الدارمي

ميسون نعيم الرومي

الحوار المتمدن-العدد: 3688 - 2012 / 4 / 4 - 02:28
المحور: الادب والفن
    

الــدارمـي
ميسون نعيم الرومي

الدارمي
هو احد انماط الشعر الشعبي العراقي المتميز في جنوب العراق ومناطق الفرات الأوسط

يتكون الدارمي من بيت واحد فقط (صدر و عجز), ومن قافية واحدة , وهو بمثابة قصيدة كاملة تحمل الصورة الجميلة ,والمعنى الكامل المحبب البليغ ,المعبر عن كافة الأنفعالات الوجدانية والنفسية التي تحاكي المشاعر الأنسانية, داخلة الى القلب بدون استئذان
ويمتاز بسلاسة وسهولة حفظه على اللسان العراقي , واستيفاؤه كافة الشروط الفنية والجمالية
تعددت الروايات عن تسمية هذا النوع من الشعر الشعبي العراقي الأصيل و اسمائه المتعددة والتي اشهرها
يقال اطلق عليه اسم الدرامي نسبة الى بلدة اسمها دار مي التي نشأ فيها هذا النوع من الشعر الشعبي

وهناك روايه اخرى تنسب اصل الدارمي الى فتاة من قبيلة بني دارم التميمية في ريف محافضة ميسان جنوب العراق حيث قالت اول بيت من الدارمي انتشر بسرعة فائقة
وظل يردده الناس
وسمي هذا النمط الجميل من الشعر الشعبي ايضا غزل البنات بسبب ان اكثر نماذجه اجادت نظمه النساء للتعبيرعن مختلف العواطف والمشاعر كالشكوى والعتاب والحب
ويمتاز بطابع حزين يدل على القهر والهموم النفسية المأساوية واللأجتماعية الصعبة في حياة المرأة آن ذاك , معبرة به عن معاناتها واشجانها

والدارمي من اكثر الشعر الشعبي صلاحية للغناء السريع لسهولة حفظه وجمال معانيه وسهولة تناغمه مع اللحن


نتلاوه آنه وياچ يا بعد روحي
كافي ولچ بَس مو تعب نوحي

لا بيّه أحمل ضيم لا بيّه اعوفچ
أموتن سبع موتات لو ما اشوفچ

حلوه وسمارچ حار گلبي انجبر بيچ
أعتب على الروح لنه تحن ليچ

يا حلوه يم دگات گلبي خذيتي
آخ الطبع دساس اشمالچ جفيتي

اسحن بگاية الروح انثرها علَ درب
ترعش تريد اتصيح من يمر جدمچ

يَسباح الگلب ! يا دمعة العين
يبستي الفكر والروح ! وچ گليلي أهَلچ وين

مرعدتي الگلب والروح يوم الجفيتي
تاه الفكر والراي لمن مشيتي

خضّر نبع بالروح ! حبچ يَسَمرة
حنيه وفة وطيب ! هم ضوه وگمره

ياحلوه يم شامات طريتي گلبي
يمته الوصال احا ! مو خلص صبري

تدرين الگلب يهواچ يابعد عيني
بسج ولچ عاد مو عفت ديني

هايم وادور عليچ بين الشوارع
شبيده غير النوح الولفه ضايع

ياحلوه گولي شبيچ يَبستي روحي
انتي الهوة والماي ! خو مانسيتي؟

سعفة بمهب الريح خلاني حبچ
ترتعش كل اعضاي من تسمع اسمچ

اليدري يدري ! والمايدري ! حبايب اشمدري
تنهه من الزلل ! غرگان الهامتك بي

من كثر ما ونيت ! ملني الگلب والچبد والروح
والجار شال او شرد ! من كثر ما نوح

رشيدة وسعيدة ! وانوبه غنيمة
لحگيلي خيّه اهلا ! صارت عزيمه

طاير بالهوه الهاب! چنك طبگ ريش
مزارگ عيونك آخ ! متگلي ولك ليش؟

لون الرطب والچاي !عيونك حبيبي
اسمر سمارك حار! چوّه اگليبي

گنطار خستاوي و عسل طعم ياناس شفته
تتغالب النسوان هلبت تضل لفته

دفنو سوة ! الصار, والمستور, والمخفي
فدوة يبعد الروح ! للشد اعمامتة, و گام يفتي

غدار الوكت! ياخية شفتي؟
كلمن حط اعمامته! خو صار ياربي مفتي

تتغنج تسبل العين ! تحچي بزودگ
غمهه امداها الروح ! لو رادت تشوفك

يالماشي گلي ويين ! دايح بالبيوت؟
كون الوكت يندار ! وشوفك تموت

وج الگلب چانون! والهبت ناري
بس الله والعباس! ياخذلي ثاري

هم تلبَس عَليه هدوم ! چذب الچذبته
عند الله هم يضيع! حلف الحلفته؟

اتلوبح اهنا وهناك! كلهن غنيمه
لحگيلي وچ اهلا! يمه نعيمه

افراگك يروحي افراگ! افراگك افراگ
يسحن بگايه الروح! ايكسر ارگاب

صبر الصبرته عليه! يا صبر ايوب
كلب اليخون بساع! ما يگدر ايتوب

من گلبي تطفر آخ تصرخ واصدها
روحي عزيزه هواي مـَگدَر اذلها

چاوينه خويه هلا حلف الحلفته؟
من الله وين تروح يوم النكثته؟

اشمالك تصد كل يوم! تتقصد اتغَـث
شبه المطـر بالصيف! من يـزعل اينث

تتباهه بالشـينـات ! أرجع وشـوفـك
واتلاوه وي الروح! وك مـابـيّ اعـوفـك

بسك بعد عاد ! جورك كتلني
تتحسر عله الآخ! من تون وني

دمعي جره هل سال! لمن عرفتك
لو ادري هيچي اتصير! چا ما عشكتك

من سنه ومن سنتين! احبس حسرتي
لو هلت العينين !اشرب دمعتي

امشابگ ايد ابإيـد ! من تمشي وياي
أهجـس تـموع الروح ! تتـرادف اچـلاي

چاشلــّي بيهـه الروح! والماتريــدك
تتكحل ابملكاك !تـتـوسّـد ايـــدك

أبرل / 2012
ستوكهولم

#ميسون_نعيم_الرومي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل