نسمات حليه

حامد كعيد الجبوري

الحوار المتمدن-العدد: 3051 - 2010 / 7 / 2 - 23:38
المحور: الادب والفن
    

الحله غابه من الشجر والياسمين
ومن تريد الطيب شمهَـا الحله
أيسير أعليها المسه نهر الفرات
تارس أشليله الورد والدهله
والنواعير أبحضن ميهه تبات
أمديرمه الشفتين عين أمكحله
وبشواطيها الشمس تنزع الثوب
تغسل أزنود وتمشط كذله
وبليالي الصيف تـنزل للسطوح
للنجم تحضن وتـنصب كله
والبلابل تلبس ثياب الصباح
أبريحة القداح تجمع سله
(نعيج ماي)1 ويلعَب أيضَحك الماي
يركب الروج الفجر يتسله
والزواجل تعله وأسراب الحمام
تطير حره ولاجنحها أتشجله
وشارع العشاك يتـنطر حبيب
وصدر كل ورده تطوف النحله
والكمر ينزل على الحله ويمر
على الفقره وكل عكد يندله
سهر عدها الليل تعبان وينام
ترس عينه ولا ينام أبوجله
والمطر يغسل صبر كل السنين
أيجيبه للـيزعل يصالح خله
تفرش حديثات يم (بت الحسن)2
خد ترافه وعين كوز ونبله
أبهيده مجداف البلم ياكل الروج
أمدولبه الموجات صعبه وسهله
و(حسن نمج)3 بالنهر ذب الشباج
ويرجع بشكبان من مال الله
أبيوت طين وتضحك أبوجه القصور
والقصر ما فتَح بابه وهله
أبيوت مفتوحات للحب والأمان
أبساط ووجاغ ومضيف ودله
أطفال عكد(الشيخ والسرحه وبيات)4
أندك على البيبان نلعب ختله
زغار نلعب دعبل ونطفر كمر
أجعاب والشاطر يّرجع حله
الحله شجره أغصانها تعبد آله
واحد السجدت أله كل مله
أغصان جوري ورازقي وشبو وعطور
أبميها تروّي وبشجرها أتظله
الحله موطن علم منبع للعراق
الحله للينتسب ألها أتعله
(الحلي وأبن أدريس وأبناء النما
وأبن طاووس)5 أبفضلها أتحله
الحله أم (الصفي)6 وبحكها يكول
غبن عمره المانظرها أبمقله*
الحله مانامت ولاترضه أبهوان
ولا تمد أيد وتبايع ذله
مرها جم (عاكف وحجاج ويزيد)
لاأثر ظل وذكرهم وله
جاورت (حيدر) وجيران (الحسين)
فراش للحبها وعدوها أتسله
*****

:طير النورس ، 2: مرقد يقع على النهر مباشرة ،3:صياد سمك 4: طرق في محلة الورديه 5 :مراقد علماء 6،:الشاعر صفي الدين الحلي الذي قال البيت*(من لم ترى الحلة الفيحاء مقلته ، فأنه في أنقضاء العمر مغبون)

#حامد_كعيد_الجبوري (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل