رمزى حلمى لوقا
الحوار المتمدن-العدد: 7172 - 2022 / 2 / 24 - 16:58
المحور:
الادب والفن
كَأنِّى بَمُوت
(عامية مصرية)
؛؛؛؛؛؛؛؛؛؛؛؛؛
قتلتوا الحِلم جوّايا يا أهل الخير
وأنا مش غِير
أنا عادى
مُجرد إسم
كان نكرة
صبح نكرة
وبكرة بتدفنوه
نكرة
ومش طمعان ولا بحلم
بأكتر من حيطان الستر
تئوينى
وتحمينى
كما الميت
ف ليل العتمة يدّارى
ويتحامى
ف ضل القبر والتوابيت
سلبتونى
صلبتونى
أنا والجرح والحواديت
كأنّى رِضيت
وأنا ف الحق مش عادى
لِقولة الحق مَعنَى وبيت
وأنا والحق مش راضى
ولا مشتاق
ولا عايز
ولا حنّيت
ولا قَبِّلت أعتابِك
ولا بابِك
وف غيابِك
ولا حطِّيت إيديّا ف شق
ولا اتعفرت يوم الجرح بترابِك
ولا اتحَنِّيت
ولا ف يوم اللُقَا هَجِّيت
أنا غضبان
يا جرح الجرح
من جوّة
وكتم الجرح مش هَيِّن
ولا قوة
أنا بصرخ بِ عِلو الصُّوت
أنا المكبوت
لكنّى ف اللُقَا بضحك
كَأنِّى بَمُوت
؛؛؛؛
كلمات
فبراير ٢٠٢٢
#رمزى_حلمى_لوقا (هاشتاغ)
كيف تدعم-ين الحوار المتمدن واليسار والعلمانية
على الانترنت؟