شكرا إبن منظور وإبن منظور المصري مش أحسن من إبن غالي الإسكندراني

أيمن غالي

الحوار المتمدن-العدد: 7097 - 2021 / 12 / 5 - 10:05
المحور: دراسات وابحاث في التاريخ والتراث واللغات
    

ما حدش ما سمعش عن معجم لسان العرب لإبن منظور المصري .. الراجل ده عمل مشروع جامد جداً؛ خدم وحا يخدم العلم لقرون فاتت وقرون جاية ..
إبن منظور؛ قام بجمع كل الكلام إللي في منطقة الشرق الأوسط - بطريقة الكَبْشْ من غير نقاوة - ومش مهم نوعه وأصله وفصله، وحط له العنوان إياه "لسان العرب"، والراجل ما غلطش في كون العرب كانوا بيستعملوا الكلام ده ..
مثلا؛ لو أنا كأيمن غالي؛ جيت النهاردة وحاولت أجمع كلام الإسكندرانية على طريقة إبن منظور؛ حا أكتب الكتاب بعنوان: "لسان الإسكندرانية لإبن غالي الإسكندراني المصري"، وحا أحط فيه كل الكلام إللي بيتقال في إسكندرية؛ في شوارعها وفي كنايسها (بلغاتها المختلفة؛ قبطي، يوناني، لاتيني، إيطالي، فرنساوي، ألماني، سرياني، وغيرها)، وحا أنقل مفردات الحِرف والمهن من أصول مختلفة وهكذا ..
واحد حا يقول لي:
يا عم الكلام ده من لغات كيت وكيت وكيت؛ حا أقول له:
ماليش دعوة بالكلام ده، وطالما الكلام موجود علي ألسنة الإسكندرانية وفي شوارعهم؛ يبقي لسان إسكندراني ..
نرجع بسرعة لإبن منظور علشان الكلام ما يُفرُطش مننا، والموضوع ما يهربش من إيدينا ..
عندنا عالم لغوي - د. محمد بهجت القبيصي، جامعة دمشق - متخصص في تاريخ اللغة والكتابات السامية القديمة وصاحب عدة معاجم لغوية للغات سامية قديمة؛ منها الآرامية والأوجاريتية وغيرها؛ قال معلومة تشبه إللي رزع كرسي في الكلوب، وقال:
إن 85% من كلمات معجم بن منظور هي كلمات آرامية ..
واحد ممكن يقول:
مين ده الآرامي إللي كان عنده الفشليون جدر لكلمات رصدها إبن منظور ؟
حا أقول لكم
كان عندنا لغة موحدة سائدة في شبه جزيرة العرب، وشمالها، وجنوبها، وشرقها، وغربها، وممتدة من الهند شرقا مروراً ببلاد فارس لبلاد الشام ومصر غرباً وشمالاً من تركيا حالياً لأقصي جنوب شبه جزيرة العرب، وكان إسمها اللغة الآرامية الدولية ودي كانت موجودة من 1000 سنة ق. م
وبعد مرور قرون، وكل قرن والتاني يمر؛ كانت بتظهر لهجات مختلفة هنا وهناك وعند دُولهُم ودُوكهُم وكدهون
وظهرت الآرامية النبطية، الثمودية، اللحيانية، الفلسطينية، المصرية، والسريانية الشرقية، والسريانية الغربية وغيرها ..
إبن منظور بقي؛ كَبَش كل دُول مع بعض ومعاهم كلام مصري (قبطي ومصري قديم) ومعاهم فارسي وحبشي وغيرها .. الراجل ما عتقش
وللأمانة؛ إبن منظور عمل شغل جامد جداً، وخدم العلم زي ما قلت لقرون فاتت وغيرها جاي ..
علماء الساميات؛ مع إكتشاف كل نقش جديد؛ يرجعوا لإبن منظور يلاقوه رازعها في معجمه هي أو جدرها، وبالتالي يقدروا يعرفوا معناها إيه ..

وفي ورقة علمية بعنوان
Personal names in the Nabataean relam, A review article, M. C. A. MacDonald, Oriental institute, Oxford
Journal of Semitic Studies,Autumn 1999
بيتكلم عن أسماء الأعلام النبطية وقال في كلامه إن القياس كان علي الكلام العربي

يعني إبن منظور ما كتبش كلمات اللغة العربية؛ لكن كتب لسان العرب، وكل الكلام إللي كان بيدور علي لسان العرب في مفهومه؛ لإنه إحتسب إن الدنيا كلها عرب في عرب، وكويس إنه ما أخدش باله من اللغات الهندوأوروبية والأفريقية وإلا كان رزعها في معجمه، وقال عليها لسان العرب برضه، وكان بقي عندنا بدل الفشليون جدر؛ شخروميت فشليون جدر وفروع وأوراق وكانت حا تبقي هيصة ..
نرجع تاني لإبن غالي الإسكندراني المصري
أيوتها أوعتوراض علي فشليونات الكلمات إللي ممكن في يوم أكتبها في معجمي - إللي في الأحلام - ما يجيش واحد ويقول لي الكلمة دي طلياني أو فرنساوي أو فنكوشاوي .. وحطوا إبن منظور قدام عينيكم وما يبقاش إبن منظور علي قلبكم زي العسل، وأيمن غالي كُخّة، وتبلعوا فشليون جدر لإبن منظور، وكلمة لأيمن غالي تقف لكم في زوركم .. وإبن منظور مش أحسن مني

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل