أنا اسمي درويش وشهرتي مفاصص !!

طلال الشريف

الحوار المتمدن-العدد: 2154 - 2008 / 1 / 8 - 08:30
المحور: الادب والفن
    

ركبني زماني ثور/ثورة -
معصوب العينين بيدور بساقية
ومن تسعين عام والثور/الثورة -
يدور وأنا فاتح عيوني
لحد ما دروشت
ودخت وذبلن جفوني

أنا اسمي: درويش
وشهرتي مفاصص
واسم أبوي: جابر
وشهرتو لايص
وعيلتنا: دار متعوس -
فرع من عرب المتاعيس

حملت عزالي من بدري
واللي يدري يدري
ومن زود العزة
قعدت بغزة
وخلفت اثنين من المناحيس
واحد في حزب الوطن طوالي
والثاني من الحماميس

واللي في حزب الوطن
خلفلي دورية
واحد فتحاوي
والثاني شعبية
والثالث نضال
ورابعهم ديمقراطية
وخامسهم جبهة تحرير عربية
وفلسطينية
والسادس والسابع والثامن ...
وآخر الطش كان
مبادرة وطنية
والحمساوي مازال يخلف
تيصير دورية
منهم جهاد و قسام
وكمان تنفيذية
وهادول كلهم ما كفو
ومعاهم دزينة أجنحة عسكرية

وكل عيلة المتاعيس بفروعها
بجبهاتها
وحركاتها
وحزوبها
ما حرروا عنزة بقرونها


والعيلة كبرت يا رجال
وتشابكت لحبال
وكل واحد صارلو موال
ومصدر من الأموال

وركب الموجة الحرامي
والديوث والدجال
وهالله هالله يا رجال
وصلتونا لأسوأ حال

وظرط الزمان
وتذبحوا الإخوان
واتقسمت من ثاني البلاد
وفقرت الأمة وانذلوا العباد

ناس عملوا دولة جوامع
وناس عملوا دولة مواجع
والاثنين طرش وعماهم فاقع
وما حدا فيهم شايف
وماحدا فيهم سامع
وتركوا لشعبهم كل المواجع
وهمهم بس إيش إلهم منافع

ورغم إني درويش
وشهرتي مفاصص
بقول يا ناس ارحموا حالكو
الوطن ما هو محاصص

الوطن بدو الرحيم
الشعب بدو الفهيم
الوطن بدو العليم
والشعب كله ف جحيم

والوطن ثابت يا ناس
والزمن عطول بيدور
وخلي بالك يا مخدور
بكره مش عارف لمين الدور

وسألت أبوي جابر
اللي شهرتو لايص
وين يا بوي رايحين
بعد الكباير من الضراير

فنقلي عينيه وقال
يا مفاصص يا ابن المفاصص
أبوك من قبلك لايص

من تسعين سنة
حزب بيروح
وحزب بيجي
وماحدا فاهم
ايش النتيجي

واحد يخذنا شمال
وواحد يخذنا يمين
وبدي أحلف ميت يمين
ماحدا منهم عارف بعمل لمين

بلوة وانبلينا
وكل الظلم علينا

وقادتنا من العشرين
لحد اليوم
قاعدين يضحكوا علينا

وكم نكبة صارت فينا
وقادتنا من العشرين
لحد اليوم
قاعدين يتاجروا فينا

وكام عصابة بهالبلد
بتقول بدها تحرر أراضينا
لحد ماوصل بيهم الحال
قاعدين يتحاربوا مين اللي يزود بلاوينا
6/1/2008م
[email protected]
www.dtalal.jeeran.com

#طلال_الشريف (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل