوب العالم بتستفيد من الاختراعات والعلوم والتكنلوجيا وعالم الاتصالات و و و..وبتاخد احسن اشي منها يعني الفوائد والمنافع وبتحاول انها تبتعد عن المضار والسلبيات يعني كل شي ايجابي وحبابي يا اصحابي الا شعوب الاعرابي ( يعني احنا العرب).
من احد اهم 20 او حتى 10 لالا 5 والا اقولكم اهم اختراع رقم 1 في العالم وخصوصا للنسوان هو الموبايل(الجوال).
من يوم ما دخل بيوتنا واحنا في النازل خرب علاقاتنا الاسريه وقضى على الحميميه لدرجة انه جابلي جلطه قلبيه.
كل صباح بلعن ابو جراهام بيل مخترع التلفون اللي وصلنا للبلفون وكتابة مقالي هون لدرجة اني راح احتج لبان كي مون واطلب منو العون نخلص من هالملعون.
كنت مبسوط ويا ما احلاني على موبايل الختياريي اللي فيو سند واند يعني هات وخد والابتداء والانتهاء.
طلعت فينا الحميه وقررت انا و زوجتي بعد سنوات من رفضها للينيو تكنولوجي يعني الموبايلات الحديثي انها تلحق اخر الصرعات في عالم البيليفونات وتشتري ايفون 6. وانا حلفت بالطلاق الا اشتريلها اليفون 7 مع انو لسه ما اخترعوا. وبالفعل هادا اللي صار قدمتلها هديه ايفون 6 +1 عشان ما اطلق ومن يومها ما سكت الكلام .
يا جماعه اليوم 24 ساعه وهي بتتكلم وبترغي فيه 26 ساعه من وين بتجيب الساعتين الزياده الله وكيلكم ما بعرف.صدقوني عند النسوان كل شي بصير .
خلال كتابتي لهذا المقال صار جايني من زوجتي 26 كول يعني مكالمي خلال ساعتين من ذهابها الى التسوق غير ميست كولز يعني المكالمات اللي بطنشها.
مش عارف اركز بكتابة المقال من كتر القيل والقال.ويليك يا عمي ارحميني .
اقلق راحتنا هالموبايل الله يقلق راحته.كل النهار والليل افواه النسوان ملتصقه بالموبايلات لدرجة انو احنا الرجال صرنا نغار منهم.
مسيجات ورسائل واس ام اسات ومكالمات في كل الاوقات على الفطور والغدا والعشا...تخيلو حتى نمنمة النسوان صارات بالموبيلات حتى لو بكونوا جارات الباب حد البابات. من كتر التنبلي والكسل بطلوا النسوان يزوروا بعض واكتفوا بالرغي والعلاك.
الموبايل صار حتى يدخل الحمامات بدون احم ودستور .
اكيد هلئ شي قارئه ست بتقولي يعني انتوا الرجال ما شالله حولكم مقصرين بالموبايلات .
انا برد و باجاوب لا والله !! عشان هيك تركت باب التعليق مفتوح بالمقال بتقدري تجاوبي, وبعدين ليش انا كرجل لازم اكتب عن النسوان ما انا المتضرر هذا من جهه ومن جهه تاني دايما بتقولونا اننا مجتمع ذكوري وبدنا مساواه بس بالعند والمشاكسي بعد ما كنت نصير للمرأه من قبل عصر الموبايلات اليوم رجعت بكلامي اطالب بحقوقي كرجل على الاقل ان اقدر افتح تمي(فمي). وبعدين معاكو.
لننسى حسنات وفوائد الموبايل ونشوف تأثيروا على العائله.
يا المرأه يا الرجل او كلاهما معا نازلين طس وزخ ورغي وحديث عالفاضي والمليان. وانقطع التواصل بينهما الا في مجال المراقبه والتجسس ةالغيره والشك.
مع مين كنتي او كنت كل النهار او الساعه 11 او او او تحكي وليش طولتي تا رديتي علي.ودايما بتصل فيك يا جوزي والخط مشغول اكيد مصاحب علي هاي عشيقتك ها.
مين هادا يا حياتي حرف را او خا ممكن تشرحيلي .
البيت والعائله بتمر بازمه ماليه وعليهم ديون وعدد افراد الاسره 6 اشخاص وعندهم 10 موبايلات وفواتير دفعهم متوفره بس فواتير الكهربه واقساط المدارس واجار الشقه تراكمت ومع هيك ما في حد اليوم بقدر يستغني عن موبايلو.
بتلاقي عدد سكان المدينه شي نص مليون شخص طبعا مع الاطفال والرضع والمسنين وفيها 800 الف موبايل ومستوى خط الفقر نازل بعد الخط الاحمر بشي 20 درجه ومع هيك الناس بتدفع فلوس لشركات الجولات بالهبل وهمي ما معاهم ياكلوا .
بالمقابل شركات الجوالات بتبع هوا والمرابح بالهبل والعروض للمواطنين زي زخ المطر.
اشتري خط و1000 دقيقه ببلاش(مجانا), لانهم عارفين ان المواطن بيحكي 50 الف دقيقه هذا اذا كان رجل اما ست الله اعلم الرصيد مفتوح .ممكن الحديث يبدء يوم الخميس وينتهي يوم السبت.
اشتري خطين بسعر خط واحد.اشتري خمسة خطوط وتحصل على زوجه مجانا.او اشتري 5 خطوط وتحصلي على عريس من الخليج مليان ومعبى.
يا جماعه هادا اليفون 6 +1 جابلي العصبيي والضغط والتوتر العالي لغاية 2000 واط حتى فيوزات مخي طقو وضربو منو.
من يوم ما دخل علينا البيت ضيف مرغوب صار بالنسبي اللي ضيف مغضوب وبالنسبه لزوجتي كيود وحبوب.
كل النهار بتحكي من خلاليه واليه وعليه وعنيه واحي.
ما بكفيش انه جهاز تواصل وحكي لاء وكمان موصول بالانترنت والسكايب والفيبر والفيسبوك والتويتر اللي وترني اكتر و كمان اذاعه وراديو. اذا حضرتها ما حكت فيه هو الاخ بيحكي عن دوله.
اغاني وبرامج وتوك شو واليوم احنا باجواء اعياد واخونا نازل يصدع بجنغل بيرد واغاني ميلاديه هادا عندنا في البيت وبأيد زوجتي من الشباك للباب للصالون للحمام لدرجة اني قررت ان اغتاله(للموبايل).
بالمقابل جيرانا عندهم موبايل خطب دينيه وايات قرأنيه وكل الاسبوع صار كانه يوم الجمعه.
حتى عندما ادخل الحمام يعني بيت الراحه ل5 دقائق بتقلق راحتي.وبتجيني مكالمي من زوجتي الحبيبه رقم 50 خلال ال3 ساعات وبتقولي ليش ما رديت وليش طولت. تفضلوا جاوبوها اذا سمحتوا.
االله يرحم ايام زمان هدؤ الاعصاب للطرفين كان الزوج يروح على شغلو من الصبح ويرجع المسا بدون ازعاج 10 او 12 ساعه. وكانت الزوجه بالبيت كمان مرتاحه.
اليوم الجوال صار زي الردار وين ما راح الواحد كاشفو ومش بس هيك هو وهي من خلال النهار نازلين ببعض مكالمات لدرجة الملل .وعند حضورهم من اشغالهم لبيوتهم لا يتحدثون مع بعض لانهم خلال النهار فقعو ا وهروا بعض مكالمات. في المسا بكون سكت الكلام والبندقيه عفوا والمشاده تكلمت.
ختاما وعذرا لاطالتي بالكلام ولتشتت افكار المقال من كثرة المكالمات التي شتت افكاري.. القاكم...
لارد على هذا ال الو الو من معايا على الخط ؟
اوه المدام كيفك يا روح روحي انشالله بتروحي وبتاخدي معك روحي.

#جان_نصار (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل