عباس طريم
كاتب - وشاعر
(Abbas Trim)
الحوار المتمدن-العدد: 5466 - 2017 / 3 / 20 - 01:26
المحور:
الادب والفن
الكعكة المقسمة
__________
الكعكه اتقسمة , يمه يجريه
وصفينه ابلا كعك, بس نشرب اجويه
عباس طريم
اريزونا
__
+ + +
دكي اوياي , يم شلتاغ ياخيه
حجتهه, ابكل صراحه البرلمانيه
[ اتكول انلحست الكيكه , يحمريه
ويا ويله اليكول انطوني اشويه ]
+ + +
حكومتنه , حكيمه وتشبه البهلول
ولكل مشكله اتلاكينه , عدهه احلول
واكثر شي , عدالة سيدي المسؤول
الخصص للشعب , صفرين بالميه
+ + +
الكعك , يمه انخلق بس للسياسيين
واحنه .. انكتب عالكصه نظل حافين
عدمن يشتكون , المن المظلومين!
خير ماكو , وانوديله برقيه
+ + +
اجانه , الجان جدي ايكول : متعافي
وكال الشعب .. افضله يظل حافي
خلانه عرايه وكال : [ مو كافي
اريد اسمع بجي , الام العراقيه ]
+ + +
قررنه ييمه , انذبهه عالسياح
هم مثل الكعك والكيك, بيه املاح
روايه وسامعيهه من , ابن قداح
في برنامجه [ الاعشاب طبيه]
+ + +
الشعب قرر , أوده اليوم مشايه
الحكومتنه , يطالبهم ابكيكايه
واجه الرد, يا شعب والله ! دمايه
تصير , انسو الكيك وانسو طاريه
+ + +
يمه الشعب واعي ويعرف احكوكه
وحالف اله كيكه , يضيف لريوكه
زنود الست , مع ملبس ومدكوكه
ما يرضاه شعبنه , اوروح دبيه .
+ + +
كيكتنه ييمه , اتكفي كل الصين
بس شنسوي,اجونه ارجال متحزمين
لا كظهم عرف , لا مستحه ولا دين
الكيكه وما كفت , بلعو الصينيه
+ + +
يمه اتوزري وكومي الطمي اوياي
وخل انروح نشكي , لمحكمة لاهاي
انكلهم ساكتين اعله المصايب [ واي ] ليش
شعبنه انكرط , والكرطوه الواويه .
+ + +
ظالم راح يمه , والأجو ظلام
حولوه الوطن, لسخام فوك الطام
من يوم الاجونه ,اشتغلت الافلام
من تاليف وإخراج , الحراميه.
+ + +
عباس طريم
#عباس_طريم (هاشتاغ)
Abbas_Trim#
كيف تدعم-ين الحوار المتمدن واليسار والعلمانية
على الانترنت؟