عبد و حمد و فهد

عبد الرضا حمد جاسم

الحوار المتمدن-العدد: 3302 - 2011 / 3 / 11 - 11:07
المحور: الادب والفن
    

عبــــــد وحمــــــد و فهــــــد
أنه الألوكَلك عبــد.....وأنت تدور غيري
ما عذب الوادم فهــد....عذبهم ونين حضيري
ولمن حمــد هب ينتفض...تراصفله شرطي من جماعة نوري
رحمــــــه عله روحك عبـــــــد*
رحمــــــه عله روحك فهـــــــد*
رحمـــــه عله روحك حمـــــــد*
ونعله عله روحك نــــــــــوري
جم نوري مر بهل بلد ....ياناس ما تكَلولي
نوري سعيد وعارفين والبكر وصدام وعزة دوري
جم بوري شعبي انضرب....وجم مره هدموا سوري
دوري يدنيـــــــــــــــه دوري
ذاك نوري ابن الجلب....والنوبه هذا نوري
شنهوا يربعي إلي جره ورجعوا جماعة نوري
علاوي واحمد جلبي...وعادل وووووووووووووو طرطوري
أعلام...أقوام...وطوايف أو دول وياهوا التلزمه يصيح دستوري
واليدري يدري يابشر بالي جره...وألما يدري صم ديري*
ارجوج ظلي دوري
بلجن بقيه بالعمر ونشوف أم ستوري*
ألمن تناوش هدمها
ويركض بوسط العكَد ويصيح ألحكَولي
يا شعبي لاتسمع كل حجي بس أسمع لقدوري*
جم نوري سولف كَبل وجم سرسي وسربولي
وتذكرت هوسه كَبل:
(يا بغداد ثوري ثوري خلي فلان يلحكَ نوري)
وهميت أ هوس هالوكت وامنعني واحد(ثوْريْ)
ولن هاتف اجاني من ألسمه وجبريل حاجاني
وفرحت يا هل ربع...و مثل الكَبل...جن نبي سواني
وبميانه كلش زايده...حاجيته أو حاجاني
وبيه انه صحت.....خاااااااااااالي متكَلي شنه إلي جَرَه
جاوبني....ولك ما تنجب أو تآكل(خره)
جا همه هسه البلحكم أحسن من الباشا نوري
مديون مات بحسرته
أو وحده يمشط كَذلته
وما مره روغن لحيته
وبيده يسوي مزته.... وكَلاصـــه مو فرفوري
وتذكرت... جنت انه اغني للولد*
(علو...علو...علاوي
يا بابا جانه واوي
حاد سنونه ومتغاوي
ياكل كَمرنه الضاوي.
حيدر...حيدر..حيدوري
جانه فد واحد ثَوْريْ
شايله وصلة بوري
يريد يكسر القوري
هذا القوري الفرفوري)
يا دنيه ظلي دوري...أرجوج ظلي دوري
يا دنيه شنه إلي جره..... ورجعوا جماعة نوري
جم مره خربوا هل بلد وجم مره ضربوه بوري
ذوله عصابة مكَطمه ...وذبان.... بحلكَها يغوغي
عمامه اوكشيده وعكَال
وصايه ودشداشه ونعال
ورباط وسداره وشروال
وفوكَاهن أصديري
ما تركوا الشعبي أكل....او لحكَوه عللزوري
زرعوا زباله بالوطن ومّوتوا كل جوري
وأصبحت بغداد العمر....مجروحه من كل كتر
ويعيث بيها الفقر.....ويحيط بيها الغدر
وهيه تجاوبني بقهر......عليمن تكَلي ثوري
ألي عليه هوست..نوري
والجاي هسه نوري
يادنيه لا تيأسي..أرجوج ظلي دوري
وأمي تبقه تنتظر..ولكاروك شعبي تلولي
هذا الوضع ما مقبول
دللول يبن الشعب..يبني دللول
حتماً دنيانه تصّبح والظلام يزول
بالكَبر.....وروحي عليك تلولي
..................................................................................................
*عبــــــد: يمثل عامة الناس...
*فهـــــد:الرفيق الخالد فهد....
*حمـــــد:يمثل ألنخبه الوطنية....
*أم ستوري:رمز للمرأة البغدادية
*قدوري:مشجع رياضي عراقي صادق صاحب صوت جهوري
*للولد::أولادي حيث كنت اغني لهم هذه الكلمات وهم في ألسنه الأولى في أحلك ظرف خلال الحرب العراقية الإيرانية عام 1986
*....المايدري صم ديري: تحوير للمثل الشعبي(اليدري يدري وألما يدري كَضبة عدس)

#عبد_الرضا_حمد_جاسم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل