صفوت فوزى
الحوار المتمدن-العدد: 4915 - 2015 / 9 / 4 - 08:32
المحور:
الادب والفن
وف غبشة الفجرية قام
حاسس كأن الدنيا لسة بتتولد
صابحة عفية منبتة
من جدرها فرخين يمام
عاشقين يناجوا بعضهم
ويلقطوا حب الندى
نازل كأسراب الحمام
مستنى كان الفجر يطلع
مستنى كان النور يبان
بلهفة يحضن نبتته
جوز اليمام
والحلم لسة بيبتدى
لسة- يدوبك – ابتدا
سمع الندا
الكتاب اللى كان مفتوح
انطوى
والحزن اللى عشش من سنين
بنى له بيت
طاب وإستوى
الموت جبان
إستنى لما الكل نام
من تحت عقب الباب دخل
جايب معاه كل العلل
من لحظته
حس بنهاية رحلته
حضن بصدره الكون
وكان وسيع
لكن مافيهش حد
يسند خطوته .
----------------
#صفوت_فوزى (هاشتاغ)
كيف تدعم-ين الحوار المتمدن واليسار والعلمانية
على الانترنت؟