أخر اخبار تشكيل الحكومة...الله يخلق والعراق يبتلي..

سامر رسن الواسطي

الحوار المتمدن-العدد: 4567 - 2014 / 9 / 7 - 08:12
المحور: كتابات ساخرة
    

على ذِمة صكَبان ابو الغاز،ومن قلب الحدث،آخر أخبار إجتماعات تشكيل الحكومة الجديده:
حيدر العبادي:يمعودين شنو السالفه،هسه قابل راح نخترع بديل للإنسولين،هي وزارات نقسمها بيناتنه وكل واحد يجيب جماعته بيهه..
محمد الطائي:دولة الرئيس إذا الشغله متوقفه على وزارة الثقافه،فعندي وزيرة تشبع الوادم ثقافه للصبح...
العبادي:خايب إنت شخبصتني،إذا ميزان الكفاءة عندك هو حفظ الشعر فاني حافظ خمس بيوت أبو ذيه واثنين زهيري،والله لا يچذبني يمكن خمسين دارمي...
نائب صدري:المالكي خط أحمر،كلا كلا أمريكا..
نائب من الدعوة:خايب دطير،همزين خليناكم تلبسون بنطرونات...
النائب الصدري:مو على اساس انتوا كنتم تشتغلون بوكالة ناسا،كلكم خَلك رِواديد...
باقر صولاغ الزبيدي:يمعودين شنو أخبار العشه مو كتلنه الجوع..
الجعفري:أخوان هاي اشبيكم،إن السياقات الدستورية وتركيبة الانسان وسايكولوجيته تستدعي التمعن والتفحيص في الفسيفساء المتكون من إنصهار إشعاعات المحبة فيما بين النواة الواحده في معجون محبه مفيد...
واحد كاعد بصفه:حرام إذا افتهمت شي،إنوب يريدون يحطونه وزير خارجيه،شوفوا إذا ما فشلنه كَدام الوادم.
ثاني هَم كاعد بصفه:ياحيف والله الزلمه على تالي شيباته خَّرف....
اياد علاوي:اني ما ادري،بهذيج الحكومة طكَيتولي طابع،فهالمرة اريد تعوضوني...
نائب صدري:علاوي العميل خط احمر،كلا كلا اسرائيل..
اسامة النجيفي:اخوان العراق لازم يظل موحد ولا بد من الوقوف يداً واحده امام المخاطر المحيطه بنا،تنطونه نسبة 40%من الحكومة لو نروح،وحتى عشاكم ما نريده..
باقر الزبيدي:اخوان كثروا لبن بالعشه،وروح أبوك ها إذا مو لبن أكتيفيا معدتي تتخربط...
ممثل ايران:خرب حظي المصخم،يعني من دون جماعتي يطلع اسمي بالعراق "خيلي ممنون هسن روهاني خيلي ممنون"...
مندوب امريكا:ذيس إز سالفه مليوصه وحك هو أبو فاضل،خلي يجي اوباما يحلهه بيده....
علاوي:اني ارجع لبريطانيا احسنلي،هذوله الكلاوجيه كولشي ما يِتحصل منهم،وخلي واحد منهم يقابلني بالفضائيات..
الجعفري:في اللحظات العصيبه لابد من صيرورة مكامن الأختلافات العقليه المعرفيه لواقع مرير تعيشه الانسانية في عالم ميتافيزيقي منفلت..
نائب كوردي:كاكا منو منكم يسكت الجعفري وأنطيه كركوك...

#سامر_رسن_الواسطي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل