دمعة علي قبر مصر

أسعد أسعد

الحوار المتمدن-العدد: 3628 - 2012 / 2 / 4 - 23:50
المحور: الادب والفن
    

علي قبرك يا مصر واقف أبكي
و دموعي واقفه في عينيه
و قلبي جوايا مات
هايبكي عليكي و الا عليّ
آهاتي مكتومه في صدري
و زفرتي طلعت ما رجعتشي

آه يا أمي سبتيني ليه أمشي في جنازتك
و أنا كنت فاكر قبل ما أموت
ها أشوف عزك و كرامتك
آه يا أمي سايبه العيال لمين
دول لسه يا أمي صغيرين ...
كِسوِتِك لغيرك و هما يا أمي عريانين
خيرك لغيرك و بطنهم فاضيه و جعانين

ياريت الهرم ما كان
و ياريت أبو الهول أكله الزمان
و ياريت النيل ما جِري
و لا كان له يوم فيضان
و ياريت القمح ما إتزرع
و لا قطن فيكي و لا كتان
و ياريت المعابد ما إتبنت
لا سقف ليها و لا حيطان
و ياريت التاريخ ما كتب
علي بردي و لا حجر صوان
و ياريت منف ما كانت
و لا تانيس و لا أسوان

و ياريت ما عاش فيكي موسي
ولا جالك المسيح هربان
و ياريت ما دخلك مرقس
و لا قامت فيكي كنيسه ولا عبد رهبان
و ياريت ما صلي فيكي مسلم
و لا طلع صوته علي مدنه
ينادي الواحد الرحمن

ياريت ما كنتي يا أمي و لا بقيتي
و لا طالك غدر الزمان
ولا طلع عليكي شمس و قمر
و لا أبدع جمالك الخالق الفنان
يا ريت التاريخ ما كتب و لا سجّل
و لا وصف الراوي جمالك الفتّان
و ياريت ما عشتي في قلبي
عاشق متيم و زفرة آهاتي لوعة الولهان

يا ريتني يا مصر ما كنت إبنك
و لو مصطفي كامل زعل
و سالت دموعه علي صدرك
و سعد زغلول إللي إتقهر
و ضاعت حياته عشان خاطرك
أقول لهم مصر بتاعتكم إنتهت
ما فاضلش منها غير صورك

مصر اللي كانت تدفن غُزاتها في رملها
مصر اللي كان درعها
يهزم جيوش العدو و يصدها
مصر طلع من بطنها
خاين عميل و ذلها
ضحك عليها و زاح ولادها
و قعد هوه و شلته عرشها
قال إن هوّ بطلها و هوّ زعيمها إبنها
حطم جيوشها و ذل ولادها و شعبها
و موّت بلادي و ضيع جمالها و شكلها
و بعد ما كانت تاج فرّط جواهر عُقدها

إمتي يا أمي ترد فيكي الروح
و أفرح بنهضة بلادي و أهلها
و أشوف عيالي و عيالهم
بيغنوا في جناينك و صوتهم يفتّح وردها
يا ريت يا أمي ترجعي جنه
أبني في بطن فردوسك طربتي
و أقول خلاص ...خلاص أموت
أنا شفت مصر رجعت أمي تاني لمجدها

#أسعد_أسعد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل