البحث عن شيماء

ماجد الحداد

الحوار المتمدن-العدد: 7096 - 2021 / 12 / 4 - 19:52
المحور: الادب والفن
    

اغنية ((( شيماااااء ))) بغض النظر عن كوميديتيها المتعمدة أنه بيبحث عن حبيبته شيماء تحت العربيات
يمكن عشان هو لقبه ( سوسته ) ففي الغالب بيشتغل ( عفشجي ) عربيات وبيدور عليها في السيارات المحطمة ؟
وأنه بيستخدم لون زجاجة سبرايت الخضراء _مشروب غازي بطعم الليمون خالي من الكحول _ للإيحاء أنه بيشرب بيرة أو نبيذ لأن أغلبهم بيعبؤوا في زجاجات خضراء ،.
كل ده عشان يتحمل فراق شيماء .

اللي لفت انتباهي هي الجملة اللحنية البسيطة اللي بيستخدمها اطفال الطبقة الشعبية لما ينادوا على اصدقاؤهم ، بينادوا عليهم من الشارع عشان يطلعوا لهم من الشباك أو البلكونة ، إما عشان يروحوا المدرسة أو الدرس سوا ، أو عشان ينزلو يلعبوا شوية كورة أو بلاي ستيشن .
تلاقي الطفل من دول ينادي :
محمووواااوووود .... اسراااااااء ... بتموج حرف المد لحنيا ، كأنه بيردح ، او كأنه سارينة عربية مطافي بين العلو والخفوت ... نوع من العُرَب _ بضم العين يعني اهتزازات صولفيجية لتجميل اللحن ، زخارف أداء يعني _ فاكرين فيلم ( غبي منه فيه ) بتاع هاني رمزي و طلعت زكريا ، لما طلعت زكريا كان بينادي على هاني رمزي من الشارع كان بينادي ازاي ؟
((( سلطاااعااان )))
صوت العين ظهر في مكان العُربة ، و تقعير حرف العين ملازم لتلك الطبقة .

ابن اللذين الي عمل له جملة شيماء اللحنية دي من ضمن اسباب نجاح الاغنية على فكرة لأنها مضبوطة وفي مكانها لنفس الغرض .
الإيقاعات إياها بتاعة المهرجانات الي كلها صوت خبط على قاعدة الجرادل البلاستيك و الجراكن المقصوصة من فوق عشان يصفٌوا فيها زيت العربيات ، واحيانا صوت طرق المعادن بتاع جسم العربية أو معادن الموتور و الچكمانات .
المهرجانات طراز موسيقي بدأ بجامعي القمامة و طوره الميكانيكية .

مش مهم أنه ضحكنا و كان بيدور على بطة في الآخر
لان البطة دي ممكن تكون رمز لشيماء انثى بشرية بالفعل ، المصريين خصوصا الستات لما يحبوا يدلعوا انثى انها مثيرة جنسيا وحلوة يقولوا عنها ( ده انتي بطة ) .
و في حقيقة الأمر بالنسبة لطبقة المهمشين والفقراء دول البطة اهم مليون مرة عندهم من علاقة حب
سد جوعهم وبعدين فكرهم بالحب بين الجنسين .
((( دي بطة يا ابو العلا )))

#ماجد_الحداد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات