شني هاي

حبيب العربنجي

الحوار المتمدن-العدد: 6453 - 2020 / 1 / 2 - 14:51
المحور: كتابات ساخرة
    

............
هسة وكت الهوسچية والشعبوية بكل مكان، حتى بأميركا، ترامب ما كان يصير رئيس لو مو هوسچي عالطريقة الأمريكية، وهسة وصل السرة يمنا ببغداد، وأكو طبخة لتقديم واحد هوسچي شعبوي عالطريقة العراقية عساس بلكي يقود الثورة للنصر وكلنا نفكر من أجل الثورة والشعب على رأي أبو يعرب في برنامجه الفكاهي الذي قدم لنا لأول مرة وجه تلفزيوني فكاهي هو مشعان.
المهم، هسة زمن الهوسات، وإللي يبيع هوسة أموره بالعلالي، شفت نفسك أمورك تعبانة أخرطلك چم شعار وألزگهن بفانيلة عتيگة بشرط أم التعلاگة وأنزل وهوّس بيهن بنص بغداد أو حتى بكيا وراح تشوف الكل يدفعون الكروة بدالك لأن الشعب مخدوع بالهوسات ويحب يشتري شعارات حتى لو بايتة ومحمضة مثل أمة عربية راقدة ذات رزالة خالدة. بس أكو واحد يجيب هوسات خوش نوعية وكلها علامة ( شني هاي) المصنعة خصيصاً بحسب الكاريزما الهوسچية مالته، وهذا الهوسچي هالأيام وصل في ربحية الهوسات مالته لأقصى منفعة لدرجة رشح نفسه يصير رئيس وزراء... من صدگ شني هااااااي.
وأكو سالوفة ما حاچيها ولا كاتبها گبل وهي أمنزهذا الشخص صاحب لازمة شني هاي يعرف يلتقط زين، يلتقط إشارة لو حركة لو أي شي إخر، ومن إلتقاطاته العجيبة أنه نشر دعاية بمجالسه ومدينته أنه هو اللي يكتب تحت أسم ( حبيب العربنجي)، وصار يقدم نفسه لأصدقائه وأصحابه عساس هو حبيب العربنجي، وأستفاد من هاي الدعاية وصار هو يلم شعبية بين الناس لأن هو صوت المظلومين والناس البسطاء لدرجة هو صاير العربنجي علمودهم. وهو مو أول واحد يدّعي هالشي، لأن قبله واحد گال آني حبيب العربنجي وقبض فلوس من الخنجر المسموم وفتح قناة وجريدة وإذاعة كلها لأن هو بحسب إدعائه يكتب بأسم حبيب العربنجي، وأكو واحد حصل لجوء وهسة گاعد مبربع لأن گال أمام لجنة اللجوء هو حبيب العربنجي، فلا تستغرب عزيزي القارىء عملية سرقات جهود الآخرين وخاصة جهود إللي يكتبون بأسماء مستعارة لأسباب عديدة وكثيرة، وأتوقع بالأيام الجاية راح نشوف واحد يگول آني شلش العراقي، والثاني يگول آني الشاعر البصراوي، والثالث أمير المكاميع والرابع عزيزي عزوز أو حتى حبزبوز مادام السالفة تايهة وفالتون.
وللحقيقة التاريخية أگول آني لا هذا ولا غيره، وإني ما عندي لا يدة باب بالسياسة ولا لزمة ولا أفتهم بيها حتى أصير رئيس وزراء العراق، يمعودين آني من صرت عريف خفر القاعة نص القصعة أنباگت والنوب رئيس وزراء!!! شني هاي! من نعلة على سالفتكم وسالفة سالفتكم ونعلة على حنونة ونهودة . آني ما عندي غير كيبورد أدگدگ عليه، وداعتكم نفس الكيبورد من أول يوم ولحد هسة، وشگد جتي موديلات كيبوردات جديدة ولابتوبات وآني بعدني بنفس الكيبورد وبنفس الزاوية. فيا عزيزي إللي طالع بالتحرير لو ما أعرف وين دير بالك لا تنخدع بالدعايات ولا الهوسات، ترى كوشر هوسات بنعل ونص بشرط بلاستك معاد أبو الريحة، ولا تنخدع بالدعايات إللي تقدم هذا وذاك، ترى الچذبة تبين بأول حكة وي الواقع، وخذلك چم لقاء من لقاءات المدعو شني هاي وشوف كمية الحقيقة من الهوسة اللي بيها.
صح هو شعبوي وبنى الكاريزما مالته وقدم نفسه بشكل غير، وهو بهذا الجانب ذكي يعرف لعبة القنوات التلفزيونية، وصارت له ملصقات عالواتساب بسبب شعبيته عبالك هاپي فيس في الإيموجي، وإذا أستمر الحال هيچ راح نشوف إيموجي ( شني هاي) لابس لباس بوكسر وشايل رمح ويوزع دباديب في الفالنتاين ويگول هاپي فالنتاين... شني هاي. وبعد چم شهر راح نشوف هو ما يفرق عن إيموجي ( الخرة) مكوم إللي نستخدمه في النقاشات الودية بيناتتا.
ويأسم العربنجية جميعاً أقول:
هاپي بوري يا شعب لأن تصدگون بهوسات ( شني هاي).
وكل عام والعربنجية بخير... مع وضع ( شني هاي) خارج القوس.

#حبيب_العربنجي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل