الغول والربيع

نعمة حسين الحباشنة

الحوار المتمدن-العدد: 3548 - 2011 / 11 / 16 - 08:42
المحور: كتابات ساخرة
    

كانت البداية لما كانوا صغار وبدهم يطلعوا عالشارع أو يعملوا مشاكل وأهلهم يخوفوهم من الغول ؛ كبروا وكبر الغول
وصاروا يخافوا يروحوا على أي مكان بس البابا بيقدر يعمل اللي بده اياه والصغار خايفين مرعوبين بحضن البابا ومشان
الله احمينا ودير بالك علينا وخلينا نشوف بعدين شو اللي صار ...
_ديروا بالكم من الغول الغريب بلاش ياكلكم !! كان طول نهاره يصرخ البابا ...
__ طيب ما حضرتك طول نهارك مع الغول بتاكل وتتعشى وبتسكر معاه ؟؟ كان السؤال و باستغراب ..
_ لا أنا قوي وبعرف أحايله بس انتو لسا جاج طازة صيصان فقس وانا خايف عليكم أنا الاسد اللي بيحميكم أنا القمر اللي منور عليكم ..
والشعب المسكين متخبي بحضن البابا اللي خايف عليه واللي بيحاول يطل من ورا الشباك بتحل عليه لعنة البابا والفيران واللي بيقول أنا جوعان يا بابا بيقله اخرس الأكل معبي البيت ..
طيب مهو الحارس اللي حاطه يحرسنا أكل كل الأكلات وما خلى النا شي !!!
_يعني انت بتتهمني أني سرقت الأكل احبسوه بالغرفة ليتربى هذا ولد عاق ..
ومن كثر الاولاد بينساه بالأوضة العتمة عند الفيران .... كل يوم بيزيدوا الاولاد اللي بيضيعوا بالغرفة العتمة وبتاكلهم الفيران وحضرة البابا قاعد مع
الغول ياكل ويسكر ويلعب شطرنج الاولاد تحت رحمة العتمة والفيران ؛ الاولاد خايفين ومتخبيين عشان البابا ما يزعل
وعشان الغول ما ياكلهم كمان .. وين وصلنا ؟؟ وصلنا عند علاء الدين الشاطر اللي
كان مسجون في الأوضة العتمة لأنه صرخ بوش البابا وقله : انت ظالم تاركنا تحت رحمة فيرانك وانت ابونا المسئول عنا ؟؟
كان علاء الدين كل يوم يطعمي نص صحنه للفيران لصار صحبة هو اياهم وصاروا يخلوه يتفرج
من خزق الباب عالغول والبابا وبدأ يتعلم كيف بيتصرف البابا ويدرس طبايع الغول ليعرف الحقيقة ويوصل للغول ...
__ مادام البابا طول نهاره معاه معناته الغول ما بيخوف !! طيب ليش الغول ما بياكل البابا ؟؟ لازم أشوف الغول وأحكي معاه ... بيقوم بيترجى الفيران
__ مشان الله خلوني اطلع بالليل ووعد مني برجع ...
_لوين رايح ؟؟؟
__ رايح احكي مع الغول !!
_طيب الغول بياكلك واحنا بنحبك ؟؟
__ما تخافوا اتوكلوا على الله وصدقوني انه الغول أحن علينا من البابا والماما ...
هون الفيران بيتشاوروا وبيقرروا انه يعطوه لعلاء الدين الفرصة مشان يروح عند الغول ...
_ مهو هيك هيك احنا محبوسين وهيك هيك قرفنا من البابا وأوامره وهيك هيك اللي عم ناكلهم مو أحسن منا حال لأنه لما
ما بنفذ الأوامر البابا عم ينفينا عجزيرة الملح وهناك بنضل جوعانين وعطشانين لنموت ؛ خلينا نجرب حظنا ...
بيطلع علاء الدين وبيتسحب شوي شوي عند الغول وبيقرب منه ودمعته بعينه والغول بيطلع عليه من طرف عينه عين
مغمضة عين مفتحه بده يشوف شو القصة ... الغول خايف من علاء الدين لأنه البابا كان يضل يحكيله انه علاء الدين
بدوي وجلف وفلاح وما بيعرف الا انه يركب الجمل ويحمل الخنجر ويقتل واذا جاع بياكل البشر وبيقطع الشجر ومجنن
الانس والجان وعلاء الدين خايف من الغول لأنه الغول اللي حكوله عنه واللي رباه البابا يخاف منه ..
علاء الدين يبكي خايف ياكله الغول ؛ والغول خايف من الهمجي علاء الدين !!! هون بيدخل واحد من الفيران صاحب
علاء الدين بيطلع عاكتف علاء وبيمسح عن عيونه الدمعة وبيوشو باذنه .

_كلنا بنحبك ما تبكي انت أملنا انت اللي راح تجيب النا الحقيقة بلكي خلصنا من ظلم البابا ..
بيسمعهم الغول بيضحك ضحكة غبية وبيسأل حاله ؟؟
__عن شو بيحكوا هدول الأغبياء ؟ البابا بيحرسهم وبيحميهم وخايف عليهم شو اللي بيحكوه عن ظلم البابا مهو كل يوم
بيطلع النا تقارير متل الفل وبحكي انه خايف عاشعبه بس شعبه اللي ارهابي وهمجي وحرامية شلة بدو وفلاحين متخلفين
تعب وزهق وهو يعلم فيهم مو راضيين يتعلموا !! والفلوس اللي بياخدها منا عم يصرفها عليهم عشان يتعلموا ومش
كاينين يتعلموا والمساعدات الغذائية اللي بيقول انها عشان شعبه الجوعان وين عم يتروح ؟؟؟ شو في ؟؟؟ شو القصة
؟؟؟شو اللي عم بيصير ؟؟ بيتمتم الغول ...
بيسكت الغول وبيصير يسمع للحكي وبينصعق من اللي بيسمعه وبيقوم فجأة يصرخ بوشه لعلاء الدين والفار انتو كذابين
!! البابا مو هيك , البابا صديقي طول نهاره بيضيفني عنده ؛ بيسقيني وبيهديني اشي صقر بمليون دولار واشي سلسلة
ذهب بنص مليار وقبل يومين كان عرس بنتي اهداها خاتم ألماس ب 2مليون دولار شو القصة شو اللي عم تحكوه ؟؟؟
هون قرب علاء الدين من الغول ووراه كل الفيران اللي اجوا عالصوت والصراخ قام الغول لبد بالزاوية خايف , اتطلع
علاء الدين عالغول وهو خايف وسأله بصوت راجف ...
__ انت متلنا بتخاف ؟؟
رد عليه الغول ..
_ طبعا بخاف مين منا ما بيخاف ؟؟
وكانت بداية الحوار بين علاء الدين والغول ليكتشف علاء الدين انه البابا كان يخوفهم بالغول مشان يحمي حاله ؛ صحيح
الغول طماع بس عمره ما طعمى ابنه أو اخوه الغول للبابا عشان يحمي حاله ؛ كان لما بده يحمي حاله بيجتمع مع الغيلان
وبيحكوا لبعض الحقيقة وبيتشاوروا وبيقرروا كيف يحموا حالهم وبيطلعوا كلهم مع بعض بيقسموا اللقمة بينهم وقطرة المي
عشان يضلوا عايشيين وعشان هيك الغول صار قوي وصار الكل يخاف منه .... ضحك علاء الدين وضحكوا الفيران
وصار الغول يبكي وضلوا يبكي وعلاء الدين والفيران مصعوقين !!!!
__معقول هاد الغول اللي عم يبكي ؟؟ كيف صارت هي القصة ؟؟
قربوا شوي شوي عند الغول وصاروا يطلعوا بعيونه وبقلبهم يحكوا : هاي دموع التماسيح يمكن ؟؟ البابا كان يضل يقلنا
انه "الغول بيبكي علينا " وهو بياكلنا معقول ؟؟
لكن لما قربوا منه سمعوا صوت بكاه عالي ودموعه حقيقية وشعروا انه مقهور عليهم ...
_يعني الغول بيبكي من اللي عم بيصير فينا !!
هون قرر علاء الدين والفيران انهم يمسحوا دموع الغول ويقربوا منه ويضموه ليصالحوه ولما حضنوه بايديهم لقوه
بيحضنهم بسرعة وبحب ما أكلهم ولا حتى فكر ياكلهم وقضوا هديك الليلة مع الغول يحكوا لبعض كل القصص لحتى
خلصت القصص واتفقوا يعرفوا الغول على بقية المساجين في الأوضة العتمة وهون مد الغول ايده على جيبته وطلع منها
كرة زجاجية صغيرة بدور وحواليها خطوط وناس مرسومين وأرقام ورموز وحكالهم
_أنا هلق ما بقدر أطلعكم من الحبس بس أقدر أساعدكم من بعيد وأخليكم تشوفوا العالم من حواليكم كيف عايشين بعيد عن
قلعة الكراهية والعنصرية والغربة اللي انتو فيها اطلعوا وشوفوا !!!
يكتب كلمة صين تطلع الصين وسور الصين وأهلها يكتب كلمة السند يبينوا الفيلة وأهل السند وجبال الهملايا يكتب الغيمة
السودا تبين قبة السما والنجوم يكتب البحر يبين البحر ؛الصيادين ؛حوريات البحر والسمك وصار يكتب ويكتب ويكتب
شو يحكوا اله علاء والفيران يكتب وهم عم يتفرجوا ولما لمح بعيونهم الفرح طلع من تحت السرير كرتونه مليانه كرات
وحكاله لعلاء الدين
_ هدول الكرات مني الك ولكل اخوانك المسجونين بالأوضة العتمة كل يوم راج أجي اساعدكم بالسر عشان تتعلموا ..
__ اخواني بيخافوا منك ياغول البابا حكالهم انكم بتاكلوا البشر حكاله علاء الدين ..
_ طيب هيني بالغرفة بستنى وبحكي معهم من الكرة الزجاجية لتفهمهم القصة وبس يطمنوا ويقولوا الي تعال بجي عندكم ..
رجع علاء الدين والفيران على الغرفة العتمة ومعاهم الكرات وزعوهم عالكل وحكالهم علاء الدين القصة وقرروا يعزموا
الغول عندهم عشان يتعلموا منه ؛ وصاروا كل يوم يشوفوا العالم من خلال الكرة هم والغول وبتعلموا وبينت الحقيقة انه
الغول الحقيقي هو البابا اللي كان ساجنهم وسارقهم وذاللهم عشان يضل راكب على ظهورهم وهون بلشت القصة ...
البابا ما بدنا اياه .. البابا ما بدنا اياه .. البابا ما بدنا اياه .. الغول يخليلنا اياه ... الغول يخليلنا اياه ... كانت صرخاتهم من
جوات الغرفة العتمة اللي صعقت الغول وهزت غرفة البابا ؛ نزل البابا بسرعة يشوف شو اللي عم بيصير لاقاهم حاملين الغول على أكتافهم
وبيصرخوا ..

__ البابا ما بدنا اياه .. الغول يخليلنا اياه

_خون ؛ مندسين ؛ حشاشين ؛ فيران ؛ حشرات ؛ عملاء للغول ... مرتزقة ؛ ناكرين للجميل ؛ أنا اللي كنت حاميكم من
الغول لياكلكم هي جزات المعروف يا شحاذين ؟؟ كان يصرخ البابا وهو يأمر الفئران بالهجوم كالمجنون ليرد عليه علاء
الدين ومن معه

_ (علمتنا الشحادة سبقناك على الأبواب ولما الغول ياخدلنا حقنا منك بنطلب منه يجيب الك حقك منا اذا الك حق عنا واذا
مابدك بتوفر ) لتزهر شقائق النعمان ورود حمراء سقيت بدماء من سقطوا في ربيع الدم ...

#نعمة_حسين_الحباشنة (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات