وزارة برزون

حبيب العربنجي

الحوار المتمدن-العدد: 6586 - 2020 / 6 / 7 - 20:49
المحور: كتابات ساخرة
    

...........
أخاف چان عدنا چم سفارة بالعالم بيها خير وناس مهنيين يعرفون شنو الدبلوماسية، بس النوب ولا تيفو، راح تتحول إلى مطاعم كباب أربيل والدعاية لماستاو هو ولير خوش ماستاو، والفلوس بجيب صاحب المطعم عائلة البرزنة حصرياً.. ليس لدينا فرع آخر .
من 2003 ولحد هذه اللحظة المباركة من تاريخ الديمقراطية بنكهة باربكيو ما شفنا وزير خارجية مهني گلبه عالبلد ويعرف شنو العلاقات الدولية والمصالح، نوب أستلمنا واحد أخذ الوزارة مقاولات ومكتب إعلانات لمشروع عنصري وگام يوكلنا خيار مر وزهر ويگول إلنا تفضل خوش خيار ، نوب أستلمها واحد ما نعرف بداية الجملة من نهايتها وما نعرف عدنا وزير خارجية لو خارجية وزير ، وهالنوب يستلمها واحد چان أوفيس بوي بمكتب باوكى مسرور، بس الناس إللي رايحين عد باوكي مسرور يگولون ماموستا فوئاد خوش يخدر چاي.
وزارة الخارجية العراقية طاپو عد عائلة البرزنة، ومن يعوفوها يعوفوها عد واحد مخبل بالتساوق الإنفلاتي في صومعة التشظي اللاواعي. ومسوين چطل بين خزينة الدولة بوزارة المالية وبين السفارات حتى غسيل أموال وتهريب أموال بالحقيبة الدبلوماسية ومحد يحاسب. خال الولد مسك الخارجية ثمان سنوات وحول السفارات الأوروبية لمكاتب حزب البرزنة وديمقراطية العشيرة، وگام يشتغل ثمان سنوات لمشروع الإستفتاء بمليارات وزارة الخارجية بس باوكي مسرور چفص بيها ما لعبها صح بتوقيت خاطىء، ومن صارت خزينة هه ولير فارغة إجى خال الولد وأستلم وزارة المالية، وبوري أكبر من بوري النفط صار يضخ الدولارات لعائلة البرزنة وكل برزون صار ملياردير، وكل برزوني عنده مليشيات بغطاء بيشمركة وميزانية من ميزانية الدولة للدولة بس ولا بيشمرگي عنده ولاء للدولة.
وهسة الدور على الأوفيس بوي فوئاد، رتب الحسابات في البنوك الأوروپية من أستلم وزارة المالية وي عبدالكردي، وهسة راح يروح للخارجية يتابع إدارة هاي الأموال بعد ما صارت الخزينة هب بياض. وراح تصير الخارجية مكتب تشغيل أموال البرزنة وكل برزون عنده حصة بچم سفارة أوروپية. وراح تشوفون وزارات معينة بأوروپا حصراً كلها لهم خاصة ألمانيا والنمسا والسفارات الأسكندنافية حتى يسوون لوبي ضغط وينجحون في الوصول لبرلمانات تلك الدول مثل ما صارت بالسويد والدنمارك.
العراق الحر الديمقراطي الفيدرالي صار بجيب البرزنة، وما أعرف ليش الله جاب إلنا ناس يحبون يلبسون موديلات مليانة جيوب عبالك مايكل جاكسون، هسة يا حظنا جيب إلنا واحد يستحرم جيوب ماكو، والنوب من جيب لجيب، ولا جيب يطلع مزروف عبالك مخيطين جيوبهم من جلد التمساح.
أعزائي
ملتقانا وإياكم في حلقة جديدة من مغامرات البرزنة في الحكومة القادمة والتي ستكون بواجهة جامخانة كبيرة في دكان باوكي مسرور مكتوب عليها : صنع في هه ولير.
............

#حبيب_العربنجي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل