حوار ممل يومي بين الناس

جهاد علاونه

الحوار المتمدن-العدد: 2706 - 2009 / 7 / 13 - 08:01
المحور: كتابات ساخرة
    

سمعتُ مرة هذا الحوار الذي دار بين رجلين , وهو نفس الحوار الذي يدور بين الناس في المجتمعات العربية , فكله تقريبا كلام فارغ وغالبيته مستهجن ومستغرب , وبلا جدوى ويخلو من الفيتامينات اللغوية , أرجو أن تسمعوه وتقارنوه بين حديث غالبية الناس :

- مرحبا.
_أهلين .

- وين رايح ؟

- أنا ؟

- آه يا زلمه إنت .

- أنا والله رايح على السوق.

-آه..

-آه.

--ماشي.

-ماشي .

-والله وقفتك على شان أسألك هاظا السوآل .

- ليش؟

-والله على شان كنت إمفكرك رايح على السوق على شان أنا كمان رايح على السوق, وإنت كمان ؟

-أنا ؟ آه والله رايح على السوق.

-رايح على السوق؟

- آه ..لا والله رايح على السوق.

-كيف حالك إنت, شو في بالسوق ؟

- والله رايح هيك أتمشى , والله كله نار , الخضره نار واللحمه نار والوعيه(الملابس )نار , والله الواحد ما بسترجي يمر من السوق ومعاه ولد من أولاده .

-آه بدك تتمشى , يلله مليح ما هو كله أصلاً زهق في زهق , بعدين والله كله زي ما قلت نار , الله يسترنا من تاليها , رفعوا الأسعار كلها , بس الحمد لله .

- آه الحمد لله ..والله الواحد زهقان , بطلع هيك حتى يشوف وجه ربه , وانت كيف حالك , هسع مالنا ومال السوق , إنت كيف حالك؟

-أنا ؟
-آه إنت .
-أنا الحمدُ لله إكويس إمليح ماشيه أموري نشكر الله الحمدُ لله صافيه وافيه, داحلين ...ماشيين ..متوكلين على الله , شو بدنا إنساوي... , هاي ربنا وهاي حكمته , أحسن من هيك عبث , أحسن من هيك حياه وعيشه ما بنلاقيش ..كله إفرنجه إبرنجه , هينا إبنوكل وبنشرب , والحمدُ لله على شمة الهوى , كلها عايشه , والله لكلاب(لجلاب-لشلاب) شبعانه خبز , بعدين كله رزقه بيجي معه .

- أه والله إنك زلمه صادق والله يا عمي كله رزقه بيجي معه .

-يعني هاظا شغل رب العالمين هاي حكمته إحنا إبنقدر نعترض على رب العالمين؟ والله يا عمي كذب والله ما إبنقدر , والله كله مكتوب ومقسوم , والله مقسوملي ألقاك اليوم بالطريق , ولقيتك, ولو ما كان مكتوبلي ألقاك والله العظيم ما بلقاك .

- والله إنك صادق , يا زلمه هو رب العالمين كاين برعى إبناس بقر؟! ما هو عارف في تحتيه بني آدميين, والله يا عمي ما برعى إبقر , والله عارف وشايف وكاشف كلشي.
-آه والله يا عمي كمان كاتب كلشي , ومثل ما إتفضلت هو كاين برعى إبقر ؟


-لالالا شو برعى إبقر , إستغفر الله العظيم , يا رجل , قول الحمدُ لله , قولها .

- بعدين واللله يا رجل زمان ما شفتك , شو أخبارك ؟ شو بتساوي, شو عامل , بعدك بتحبها ؟ لصاحبيتك قيت الخليج؟

-آه يا بلد خليها بالقلب تجرح ولا تطلع برى وتفضح , وانت شو وين أيامك ؟

- والله زي ما إنت شايف , بعدني على حطت إيدك , عيني إتشوف ورجليه وقوف , والحال كله من بعضه , نشكر الله نحمد الله الحمد لله على كل شي, صافيه وافيه , والناس كلها مثلك مثلك ,صح؟

- أه والله يا عمي كلها مثلك مثلك, بس والله في إشي أهون من إشي .

-آه والله في إشي أهون من إشي , أقل ما فيها الواحد عنده دار يسكن فيها .

-آه والله الواحد عنده دار يسكن فيها , شو بدك إتساوي , هسع إتفضل معي .

-لا والله شكرا مستعجل بدي أروح .

-شو وين بدك إتروح يا زلمه , صارلنا ساعه بنسولف معاك وبتسألنا وبنجاوبك وبدنا نسألك , نسألك هيك عن حالك وحوالك شو إمساوي؟ شو إبتعمل في حياتك,
إشتغلت؟ ما إشتغلت ؟, وين بتروح ووين إبتيجي ؟ مع مين إبتقعد؟ شو بتساوي في هالدنيا التعبانه ؟
-آه والله إنها تعبانه .
- سولف يا زلمه شو بتساوي ؟
- والله ألله وكيلك من الدار للجامع ومن الجامع للدار , وبطلع قبل المغرب بقعد ورى الدار تحت الزيتونات , وبعدين بروح بصلي المغرب وبرجع على الدار بحط راسي وبنام.
- يلله إمليح إكثير أهم إشي بالدنيا الصلاه, أحسن لك من لقعود , أي هو لقعود شو بساوي ؟
- طبعاً أهم شي بالدنيا الصلاه .

-آه والله أهم شيء في الدنيا الصلاه.
- آه أهم شي الصلاه , أصلا ً هي الفرق بيناتنا وبين الكفار , همه بتفكر مش عارفين إنه إحنا على صح ؟

- إه إه هلا والله , قال مش عارفين ! طبعاً عارفين ونص , همه لو يعرفوا إنه إحنا بنصلي صلاة الفجر بالجامع زي صلاة الجمعه صدقني كان من الصبح تركوا أفغانستان وفلسطين والأندلس وهربوا .

- طبعاً بهربوا , الصلاه هي الفرق بين المسلم والكافر , هسع شو الفرق بين المسلم والكافر غير الصلاه؟

- آه والله الصلاه , طيب شو وين بدك إتروح يا زلمه شايفك مستعجل .

- لا والله بدي أروح على السوق .

- آه والله إنك قلتلي , والله أول ما شفتك فكرتك رايح على السوق.


- لا والله رايح على السوق .

- شو في بالسوق ؟ شو في مافي ؟

- والله ألله وكيلك السوق كله ما في إشي , بس الواحد هيك بده يطلع زهقان الواحد حاله كلها .
- آه والله إشي بزهق , طيب ما بديش أعطلك , روح كما مشوارك .

#جهاد_علاونه (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات