والتالي أشلون !

يحيى الحميداوي

الحوار المتمدن-العدد: 4219 - 2013 / 9 / 18 - 15:23
المحور: كتابات ساخرة
    

اليوم الحجي ابو محمد ذايهة روحه وكلش متعكر مزاجه ,حجينا اتفضل استريح خوش شاي وداعتك ,لايبوي ما اكدر وداعتك خربانه يبويه ,ابومحمد هي اليوم خربانه صار سنين حجي لا تعب روحك ,لا يبويه كلش بعد وصلت للزردوم جا بيت السعدون يهجروهم ويطردونهم من الديره عمي هاي مصيبة وطاحت علينه ,حجي بروح ابوك تعال سولفلي جا هسه بيت السعدون وحد عن غيرهم ! ما الناس كلها اتهجرت وانذبحت واتفخخت وانت اتشوف اعيونك ,اول مرة اشوفك متشائم ,سألتني وراح اكعد على مود افهمك شنو بيت السعدون عمي العراق كلّه واحد بس نوبات ألف عينٍ لأجل عين تكرمون , بها ي صدكت حجي ,كعدنه اني وابو محمد وبدأت الملاعق تعزف لحنها الجميل وهي تدور برشاقه ودوما ما يتمايل ابو محمد مع رقصات الملاعق .
-عمي اكلك اهلنا ايكولون الماله أول ماله تالي
- اي والله صدكت يابو محمد
- اركد اشويه خلي اكمل لاتكطع سلسلة افكاري
- صمت وأومأت برأسي بالأنتباه
-اني خلصت سنين من عمري اشتغل عدّ تاجر مال حبوب في البصرة من بيت السعدون ,شفت ليش شاغت روحي وصاعد ضغطي ,اعرفهم زين .
بيت السعدون من العشاير العتيكه وجانو ايحكمون المنتفج عمي من سنين يمكن من 1815 مو جدد بالعراق ولاهم لفوا على الديره ناس اهل اصل وفصل ,عمي اشتغلت وياهم ماشفت منهم الا الزينه يمكن الله لايجذبني 14 سنة وياهم يعمي ما ادري بيهم سنة لوشيعة وداعتك واجتافي للعباس ابو فاضل ,وتالي الشجرة الجان معلكها صاحبي التاجر بيتهم ,ياكلها الدود أعيوني نوبات من ايسوي عزيمة ونروح ناكل يمهم يقراها النه (شنون اليهودي) ابو البهارات ايكول هاي شجرة العائلة مالتهم يرجع نسبهم كلش لحيم (لعلي ابن أبي طالب ) يخوي اظن هم سادة بس الناس راكزين وما يتفنكحون على الوادم .
وداعتك يعمي من ماتت أم شنون اليهودي ثلث تيام واكفين هم وعوايلهم وبيوتهم مفتوحه للخطار , أشعبالك ضوجتي هيج من بطر !
خربت مع الاسف , يرفع أبو محمد رأسه للسماء وتسرق دمعة غفلته لتتهاوى على خده الترف ليستعجل اطراف يشماغه لمسحها متأففا ومنزعج مناديا على (حجية رجوه ) أمي ,بعد أخوج شاي ثاني ترى ماظل شي راح تنكلب,ظلت لذوله الخرده هم من يقرر عراقية العراقي وعراقته لا ولحظ والتوفيق الاسود ,هاي مخطط ومرتب الها يبويه ولحايانه صارت بيد السيبنديه والمزعطه .
حجي لاتنقهر صحتك مايصح ألا الصحيح وداعتك ((أما الزبد فيذهب جفاء ))
-والله يعمي الزين ذهب والمكطم بقى يبويه وسرانه يلحك عشيرة عشيرة وبيت بيت وفرد فرد مادام مجلسهم باقي ورواتبهم وامتيازاتهم عمي هاي تجارة رابحة بلا تعب , أبجي لوشوفلك منصة أصعد بوق عليها وأنت تربح !
حرامية وقتلة وماتقوم قائمة لهذا الشعب اذا ما يغيرهم ويجيب ناس اتحب بعضها وتخاف الله مو طماعة بالله !
أصابعنا أدمنت أسمائهم وأنتمائاتهم تعويذة يفتخر بها البعض باقون ياحجي ولن يغادرو منصات القتل والتهجير هذا ماتقوله المفخخات ,
جا يعمي الموت أولى من هل ذلة !!



يحيى الحميداوي

#يحيى_الحميداوي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات