انجيلا ميركل ما تنطيها !!!

يحيى الحميداوي

الحوار المتمدن-العدد: 4226 - 2013 / 9 / 25 - 19:46
المحور: كتابات ساخرة
    

ميركل فازت بدورة انتخابية ثالثة هذا ما صرح به (خضير كاوسكي ) في جلست السمر اليومية التي حشرت نفسي كضيف فيها تابعا للحجي أبو محمد ,تأفف الحجي مخاطبا كاوسكي
-أنت تعرفها ميركل !
حجي أشلون ما أعرفها غير المانية من كرابت هتلر
-دسكت من كرابت هتلر ! مو همى عرب حتى واحد يسلمها للاخر بالوراثة ,أشمالك لو تعرف السالفة لو تسكت!
-دسولف أنت يحجي أحنا معتمدين على أخبارك التازه
-مثل ما كلت خضير ,فازت ميركل هاي المستشارة الألمانية ,لكن فازت موعبالك هيج هيونطه وضحك على الناس وماننطيها , لا يبوي هاي مرّة ما تلحكها الزلم ,اشتغلت بصورة صحيحة كانت تعمل عاملة بمطعم في فترة شبابها وبعد ماحصلت على شهادة عالية (دكتوراه) عملت بشهادتها وهاي الشهادة عبالك مثلنا بالتقسيط ,يعني ثلاث أدوار من الامتحانات يلا الطالب ينجح لايبوي دراسة صدك .تحجي الماني وروسي وانكليزي ,والنوب معرسه مرتين ,وشوف المصيبة السوده من فلك طرها هي من طائفة يسموها (بروتستانتية) والحزب مالتها أصوله ( كاثوليكية )يعني شوف الناس إلي الله يحبها ما يهمهم شنو دينك لو طائفتك !
المهم تشتغل صحيح وتخدم بلدك
_حجي يعني شلون ماعرفت السالفة ؟
- خضير أنت مخلصها تصعد أشتايكر وتاخذ أكباله رمل ودبلات طابوك شلون راح افهمك ! لكن راح أقربلك الصورة ( أني ساكت خوفا من الحجي لا يلصمني بتصريح يمنعني من الحضور للجلسة ) ,يعني أشلون مثل ماتكول بلا تشبيه ,اللهم الشر بره وبعيد يعني رئيس حزب الدعوة أيصير (النجيفي ) لو مثلا رئيس الحزب الاسلامي ايصير (الجعفري ) ,فهمت يمعود لاتخلينه نحجي زايد ونبتلي !
- يبتسم خضير كاوسكي مخاطبا الحجي ,حجي هاي أشلون رهمتها
- رهمت هناك والناس تشتغل على حب الله وصار براسهم خير , أسكت خضير بعد لا تقاطعني , حافظت على المال العام وخزينة الدولة وانتعشت المانيا بفترتها الانتخابية ما أتضررت بالأزمة المالية من ظلت الدول تدّاين وحده من الأخرى ,رتبت أمورها وطلعت من جرخها ! مو مثل حظي المصخم ,أفلوس تارسه الكيعان وأحنه أنلوج بالتراب , أنت تشتغل عماله , وهذا منتظر التعيين شهادته بطوله , وأنا على الراتب التقاعدي , وياساعة الساعة تعلك وينعل والدينه ! نواب وحكومة ماعدهم شغل بس واحد يفضح الثاني ,هذا مسوي عملية بواسير والأخر عملية تصليح أسنونه والشعب ضيم وقهر , ومثل ما كالت الفنانة النص ردن (ساجدة أعبيد) في أغنيتها التي يستلذ بسماعها أحد النواب ( يمه دعمني الباص ماكال العفو) ,أندعم وتعالج على حساب الشعب ,شعبالك أفلوس مالت مخابيل ياهو اليجي ويغرف ,عاد ياكاوسكي أنت قارن بين ميركل المرّه وبين عمامك النايمين بالعسل وشوف ياهو إلي خدم ناسه وشعبه ,ولو نظل مليون سنه ماتصير عدنه مرّه مثل ميركل ناقصة عقل ودين !
مانريد بس زلمه ناقص عقل ودين مثل ميركل بلا تشابيه ويخلصنا من المحنه ولو هاي احلام العصافير بس ننتظر أشبدينه .تعبتوني اتظل يمكم العافية ...





يحيى الحميداوي

كيف تدعم-ين الحوار المتمدن واليسار والعلمانية على الانترنت؟

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات