جهاد علاونه
الحوار المتمدن-العدد: 2772 - 2009 / 9 / 17 - 18:12
المحور:
الفلسفة ,علم النفس , وعلم الاجتماع
في ناس وجودها وعدمه واحد, يعني (سيان إن هم حضروا وإن هم غابوا) وفي ناس وجودها أفضل من عدمه , وفي ناس عدمهم مثل وجودهم وفي ناس يا ريت ما شفناهم ولا عرفناهم , وفي ناس كان ظهورهم في حياتنا عباره عن نقطة تحول كبيرة , وفي ناس عظماء كان حضورهم في التاريخ البشري عباره عن نقطة تحول في تاريخ البشرية أجمعها حتى وإن سفكوا الدماء أو حقنوها ,وفي ناس كان ظهورهم وحضورهم على خشبة المسرح في الحياة حدث عظيم وكبير وله حضوره المميز, وهذول الناس همه إللي بدنا نحكي عنهم وعن حضورهم ووجودهم مثل وجود الأضواء في غرفنا وساحاتنا وشوارعنا الطويله.
وفي ناس كان حضورهم في حياتنا مثل الأضواء الخافته في غرف نومنا يعني كان حضورهم رومنسي وجذاب .
وفي ناس كان حضورهم في حياتنا عباره عن نقطة تراجع للخلف وما كان من الضروري أن يظهروا في حياتنا .
وفي ناس عايشين حياتهم بالكذب ومن بين كل 1000كلمه كلمه واحده صحيحه, وفي ناس ما بكذبوا ولا بنصبوا ولا بحتالوا وعايشين حياتهم على أفضل وجه.
وفي ناس إذا بحضروا أي جلسه بكون وجودهم مميز وله طابع مثير ,يعني مثل ما غنى (راشد الماجد) " ألله يا زين إللي إحضرت غطت على كل الحضور"
والمقصود إنه بعض الناس لها حضور مميز أينما وجدوا وهذا الحضور هو الذي تبحث عنه الصحف والسينما , وقرأت ذات مرة مقال لسعيد عبد الغنى قال فيه:
حضرت احدى الممثلات وأدت دورها بكل اتقان ولكن المخرج لم يعجبه الأداء فطلب إعادة التصوير مرة ثانية فقلتُ له: يعني إنت ليه مصر على كذا ما هي بص عال العال ودورها كويس ومؤثر ؟
فقال المخرج: لالا أنا عاوز حضور للممثلة أمام الكاميرا , عاوزها لّما تظهر تملى المكان ويكون ليها إطلاله.
وفعلاً في حياتنا أناس مثل ما أراد هذا المخرج , لهم حضور مميز في حياتنا وأينما وجدوا يخطفون الأنظار والأبصار ويلفتون إنتباه الناس , وهذه الصفات في الشخصية مطلوبة ومرغوبة ومكروهة في نفس الوقت , فبعض الناس حضورهم يثير فتنة جمالية وفتنة سياسية يخطفون الأنظار إليهم وتظهر مشاكل القبح في غيرهم , يعني الجميلة والعالم والمثقف في حضورهم بعض الأمكنة العامة يثبتون لبعض الناس أنهم غير جميلين وغير مثقفين لأن جمال المرأة في ساحة تتوافر فيها النساء يكون عبارة عن ابتزاز أخلاقي وإظهار لمستوى جمال الأخريات , ومن هنا تبدأ مشاكل الحسد الإجتماعي والسياسيي.
في ناس حضورها في الأمكنة العامة مثل حضور الشموع وفي ناس بفوتوا على الأماكن العامة وبطلعوا منها من غير ما حدى يحس فيهم أو في وجودهم وكأنهم لصوص قدموا للسرقة فسرقوا وهربوا.
وفي ناس عظماء إذا كتبوا في الصحف بكون لقلمهم حضور ووجود مميز حتى وإن كتبوا وقالوا أي كلام , وفي كتاب لو كتبوا وأظهروا وثائق حقيقية وكتبوا عن سبق صحفي ما حدى بكترث ليهم , وفي ناس مثل ما دخلوا حياتنا مثل ما طلعوا منها وفي ناس عاشوا في حارتنا 60-70 سنه كاملات من غير ما يثيروا أي تساأل.
هذا المقال فكرت فيه بس سمعت ليلة الأمس عن شاب في بلدتنا توفي وهو في مقتبل العمر فقالت الناس : يا حسره على شبابه , بس أنا قلت : الحسره فقط على أولاده مش على شبابه يمكن كان من الممكن أن يكون لحضوره طاولة العشاء أو الافطار مع أولاده شيء مهم بالنسبه للأطفال هذا النوع من الحضور فقط تجسده الذكريات المُره والجميله , بس على حياتنا ما أظن إنه يكون في إله تأثير حتى لو عاش 100 سنه شو بده يساويلنا؟
شو إللي بده يعمللنا إياه ؟
ولا أي شيء : ربي كما خلقتني .
واستدليت على ذلك من خلال جاره الذي مات وعمره فوق السبعين سنه فقلت : زيه زي جاره شو ساوى؟ شو عمل : تيتي تيتي مثل ما رحتي مثل ما جيتي .
بس عن جد في ناس سكنوا في حارتنا شهر واحد وما زالت رائحتهم في كل مكان وفي كل زاويه من زوايا الحاره , وفي ناس زي ما غنى فعلاً راشد الماجد :
" الله يا زين إللي إحضرت غطت على كل الحضور.".
في ناس بعثولنا على الإيميل بإيميلاتهم مره وحده أو مرتين وما أعادوها بس عن جد كانت إيميلاتهم حلوه وبتجنن وما زالت راتئحتها أينما ذهبنا تملأ الأفئدة والعقول , وفي ناس شو بدنا نحكي عنهم ؟ كل يوم ببعثولنا بإيميلاتهم وكل يوم إبنعمللها (دليت –شطب) من غير حتى ما نفتحها , وفي ناس يا ألله قديش إبنفتح رسائلهم على شان نلقى شيء مهم بس للأسف كله حكي فاضي .
وفي ناس ابنشتاقلهم وهمه ما زالوا بجانبنا يعني ملتصقين فينا , وفي ناس غابوا عنّا من سنين وما شعرنا إنهم تركوا في حياتنا أي فراغ , وفي ناس مازال الفراغ يتسع بإتساع ابتعادهم عنّا وفي ناس لها إطلاله خاصه على قلوبنا ونفوسنا , بس إنشوفهم بنحس إنا من زمان ما شفناهم حتى ولو كانت آخر مره منذ ساعة أو ساعتين , وفي ناس يعني حدّث ولا حرج.
مثل ما حكوا الناس :
-في ناس إبتنباس
-وفي ناس بتنشال و بتنحط على الراس.
- وفي ناس بتستحق أن تنداس .
كل هذا سببه الحضور المميز لبعض الناس , في ناس بس يحضروا فعلاً وعن جد بتحس بأنوارهم ملأت المكان بهجةً وسرورا , وفي ناس بس يحضروا بتحس إنه الجو تلبد بالغيوم وأصبح شبه معتم أو مُعتم نهائيا .
وفي ناس مجرد ذكر إسمها بتطلع إلهم رائحه كريهه, وفي ناس تتساقط دموعنا عليهم ولا نجدُ منديلا لمسح دموعنا عليهم ونتمنى أن نمسك بأيديهم ونبكي أو نضحك ومن ثم نموت على صدورهم, وفي ناس لو ملأوا لنا بيوتنا بالنجوم وبالذهب ما شعرنا تجاههم بشيء من الرضى , وفي ناس ممتع جداً السهر والسمر معهم حتى وإن أدخلونا القبور أو السجون المهم أن يكونوا معنا .
في ناس مثل ما فاتوا التاريخ مثل ما طلعوا منه , وفي ناس بس يقوموا من أمكنتهم بتحس إنهم كانوا موجودين وشاغرين المكان , وهذه ملاحظة لا حظتها ونلاحظها جميعنا في كافة الأمكنة العامة بس يقوم أحد الأشخاص من مكانه ويسلم على الناس بسلام الوداع ساعتها بس بنشعر إنه كان بيناتنا وموجد فعلاً بس إحنا ما إنتبهناش ليه على شان حضوره كان مش مميز بعكس بعض الناس, بس يقوموا من مكانهم ويغادروه ساعتها بس بنشعر إنه كان وجودهم مهم في حياتنا .
يعني المسأله متعلقه بالحضور , في ناس بس يدخلوا على أي مكان بملأوه بأي شيء حتى لو شتمونا أو سبونا بنشعر إنه في كانت ليهم في حياتنا إطلاله ووقت للإستماع ليهم ووقت لملاطفتهم أو للإهتمام بهم .
يعني المسأله عن جد تكمن كلها في عملية الحضور, ولازم يكون لينا حضور أينما ذهبنا ونملأ المكان , وهذه في الحقيقة صفات العباقرة والعظماء , كلهم بس يموتوا أو يذهبوا من حياتنا بنشعر إنهم كانوا فعلاً مهمين جداً في حياتنا .
أحيانا بكون جالس في الأمكنة العامة دون أن أنطق بكلمه واحده وبكون أراقب حضور الناس , في ناس بس يدخلوا على المكان العام ويجلسوا في أي مكان نجد أنه مكانهم بعد لحظات يصبح نقطة تجمع للناس فكلهم يقتربون منه شيئاً فشيئا حتى يصبح المكان أو الزاوية التي يجلسون بها مزدحما.
وفي ناس للأسف بس يجلسوا في المكان الممتلأ بعد فتره يصبح فارغ إلا منهم أنفسهم , يعني في ناس بحضروا وبجلسوا في المكان المزدحم وبعد فتره وجيزه كل الناس بتنسحب من حولهم وما بعود لوجودهم أي أثر , وفي ناس يا دخيل قلبي عليها بس يحضروا أي مكان تجد الأنظار تتجه إليهم والأبصار معلقة بهم , وفي ناس إذا جلسوا في مكان عام بحاولوا يرسلوا بعيونهم لكل الناس بس للأسف رسائلهم ما ابتصلش لحدى نهائياً , الكل مش شاعر بوجودهم .
وفي ناس فجأه بختفوا من حياتنا وفجأه بظهروا فيها , وفي ناس بنكون ناسيينهم وحاسبينهم من حساب الموتى بس فجأه بظهروا في الشوارع وبنشوفهم , وفي ناس بغيبوا سنين وأيام وفجأه بظهروا أمامنا مثل الأشباح , يعني فجأه بختفوا وفجأه بظهروا .
وفي ناس حياتهم إمحيّره إكثير فجأه بنشوفهم راكبين سيارات فارهه وعاليه والناس بتطرح عليهم السلام وبمدحوهم وفجأه بركبوا بالسرافيس وما بكون معاهم أي قرش أو فلس حتى السيجاره بشحدوهاوالناس بشتموهم بأقذع أنواع المسبات , وفي ناس فجأه بظهروا أمامنا وبسرعه بختفوا ومره بظهروا ومره بختفوا وساعه بطلعوا وساعه برجعوا وساعه هيك وساعه هيك مثلهم مثل الزئبق .
وفي ناس لا منظر ولا محضر.
وفي ناس تكملة عدد .
وفي ناس كمبارس .
وفي ناس مش كمبارس.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
