في قضية هويدا ... أعترف بأني قد خَسِرت الرهان ... و لو مؤقّتا...و مستعد لدفع الرهان ... دولار أمريكي واحد

أسعد أسعد

الحوار المتمدن-العدد: 1906 - 2007 / 5 / 5 - 11:23
المحور: كتابات ساخرة
    

"قضت محكمة أمن الدولة العليا أمس بمعاقبة هويدا طه المعدّة بقناة الجزيرة غيابيا بالحبس لمدة ستة أشهر و إلزامها بدفع كفالة قدرها 10 آلاف جنيه بالإضافة الي تغريمها 20 ألف جنيه و مصادرة المضبوطات , مع إلزامها بدفع المصاريف و أتعاب المحاماه" إنتهت مقدمة الخبر كما نشرته صحيفة المصريون الاليكترونية بتاريخ 2 يونيه 2007 و قد نشرت جريدة الاهرام و هي الجريدة الناطقة باسم الحكومة المصرية نفس الخبر كما جاء علي موقعها الاليكتروني لكن بإقتضاب و بدون تحليل أو تعليق.
إنفجرت فضائح أبو غريب في أمريكا و كانت كوقع الصاعقة علي المواطن الامريكي فأهتز عرش الجيش الامريكي و إهتزت صورته في نظر المواطن الامريكي و أهتزت صورة وزير الدفاع الامريكي و بقية الجهاز المسؤل عن الفضيحة و عُقدت المحاكمات و دينَ المسؤلين عن الفضيحة و صثدرت أحكام بالسجن , و مازالت الملفات مفتوحة للتحقيق و تقصي الحقائق .... و القضاء أخذ الأدلة المبدئية من الصحافة الامريكية التي نشرت الفضائح لتعلن للعالم أجمع و ليس للأمريكيين فقط فضائح و أخطاء الادارة الامريكية و إجرام بعض المؤتمرين بأمرها.
و علي غرار ال "سي إن إن" و ال "بي بي سي" و ال "فوكس نيوز" رأت هويدا إن الجزيرة مش أقل من دول كلّهم و زي ما الخواجات الامريكان بيفضحوا بلدهم يبقي لازم هيّ كمان تبقي صحفيه مشهورة و تثبت للعالم العربي من المحيط إلي الخليج إن "الجزيرة" أجدع من ال"سي إن إن" و قررت أن تدخل عرين الاسد و تصرخ في وشه و تقول له بأعلي صوتها "بــــخخخخخ" علشان الأسد يتخض و خاصة لما يشوف ميكروفون "الجزيرة" و مخرج "الجزيرة" و مصور "الجزيرة" ...
و كما قلت في مقالات سابقة فقد ضحك الأسد و سَخسَخ من منظر الست هويدا و الفريق المُرعب اللّي جاي معاها و الميكرفون اللي أشهَرته في وجهِهِ و اللي مكتوب عليه بالخط العربي "الكوفي علي ما أعتقد أو الرقعة" (الجزيرة) و كاد الأسد أن يغمي عليه من الضحك لكنه تمالك نفسه ... و أدرك الأسد هيافة الموضوع و هيافة طريقة الدخول إليه ... فضايح إيه يا مدام هويدا اللي جاية تفضحينا بيها ... و جلس الاسد يضحك مع هويدا و هو يضحك عليها و هي لا تدري و تحلم بالبطولة المرتقبة و الاسم اللامع و الخبطة الصحفية ... و الاسد يسحب في سجاير و يديها و قهوة و يسقيها و كلام حلو و ناعم و يغني عليها ... و يا مدام هويدا... و يا حضرتك... و يا أفندم ... و من فضلك... و عينينا ليكي... و تحت أمرك ... و اللي تأمري بيه يا مدام ... و إحنا خدامينك... و خدامين الجزيرة و الأمة العربية كلها ... إلي باقي أسطوانة الكلام المعسول و القرع المصري ... فاستحت هويدا من الاسطوانه الناعمة و جـرّت ناعم مع الاسد و قالت "و هي مكسوفه من كلمة "بخ" اللي دخلت بيها عا الاسد" ممكن من فضلك تسمح لي أصور الفظائع اللي سعادة جنابك بتعملها مع شوية العيال المصريين اللي بيقولوا إن فيه زُلم (تقصد ظُلم) في المعامله في مراكز الشرطة و المعتقلات و السجون و إدارات الأمن و المخابرات ... فانحني الاسد أمامها بأدب جم و تظاهر بأنه يفكر و يفكر ... و ظل يفكر و يفكر... ثم ظل يفكر و يفكر ... و انطلق يفكر و يفكر ... و راح يفكر و يفكر ... حتي أعطي لهويدا إنطباع إنه سيتخذ قرار جد و خطير فيه تضحية و تقرير مصير ... و بدون الدخول في التفاصيل و الرجوع لمذكرات هويدا عن الموضوع اللي نشرِتها هويدا علي عدة مواقع اليكترونية منها موقع الحوار المتمدن , فقد فهِمَت هويدا ضِمنا إنها أخدت التصريح من الامن و المخابرات بفضح حكومة حسني مبارك و وزير داخليته و مدير مخابراته .... و لا شك إن هويدا هنّأت نفسها و أعجبت بالروح الرياضية للأسد الهُمام الذي سمح لها بفضح إجرام النظام ... و سابها تاخد شنطتها و تطلع علي المطار ... أوراقها جاهزة ... جميع الاستمارات مختومه بختم العصفورة (أقصد ختم النسر) و توقيعات وزارة الداخلية و لواءآت الامن و إدارة المخابرات من أصغر ضابط لغاية عم لاظوغلي الكبير ... إضبط إمسك إلحق ... إيه الشرايط دي... فيها إيه ... إيه العلبه دي و إيه الزراير اللي فيها دي ... دا إسمه كمبيوتر يا جَهَلَة .... إنتي مين.... أنا هويدا بتاعة الجزيرة ... حتي إسألوا سعادة البيه الأسد ... تحقيق... سين ... و جيم ... إيه اللي بتعمليه ده ... و نامت المسكينه ليله علي البلاط في ضيافة الأسد... أتاري الأسد حوّل الموضوع كلّه (في السر من غير ما هويدا تعرف و لا تاخد بالها لأنها كانت مشغوله بالأسد) علي حتّة فار صُغَيّر من أتباعه إسمه "الرقابه علي المصنفات الفنية"... مجرد حركه صغيّره من ديل الاسد لا من مخلبه الغليظ و لا من لسانه الخشن ... حركه من ديله الناعم ... و وقف الفأر بالنيابة عن الأسد يصرخ في هويدا ... فين التصريح ... تصريح إيه ؟... تصريح التمثيل ... مش اللي إنت عاملاه ده كله تمثيل ... أيوه بس ده أخبار... لأ يا أختي ده تمثيل في تمثيل ... يعني يا ست هويدا كان لازم تاخدي تصريح علشان تمثلي ... و فهمت هويدا بعد فوات الاوان إن الاسد هوه اللي كان بيمثل عليها ... و شربت هويدا المقلب اللي كانت حاسه بيه و مش فاهماه ... الأمن موافق... و عم لاظوغلي الكبير موافق ... و ختم النسر و ملطوع عا الورق .... أتاري الحكاية كلها تمثيل في تمثيل ... و لبست الست هويدا القضية من حيث لا تدري ... و وقف الاسد غلبان يهز ديله و يقول لها أنا ماليش دعوه ... و راح القاضي الهُمام اللي واخد تعليماته من رئيس الجمهورية رأسا بعدم حبس الصحفيين راح طاسصها حكم بسته شهور سجن ليه ... علشان إنتي ممثله مش صحفية ... و واخده تصريح من الباشا الكبير علي إنك صحفية ... لكن انتي بقيتي ممثله ... ختم النسر اللي معاكي ده ما ينفعش عندنا يا هانم ... لازم تفهمي إن النسر بتاع الاسد غير النسر بتاع الفار...
ياتري ها تروح هويدا السجن ... ما أعتقدش دا بس الباشا الاسد مكبّر الموضوع شويه و بهزّه صغيرة من ديل سعادته للفار تصفي القضية علي شوية الجنيهات اللي لو حولناها لدولارات تبقي حوالي خمسة آلاف دولار ... مش كتير علي محطة الجزيرة ... أي واحد غلبان هنا في أمريكا ممكن يسلّفها و الحساب يوم الحساب... و هذه هي القضية ... لما الامن هوه اللي بيطلّع كليبات التعذيب علي النت علشان يرعب بيها البلد و يخلي الناس تمشي جنب الحيط ... رايحه تصوري إيه يا هويدا... تســــــتاهـــــــــلي ... انتي لو طلبتي تعملي تحقيق في جوانتانامو معقوله.... تروحي أبو غريب ... برضه معقوله ... إنما عم لاظوغلي... أهم ضحكوا عليكي و طلعوكي ممثله ... و لا صحفية و لا حاجة... المـرّه اللي فاتت قلت لك بالامريكاني "نايس تراي" المرّه دي أقولها لك بالعربي..... تعيشي و تاخدي غيرها
و أنا أرجو إنك توصّلي الكلمات دي لشعبولا عشان يغنيها لك يوم ما تطلعي بالسلامه....
أنا بأكرَه الجزيره... عشان ما بتختشيش
بعتت هويدا طه... تمثّل و تِعمل أفيش
قفشوها بالشرايط ... أسوأ من طُربِة حشيش
و هيـــــــــــــــه
أنا بُكرَه ها أقول موافق... عا السجن و المعتقل
و أقول يا ناس عاجبني... إن شا الله حتي أتسَحَل
دا الحكم هنا ف بلدنا... تسقيف و زيطه بالهبل
و أن كنت يوم أعترض... ها البس خازوق بالعجل
و هيــــــــــــه
أوعي ياعم طه ... تسيب بنتك تروح
تحقق ويا الاسد... و تكشف المجروح
دي برضه لسه وِظوِظ ... قدّمها الطريق مفتوح
خليها في الكتابه ... و بلاش طلوع الروح
و هيـــــــــــه

#أسعد_أسعد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل