المجد لمحمد خلف

عبد المجيد راشد

الحوار المتمدن-العدد: 1858 - 2007 / 3 / 18 - 04:55
المحور: الادب والفن
    

محمد خلف
اسم يفكرك بالشرف
يصحى فيك معنى الوطن
لما يقول لأه
عارف تمام
أمتى يزق الزقة
فيهز عرش الخيانة
و الذل و الاستكانه
يحط فى نعش النظام مسمار
و يدقه ميت دقة
مش همه ياكلها حاف
و لاّ ياكلها بدقة
الكيل طفح م الذل
و النهب و السرقة
المصرى جىّ
جايب لمصر الضى
المصرى حى
ضميره صاحى
عقله نىّ
ما قدر يطبخه خاين
و لا عدو
و لا حدى بدى
المصرى طالع
من شواشى الشجر
و من النخيل
المصرى عمره
ما كان عليل
و لا كان عويل
عارف العدو فى ( إسرائيل )
المصرى عمره
ما كان ذليل
و لا ركع للأمريكان
و لا عمره كان أبدا جبان
ساعة الأدان
تلاقيه ف قلب المعركة
وسط الميدان
المصرى عارف من زمان
مين اللى صان
و مين اللى خان
و يوم يجد الجد
المصرى يحد الحد
و ينفجر بركان
يطهر كل شبر
واللى فاكرين ان مصر
خلاص بقت ملكهم
هيشوفوا يوم
إسود ..
على كل ظالم
أبيض ..
على كل مظلوم
و اللى فاكرين ان مصر
عزبة يورّثوها
بكرة هيعرفوها
بكرة هيتعلموها
درس مصر الجىّ
طول عمرها ملهاش
فى الصبر زى
و لا فى القومه
فى الفجرية ضىّ
المصرى عربى
عارف تاريخ أمته
و عارف سكته
مدرك تماما
إن النظام بلوته
وحكام المذلة قضيته
و (إسرائيل ) عدوته
المصرى عربى
و النبى عربى
و الجرح يصرخ يقول
أنا عربى
و النصر من جنوب لبنان
ينطق حروف عربى
و فى العراق و فى فلسطين
الدم يروى ترابنا الـ عربى
المصرى زهرة
فى بستان الأمل طالعة
قلبه جسور
و عزيمته ساعة الحسم والعة
فى الضلمة شمعة
و فى النهار
غيط و مصنع و جامعة
المصرى يصبر آه
يسكت و يتهيألك انه
سلم مصيره لسلطة محتكرة
للنفوذ و للفلوس و الجاه
سلطة عميلة ذليله
ما تعرفش غير ملذات الحياه
سلطة بلا مبالاه
لا ف ذهنها شعب و لا أمة
تركع لأمريكا
و تبعد عن طريق اللـــــــه
و المصرى عارف انها ساعة
و هتعدى
دا ياما بحرك يا مصر
بيحدف و بيودى
و المجد دايما للشرف
المجد لمحمد خلف
المجد دايما للشرف
المجد لمحمد خلف

عبد المجيد راشد
[email protected]
http://www.maktoobblog.com/rashd_karama
http://www.rezgar.com/m.asp?i=1487
الخميس
الأول من مارس 2007

#عبد_المجيد_راشد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل