رفض بيع وشره

حامد كعيد الجبوري

الحوار المتمدن-العدد: 3101 - 2010 / 8 / 21 - 15:29
المحور: الادب والفن
    

المقدمه

حب الوطن مو لافته ولا هو شعار ونرفعه
بالوطن باعوا وأشتروا كلمن أبأصله ومنبعه
أمريكا نسجت جم حزب عمله أوجه فد مطبعه
أعيونه يدمعن بالجذب وكرسي الرئاسه مطمعه
والنيته سوده أمبينه مكشوف وأشما أتبركعه
والمايسوكه مرضعه سوك العصه ما ينفعه

القصيده

مليت السوالف والكلام الزور
ياهو اللي تلزمه وعنده سالوفه
أشينفع يا حوار ويا تقارب ذيب
وأوصال العراق أكتاره مريوفه
شي سوّت خنافس شي تزيين راس
وشي سوّت لحايه وطولت إزلوفه
شي تضرب سناسل شي تطبّر هام
وشي كصرت أثياب وتنكر أدفوفه
أشما تعبد أبكيفك والله ما مغتاظ
ولا ألساني يكلك مذهبك عوفه
يا عملة الكوفه أنجان مره أتصير
شو صار العراق أبمية ألف كوفه
طوبه أتقاذفوها آل أبو أحزاب
وجدامك شعبنه تصفر أجفوفه
***
جم لا فته أنرفعت جم أسم موهوم
السيد مدري ياهو اليكتب أحروفه
باعوا للوطن ويلاده رخص أتراب
ولساع الأمم طلاب بصفوفه
أعلنها وأصرح وأكشف المستور
أحجيها أبصراحه وأنزع الخوفه
إذا بعتوا الوطن هيهات ما ينباع
من موصل البصره أرواحنه أتحوفه
***
ركضتوا عالمناصب أكلة العميان
وعفتوا للشعب غركان بجروفه
مطره سلمتلك بيت وأشما بيه
أشما حوسمت مطره أبيتها أتحوفه
الحمايات الجحافل ألوية وأفواج
وأيدين الفقير أبفكره مجتوفه
بالمنطقه السوده 1 يم الأمريكان
تركض بس يأمرك عينه أتشوفه
سولف للطناطل تخدم الأوطان
تخدم يا وطن بفكار محروفه
يصحاب الجناسي مثنى وثلاثه
والرابع طمغته أمبينه مكشوفه
شد ظهرك الكرسي منك أيبوكوه
وبس تزلف أعيونك صفحته أيلوفه
العكارب ما أبري (أمريكا) ربتها
بالوعة قذارة أشيضبط أسكوفه
بين الطائفية وبين كرسيكم
يحد الأجنبي بركابنه أسيوفه
***


1 : المنطقه السوده : إشارة الى حي الخضراء

#حامد_كعيد_الجبوري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل