جهاد علاونه
الحوار المتمدن-العدد: 2724 - 2009 / 7 / 31 - 09:49
المحور:
كتابات ساخرة
- إسمعني, يا أبو علي
- -حاضر, أنا سامع, وصوتك حلو وبجنن وبطير العقل, أجمل من صوت فاتن حمامه.
- شو رأيك إنغير إدهان البيت؟
- إكويس إدهان البيت لازم يتغير على شانه صار قديم والواحد من المفترض فيه إنه يواكب العصر إللي هو فيه , أنا مع التغيير, أنا مع سياسة التغيير.
- بس أنا متردده ومش حابه أستعجل بقرار تغيير إدهان البيت , بعدين أرجوك لا إتسيس كل شيء , أنا بحكي عن موضوع إنت فاهمه إمليح , أنا بحكي عن الدهان .
- صح لازم تتريثي على شان في التأني السلامة وفي العجلة الندامة, بعدين أنا فاهم شو بتقصدي , أنا حافظ كلماتك ومعانيها , وأعرف ماهو المقصود بالتغيير.
- أنا من رأيي يا حبيبي , إني أدهن المنزل إدهان في تطبيع دهان حديث من هذا التطبيع , شو رأيك؟
- -عظيم أنا مع سياسة التطبيع , التغيير يجب أن يكون في صالح التطبيع ,أنا مع التطبيع من المفترض إنك تدهني منزلك دهان تطبيع التطبيع, جيد في المنزل , وأنا مع المنزل المُطبع بالتطبيع.
- في ناس بحكوا إنه دهان التطبيع مش كويس بزغلل النظر , وبعدين ما فيش فنيين عندهم القدرة على التطبيع.
- صح يا حبيبتي أنا من رأيك , الفنيين إللي عندنا كلهم بتنقصهم الخبرة في فن التطبيع , يعني كل المفاوضين في المفاوضات مع الجمهورية الإسرائيلية كانوا لا يفهون شيئاً في التطبيع أهم شيء أن يعدوا أيامهم في المفاوضات ويوخذوا فلوس دولارات , ويحضروا معاهم من أوسلو فساتين لعشيقاتهم وزجاجات عطر فاخرة , أنا ضد التطبيع إللي بمارسوه بعض الفنيين غير المؤهلين بالخبرات.
-يا زلمه شو دخل إسرائيل ,أنا بحكي عن موضوع مختلف تماماً,طيب شو رأيك اليوم أنا وإنت إنروح نسهر في حديقة تونس؟
- جيده السهرة في حديقة تونس والله إنك جبتيها الواحد زهقان ولازم يغير جو.
- أو بلاش يا زوجي العزيز إنروح على حديقة تونس شو رأيك إنروح على مكان آخر؟.
- صح..إلحديقة التونسية أنا أصلاً ما بحبش أروح عليها بس على شانك يا حبيبتي إنت إقترحتي إنروح عليها, بس وافقت على شان هيك , أصلاً ما فيهاش المناظر إللي إبتعجبني كل الأشياء فيها إكلاسيكية , إنتِ إقترحيلك مكان آخر.
- أنا؟ ...ما في في بالي مكان, إقترح إنت مكان, أحكيلك؟ شو رأيك إنروح على حديقة طارق؟
- يا سلام والله إنك جبتيها حديقة طارق مكان حلو إكثير.
- -بس حديقة طارق بعيدة جداً وأنا حابه أروح أتنزه في مكان قريب , مشي على الأقدام.
- فعلاً إلواحد بحاجهْ للمشي على الأقدام أنا بالنسبه لي بطلت أحب ركوب السيارات , وحديقة طارق بعيده إكثير , إحنا لازم نطلع ونشم الهوى في مكان قريب .
- أصلاً إليوم يا زوجي أزمه إكثير ولازم إلواحد يجلس في البيت على شان الهدوء في البيت أفضل من الضوضاء والإزعاجات إللي بتصير برى , صح؟
- صح وعندك حق , أنا في الشوارع المنتشرة فيها السيارات والناس ما بحبش أطلع وأمشي لا فيها ولا في الزحمه.
- خلينا نرجع ونناقش موضوع التطبيع.
- فعلاً لازم إناقش موضوع التطبيع , أنا بحب التطبيع .
- -أنا يا زوجي بقصد التطبيع مع اليهود, فعلا أنا بقترح التطبيع مع اليهود.
- طبعاً وأنا كمان بقصد التطبيع مع اليهود, هو في أحلى من التطبيع مع اليهود لا إتفكري إنه فكري راح بعيد عن الدهان (دهانات التطبيع) لالا أنا فاهم الموضوع كويس, وعلى شان إلحيطان ليها أذان ,لازم نحكي بالسر.
- يازلمه مالك إنت صدقت , أنا شو بفهمني بالسياسة؟! أنا بمزح معك أنا فعلاً بقصد التطبيع (تطبيع الدهانات).
- هههه بتفكريتني مش عارف إنك إبتمزحي , أنا أصلاً بحبش السياسة كلها , أنا فعلاً بقصد تطبيع بيتنا ودهنه وطلائه بدهانات تطبيع.
- إحنا الآن في منتصف فصل الصيف ولازم إنأجل موضوع الدهانات والتطبيع, خليها لبعد ين على بداية الشتاء, شو رأيك؟.
- - أي هو في عندي رأي أحلى من رأيك , رأيك كله حكمه وعبقرية , أنا مثلك بقترح تأجيل الموضوع , وخصوصاً التطبيع بشكل عام.
- يا زلمه شغله غريبه , أنا كل ما أحكي رأي بتوافقني عليه , ليش ما إتعارضني؟
- أنا أعارضك؟! أنا الشعب..أنا الأغلبية الصامته عندك وعند الحكومة ,وعند الله , أنا لا بعارضك ولا بعارض الحكومه ولا بعارض الدين ,أنا ما بحبش لا المعارضة داخل منزلي, بس بحب اليسار , أنا بقدرش على زعلك , ولا على زعل الحكومة , ولا على زعل شيوخ الحارة ,وكمان بقدر أزعل الحكومه وأتفاهم معاها , ومن الممكن التفاهم مع شيوخ الحارة في بعض المسائل , بس إنت والله صابون نابلس ما بنظفني منك , كيف بدي أتفاهم معاكِ!؟ , و فعلاً رأيك مقبول , أنا لازم أعارضك , إقترحيلك شيء على شان أعارضك فيه, خليني هيك مره وحده في حياتي أسب وأشتم وأتصرف كالرجال .
-ليش إنت مش زلمه؟
-بصراحه , ومن غير ما تزعلي ؟ أنا زلمه مع كل الناس وقد حالي بس معاك المعركه دائماً تنتهي بصالحك وأنا الخسران الوحيد.
- ماشي يا حبيبي , بدي أروح عند أهلي شو رأيك؟
- -لالا أنا ما بدياكي إتروحي على أهلك.
- - ليش ؟
- من غير ليش(ليه)أنا حر .
- شو إنت كاين على راسك ريشه؟
- أيوه ما أنا حكيتلك ما بديش أعارضك على شان ما يصيرش في البيت مشاكل.
- ليش أنا كاينه بخلق المشاكل ؟
- لالا بس المعارضة بتخلق المشاكل.
- لالا يا حبيبي إنت زلمه هسعه بينت على حقيقتك, إنت كاين إمخبى بقشورك, أبصر والله العليم شو شايف على النت , إلك شهر مش طبيعي , وأنا جوزي وبعرفه .
- يا حبيبتي إقشورة شو وبطيخ شو , أقلك خلص روحي على إهلك.
- آه شو يعني بتعاملني على قد عقلي , ليش أنا عقلي ناقص.
- لالا بس خلص طالما إنها هاي رغبتك خلص روحي على أهلك اليوم.
- إبتعرف إني تعبانه إليوم إكثير ولازم أنام بكير, أنا إتعبت اليوم من الشغل في البيت.
- فعلاً إنت لازمك إشوية راحه, شغل البيت كله هلاك, الله يعينك .
- بس بدي أنام وكمان إشويه بصحا وبشوف شو بدي أساوي.
- آه إلنوم ضروري للجسم , حكوا عنه إمبارح في التلفزيون إنه النوم جيد وضروري لراحة الأعصاب, وخصوصاً إذا نمت للأبد ههههبمزح معك لا إتصدقينيش.
- وإنت كمان يا حبيبي لازم إتنام, إنت مش تعبان؟
- أنا آه تعبان جداً وبدي أرتاح, لازم أنام(أنا مو تعبان أنا دنيا من التعب).
- بس قبل ما إتنام يا حبيبي روح إشتريلنا إشوية خضره وفواكه وتسالي , يمكن إنت مش تعبان قدي .
- أنا فعلا ً تعبان , بس مش إكثير قدك , هسع بطلع على السوق وبشتري كل شيء بدك إياه.
- أحكيلك؟ خلص نام وارتاح بكره بنجيب كل شيء , بطلع أنا وانت على السوق وبنشتري كل شيء,شو رأيك؟.
- يعني شو هو باقي السوق بده يفل أو يطير , مش ضروري إليوم نشتري الأغراض بكره إبنشتري, خلص رأيك هو الصواب.
- يا زلمه عن جد زهقتني إنت كلشي إموافق عليه , يازلمه إقترح شيء إحكي معي زي ما بحكوا إلزلم مع نسوانهم .
- شو بدي أحكي معاك ؟ إنت إحكي وأنا بجاوبك, بعدين مليون مره حكيتلك أنا بحبش أكون لا رجل ولا زلمه ولا زول ولا ريال ولا مان ولا مينز.
- يا الله!!! والله إنك إطلعت روحي , إحكي عن حياتنا عن الحفله إللي حضرناها الأسبوع الماضي, إحكي معي زي ما بحكوا الزلم مع نسوانهم , والله بعده فستان العروس بيجي إبالي .
- آه فستانها كان بجنن عليها وجسمها حلو ولبيس, في أجسام حلوه ولبيسه شو ما لبست بلوق عليها .
- أنا حكيت الفستان , ما حكيت العروس, العروس كانت ناصحه إشويه وبطات إجريها كبيرات وفيهن دوالي ظاهرات , هيك عروق خضر كانن واضحات.
- صح هو الفستان كان حلو (إلقالب غالب) , العروس كانت ناصحه جدا , وبطات إجريها مقرفات , هذول كلهن هيك هي وخواتها , هذا وراثه كله من أبوهن, أبوهن هيك.
- لا شو أبوهن هيك , أبوهن من قرايب (بابا) هذول طالعات لأمهن , كل الخوات طالعات لأمهن.
- آه فعلاً صحيح أنا إنسيت هو أبوهن الله يرحمه كان لطيف جدا بس أنا إنسيت على شاني زمان ما شفته من مات تقريباً من خمس سنوات , آه والله إنك ذكرتيني فيه ,إجرين أم العروس إعراض إعراض إكثير , كيف فاتتني هاي النقطه؟.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
