خلف الدواح سفير فوق العاده ال .......................... ؟؟

ناصر الياسرى

الحوار المتمدن-العدد: 2366 - 2008 / 8 / 7 - 00:38
المحور: كتابات ساخرة
    

مر خبر افتتاح ممثلية محافظة النجف فى اربيل وكذالك افتتاح ممثلية مدينة اربيل فى محافظة النجف مر مرور الكرام ولم يتم التعليق عليه لربما لغايه فى نفس يعقوب أوربما غطى على هذا الخبر احداث تمرير قانون مجلس المحافظات والتداعيات التى برزت بعد هذا الاقرار .. كل هذا واشياء أخر جعلت من هذا الموضوع الخطير والخطير جدا يمر مرور الكرام !!

ولكن صديقى خلف الدواح كسر حاجز جدار الصمت واتصلى بى من اربيل قائلا :



_ ألو كاكه علويه شلونج !!

_ العفو منو حضرتج ؟؟

_ شنو ... أنتى ما عرفتينى .... آنى احاجيج من الاربيل ؟؟

_ لاوالله ولا زغرن بيج ..... منو !!

_ يمعود سيدنه ...... شبيك قابل محشش ... آنى خلف الدواح البرزانى ؟؟

_ ولك خلف النعل اشو اليوم ترطن كردى بهديانى .... شنهى السالفه .. بس لا غيرت جنستك من مجوسى الى جحش كردى ؟؟

_ أفه عليك سيدنه ... جا هيه بقت عليه .. اشو خمس ترباع اعضاء البرلمان يقبظون من كاكه مسعود و المام جلال بدأ من مثال الآلوسى ومرورا بالمشهدانى وانتهاءا بالبروليتارى للكحف حجى حميد البياتى ... جاى هيه يم بن عمه ولبست ألباسه من بلابوش لبسان ؟؟!!

_ هسه خصم الحجى ... انته وين ؟؟

_ سيدنه ترهدن بالرحمن ... اشو انته صاير مجدى وعليجته قديفه ... لو جماعة كاكه مسعود الطالبانى ملولحيلك بعظمه ... لو بطل عصريه ..... ما جان مدحتهم بمقال يشك شك !!

_ ولك خلف الدواح آنى ما ابيع قلمى ولا بلدى ولا اساوم على المبادئ

_ طييييييييييييييييييييييييط ... خوش مبادىء أبنطرونك

_ ها يا ليش .... تضر ........................... ما عاجبك حجيى ؟؟

_ شوف سيدنه اخاف تجى لأربيل تكدر تمر على ممثلية النجف الاشرف بالمدينه لأن آنى صرت سفير فوق العاده لمدينة النجف!!

_ شتكول خلف ..... صرت سفير فوق العاده للنجف ؟

_ نعم مولاى ... ليش انته نايم ويه جماعة أهل الكهف ... متسمع اخبار تقارير .. متشوف قنوات فضائيه معتبره مثل الفرات الكوثر الانوارالزهراء اهل البيت المسار آفاق وهلما جرجرا على كولة سيد كائنات ؟؟

_ حبيبى خلف .. تره راح أنسطر .. فهمنى .... وحده وحده ... شنهى السالفه ... شنهى سفاره ... شنو انته سفير فوق العاده ؟؟؟

_ مع كل الاسف مولانه .... صحيح انتهم الساده كلكم نص ردن وملتهين بالبوك والغلمان و الخمس وبزواج المتعه لكن هذا لا يعفيكم من متابعة اخبار الساعه .. مثل زيارة السيد عمار الحكيم لمصر وسوريا أو مثلا جولات السيد الحكيم الاب المكوكيه بين المحافظات يتفقد رعيته أو مثلا خطب الجمعه للسيد الدنبكجى ( العفو القنبنجى ) او سماع طرهات الشيخ الصغير جدا !!

_ والله يا خلف تريد الصدك .... ملتهين نركص وره اللكمه ... وما عندى مجال متابعة اخبار الجماعه

_ زين سيدنه انته ما سامع القول البليغ القائل .... من ماتت ولا يعرف أمام زمانه .. مات ميتت الجاهليه .. تعرف منو امام زمانك يا سيد لكو ؟؟

_ لا والله !!!

_ الله يعمى عيونكم يا علمانيين يا فجره يا كفره يا زناديق يلماتستحون على نفسكم

ان أأمئة زمانكم هم اعضاء المجلس الاعلى وفيلق بدر ... فردا فردا .. ودونهم لا يرتجى منهم خيرا .... هم قادتنا فى الارض وفى السماء وهم الذين يشفعون لنا فى يوم القيامه عند رب العالمين ومن جاء وليس فى يمينه كتاب تأيد من المجلس الاعلى او من بدر فهو من القوم الكافرين !!

_ يمعود خلف ..... خوفتنى ... أرجع على سالفة السفارات رحمه للوالد !!

_ مولاى

_ مولاك هادى العامرى !!

_ ذكرتنى بهداوى العامرى ... شفته شلون يمشى وره السيد عمار اثناء زيارة السيد لسوريا .. جنه ديج هراتي ... عمى شخصيه معتبره ... هيه كوه ... وفوكاهه يحجون عنه الاسرى العراقيين بأيران ويكولون جان يعذبنه ... عمى هذا الوجه الايمانى الربانى مال تعذيب .. احلفك بشهيد المحراب ...مو مال ركص وطك أصبعتين وتحشيشه تالى الليل ؟؟

_ خلف ارجع على موضوع السفاره بداعة العجوز

_ عجوز بعينك ... عمى مرتى شنونه بعدهى شباب خاصه من لبست الشروال صارت مثل مارلين مارلو اثناء صفحة الغدر والخيانه !!

_ يا خلف مو كلنالك اترك كل المواضيع وسولفنه على موضوع السفاره

_ تدلل سيدنه وانته على الراس والعين .... شسولفلك من رفعو علم المجلس الاعلى على سطح السفاره وكامو اعضاء السفاره يلطمون ويهوسون .. ماكو ولى الا الحكيم وعمار يصلح كزعيم ...... حكيمنا ولينا ... عمار حبيبنا ... زعيمنا

_خلف ليش ما رفعتو علم العراق على سطح السفاره ؟؟

_ سيدنه شنو علم العراق .... هذا علم اقليم الوسط والجنوب الناس خل تتعود اتشوفه على الدوائر والمقرات الرسميه ... باجر عكبه .... نعترف بكردستانية كركوك وجماعة الكرد يعترفون باقليم الوسط والجنوب وابوك الله ريحمه !!

_ خلف لاتخبلنى ... شغلة كركوك مبيوعه للجماعه ؟؟

_ سيدنه على كيفك .. قابل كركوك ما الخلفوك ... بدل شعاركم نفط العرب للعرب نرفع شعار نفط العرب للكرد وطز بالعروبه والعرب .. ومن عين باجر نفتح ممثليه بكركوك ويمكن ارشحك للسفاره اذا صرت خوش آدمى وتترك أمكسراتك .. مثل عروبة العراق ووحده العراق والعلمانيه وطيز لكن جعب أبريك !!!



_ خلف انته مقتنع بهذا الحجى مالتك .... يتم اعلان اقليم الوسط والجنوب ويتمزق العراق بين الشعوبيين وادلاء الخيانه والجحوش ؟؟

_ مولاى .. ما راح يتمزق بل كل طائفه تأخذ حقها الطبيعى من ثروات البلاد أوحق تقرير المصير .. أن جان كردى او شيعى مظلوم !!

_ ولك خلف من ظلم الشيعه غير انفسهم .. من الحارب ايران ونهب الكويت غير الشيعه ... من دافع عن صدام غير الشيعه .... من قمع الانتفاضه غير الشيعه .. من صار وكلاء امن بالمجان غير الشيعه .. ولك احنه وره كل المشاكل وتكول مظلومية الشيعه ؟؟

_ على اى حال سيدنه .. تريد ارنب اخذ ارنب .. تريد غزال أخذ ارنب !!

_ زين وانتم وين وصلتم لحد الان بخصوص اقليم الوسط والحنوب ؟؟

_ سيدنه ليش انته مارايح للنجف لو لكربله ؟؟

_ نعم .. نعم .. رايح للزياره

_ يا زياره سيدنه .. اصلا انتم العلمانيين كفره وزنادقه وينكم وين الزياره

_ على اى حال أكمل حجيك

_ انته ما شايف اشكد سيطرات بالطريق ؟

_ نعم أهوايه

_ وكل سيطره .. تنزل الركاب وتفتشهم

_ هذا صحيح

_ وتطلب منهم هوياتهم ... وتسألهم من يا محافظه جايين

_ نعم

_ وفى بعض الاحيان اذا واحد هويته من مدينة الصدر ما تسمحله بالدخول للمدينه

_ نعم حجيك مضبوط

_وبعد ايام ما راح نسمح بدخول المدينه الا بطلب مسبق .. وبعدهه نطلب ورقة مصدقه من فيلق بدر او المجلس الاعلى ... وبعدهه نطلب جواز سفر من الزائر وبعدهه ما نخلي واحد يدخل المدينه الا بفيزه مصدقه من السفاره الايرانيه فى بغداد .... وكل هذه الاجراءات حتى المواطن يستوعب الامور ويكون مستعدا لتقبل الامر الواقع ونغلق الحدود ويتم اعلان أقليم الوسط والجنوب !!

_ شوف خلف الدواح البرزانى الايرنى البربرى الكردى .. عمرك ما راح اشوف هذا اليوم ... وسترى عمائم الخيانه والذل وهى تطفوا على المياه الآسنه

وسيبقى العراق عربيا موحدا يتساوى فيه العربى مع اخاه الكردى والتركمانى والكلدوأشورى والمسيحى مع اخاه المسلم والصابئى مع اخاه الأيزيدى الكل يعيش بحب ووئام فى ارض الأنبياء السلام

وسيعلم الذين كفروا أى منقلب ينقلبون

[email protected]

#ناصر_الياسرى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل