علي الوردي..حوار في قبره

قاسم حسين صالح
(Qassim Hussein Salih)

الحوار المتمدن-العدد: 8509 - 2025 / 10 / 28 - 21:04
المحور: كتابات ساخرة
    

علي الوردي.. حوار في قبره

د. قاسم حسين صالح
البارحة استحضرت الدكتور علي الوردي، سالني:
- خير..اشبيك..اشو متمدد بالحديقة وتكول ..اريد اموت ،وخال القرآن على يمينك وانت فد واحد ماركسي من ساسك الراسك.
+ وعيونك دكتور شعرت دا اريد اموت حقيقي
- تتذكر من كنت كاعد يمي وانا متمددعالسرير دا اريد اموت؟ تتذكر من كتلك آني ما احب الماركسيين بس الك احبك..وتعال انطيني بوسه وسقطت الدمعة من عينك..
+ وليش ذاك الموقف ينسّي
- وتتذكر من كتلك ..قاسم ،تدري شيعوزني هسه
+ بلي ..كلت يعوزني ..ايمان العجائز
- بس انت ما بحاجة لأيمان العجائز ..لأن ماركسي تعرف نهايتك تصير سماد
+ بس بلحظة الموت ..استحضرت الله ..دخبرني ،وضعك شلونه اجاك منكر ونكير؟

- لحد الآن ..صار ثلاثين سنة لا منكر ولا نكير
+ بالصريح..منو ارعبك اكثر..منكر ونكير لو صدام حسين؟
- صدام طبعا
+ليش؟
- لأن منكر ونكير ياخذون وينطون بالكلام و صدام ..ايده والسيف.

+ علاوي ابو الورد..واشلونك هسه
- كلش مرتاح ..خلصان من اصعب خلق الله ..العراقيين على وصف قسومي. بس بصفي واحد ..من عرف اني علي الوردي كال : ساعة السودة ..حتى بالآخرة ما خلصان منك.
+ ما سألته ليش؟
- سألته .. كال عني ..كافر ..وكتله ابشر بها ..ستكون رفيقي لجهنم

+ بداعتي ..احجي الصدك..اكو جنه ونار؟
- ليهسه ..لا شفت واحد محروك اصبعه ولا شفت واحد حاضن حورية.
+ اي غير يجي يوم القيامة
- لا تصدك..اللي شفته يخليني ما اصدك
+ها!.. اشلون؟
- من كثرة العظام الداير ما دايري .. يمكن صارلها اكثر من مليون سنة
+ بس أكيد راح يجي.
- يا ريت ..هيج واشوفك انت وماركس ماخذيكم لجهنم ..بلحظتها اهلهل
+ وعلى اساس انت ياخذوك للجنة..وتخلصها اكل وشرب وانهار من خمر وحور عين و ولدان مخلدون..يكفي كتابك (وعاظ السلاطين).

- وشنو علاقة وعاظ السلاطين...
+ لأن السلاطين اللي بالدنيا .. نفسهم راح يكونون سلاطين الآخرة..ليش ما دريت بيهم راحوا حجوا وزكوا المليارات واستغفروا وربك غفور رحيم.
- يعني يقشمرون حتى الله
+ استغفر الله .. بس تريد الصدك ،ذوله اشطن من ابليس ..وبيهم فد واحد معمم ..حلو يملك المليارات ويحلف برووس العراقيين أنه مطلوب وما عنده يسدد دينه.
- اكول .يكلون هوايه بنات حلوات طلعن بها الجيل الجديد
+ واحلاهن تزوجها واحد اشطن من ابليس

- زين والمثقفين وين صاروا
+ ملتهين برفع الفاعل ونصب المفعول به او يلقي خطابا رنانا عن مجد الاجداد ثم يهتف منشدا "حسبنا اننا عرب" على حد تعبيرك .
- قاسم حبيبي تقرّب مني شوية
+ لا عيني ..خليك بعيد
- دسمعني..ما دام موعد موتك تمدد .. عندي وصية اريدك توصلها للعراقيين
+ من هالعين وهالعين

- قل لهم ان العراق بلد الاصل والجود و جمجمة العرب و رمح الله في الأرض، وأن شعبه يفيض بالكرم والشهامة.. فأين انتم منها الآن؟ . وقل لهم:
- يهتف رجل الدين بكم قائلاً:
انكم أذنبتم أمام الله فحق عليكم البلاء من عنده وهو بذلك يرفع مسؤولية الظلم الاجتماعي عن عاتق الظالمين فيضعها على عاتق المظلومين أنفسهم!.. فيأخذون بالاستغفار وطلب التوبة وبهذه الطريقة يستريح الطغاة..وتأكد منهم فهموا انهم. ..زناديق!
+ شكرا يا ورد ..ممكن تختمها بنكة؟!
- ما انسه دراستك عن (البغاء) من سحبتك من ايدك بعد ما خلصت عرض دراستك عن اكثر من سبعين كحبه وسمسيره..سحبتك من ايدك واخذتك على صفحة وكلتلك دراستك هاي عن الكحاب تذكرني بنكته خلاصتها ..اجتمع الوصي عبد الاله ونوري السعيد و وزير الصحه ووزير الداخلية يناقشون فتح منزول للكحاب . القرار متخذ ومهمتهم فقط تحديد مكان ..هذا يكول بفلان مكان والثاني يكول بفلان مكان ..وطال الجدال .فقال لهم مصلاوي يحب النكته : ابوي علويش مختلفين ..احسن مكان لفتح المنزول هو الميدان والما يصدك خل يسأل امه!!
- اشو ما تضحك
- + سامعها
- مو صوجك صوج الباسك ..يا ماركسي..يا ما تعرفون حتى تجاملون!


*

#قاسم_حسين_صالح (هاشتاغ)       Qassim_Hussein_Salih#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل