مراسيل الكلب*

حامد كعيد الجبوري

الحوار المتمدن-العدد: 3123 - 2010 / 9 / 12 - 00:16
المحور: الادب والفن
    

ردا على الشاعر بشار بن برد الذي يقول
أذني لبعض الحي عاشقة والأذن تعشق قبل العين أحيانا
آنه مو بشار ويناغي الحبيب
وإنطه مفتاح الكلب بيد الإذان
عاشك وعندي مراسيلي تجيب
العين وإذني وأيدي وإشفافي ولسان
***
إعضاي كلها أمفتحه وتمتلك عين
ع الجمال أمن الفجر تصحه وتطوف
أهناك ريم أتوجده وتندله زين
أتأشره وبالليل تُكنصله وتحوف
الروح تخفك تركض وتاخذني وين
الكلب أعمه وروحي بعيوني تشوف
حاير وولهان أكصد يا طبيب
ويا طبيب أبوصفته ينطي الضمان
حتى لو حنظل ومن ثغرك أطيب
ومن لُماك الحنظل العلتي أمان
***
آني أفتيلك حُكم أشرب الراح
وأغتصب قبلات من ثغر البدور
ودير كاسات الهنه الوجه الصباح
وخمرتك كاسرها من ماي الثغور
وأطفي كل الشمع وأخدود الملاح
تضوي وسراج الضوه أبهز الصدور
وبالك أتصحي الفجر للعندليب
والبلابل تصحه وتعوف المكان
إكسر أخماريتك وزيد اللهيب
ومو حرام الخمره من ريج الحسان
***
تغبش الفراشه تتخير ورود
ورده بيضه وحمره تتمايل طرب
أتشم رحيق أبلهفه وتبوس الخدود
هذا خد ريان ذاك الخد عجب
تسكر وتتراكص أبمسج النهود
لا عسل يرويها لا بنت العنب
آنه فراشه وطفل يرضع حليب
ومن رحيق الورد أستلهم معان
والغصن من تهجره الورده يشيب
ويا غصن يقبل يهجره الأقحوان
***
أتشوفني شايب وأفعالي شباب
الروح خضره أتأكد أبكول وعمل
واليريد الورد يصبر للعذاب
والورد يندل مجامينه النحل
ما تهاب النحله لا شوكه وعذاب
المهم يرجع وبشليله العسل
لا تلوم أتأنب وتحسبها عيب
أيصير ضوك العسل فشله أبهل الزمان
أنت قانع وآنه راضي أبهل النصيب
والعمر لليحسبه لحظه وثوان
***
إذن طرشه أنطي للرايد يلوم
أبعقلي راضي والعقل ينعد نبي
آنه مو بيدي الكلب يهوه ويحوم
ومن أريد أمتنع يسبيني سبي
ردت أنصحه عاند وخاصم النوم
أيكول ديني الوصل والحب مذهبي
أحبسته جوه الضلع زاد أمن النحيب
والنحيب أيفرح أفلان وفلان
والشماته علكم وهو اللبيب
وبالدليل أقنعني وبحجته البيان
***
الله واعدنه أبخمر شبه الزلال
وحور عين أتباهي كل نور البدر
أهنا حرام الخمره و هناكه حلال
هي خمره والسكُر نفس السُكر
هو خالقها وأتركها محال
ومن أعوف الغزل ما أكتب شعر
لو يخلي عالكلب مية رقيب
أنه أنطيك العهد وأرهن رهان
أكسب أنه واليراهني يخيب
بالخمر والحور متروسه الجنان
****
* : بناء القصيدة على طريقة الموشح الأندلسي وهي من بحر الرمل ويسمى شعبيا بالموشح

#حامد_كعيد_الجبوري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل