جاسمية ومجرشة ابوجاسم

مؤيد عبد الستار

الحوار المتمدن-العدد: 6218 - 2019 / 5 / 2 - 21:48
المحور: كتابات ساخرة
    

مشهد تمثيلي ساخر 27

* أكَول جاسمية .. شو هالايام ماكو لا حس ولا نفس !!
- اذا تقصد ماكو مظاهرات ولا اعتصامات .. انتظر ..يومكم قريب
* ليش يومنا ؟ احنا بايكَين .. ناهبين .. يوم الظالم قريب انشا الله .
- اذا انتو ما بايكَين ولا ناهبين .. لعد منو فرهد الخزينة !! ابويه لو أمي ؟
* أهووو .. عينج على الخزينة ، مثل الدجاجة .. تموت وعينها عالزبالة .
- الخزينة ، وفلوس النفط .. زبالة ، والله يابه منصف .. هاي منو علمك؟ مجلوب السلف !!
* يعني انتي ما عندج عدو غير مجلوب السلف .. الرجال كَاعد بالمضيف .. لا يم الخزينة ولا يم الفلوس .
- هسه صار مجلوب السلف ماله شغل بالخزينة .. والدولارات اللي يفرهدهن من البنك ويحولهن للخارج .
* جاسمية .. الدولارات مال الخلفوج ..! مال العم سام .. ناخذهن ونحطهن بالبنك ، منها واليها .. قابل احنا بايكَـيهن .. وداعتج بس تعقلين شويه وتمشين ويانه عدل لا اشتريلج قصر باجود رود يم قصر الحجية اليزابيث .
- شلون أمشي وياكم عدل .. يعني أقبل بالعوجه وآكل مال حرام ..!!
* انتي شمالج فاكه عينج علينه .. انتي بس غلسي شويه، لاتفضحينه .. كل شي يكَعد بمكانه .
- تاليها اصير مثلكم لا ذمة ولا ضمير .. شاكَول للناس ؟!
* الناس يا هو مالتها يا جاسمية .. انتي منو سائل عليج .. ما تكليلي منو يعرف فطيّم بسوك الغزل !
والله لو تبقين تصيحين منا للصبح ، ما حد يسمعج ويعرف انتي ليش حاركَه دمج .
- لا .. الناس مو غشمه .. تعرف زين منو الحرامي ومنو النزيه .. ويومكم قريب .. ما شفت صاحبكم شلون ضم روحه بنكَره لما طلعت ريحته و قفصوه الربع .
* يعني قصدج احنه منو حتى يومنا قريب .. اشو مجلوب السلف باسبورته بجيبه وما خذه من ابو ناجي .. شوكت مايصير شي يعلك باول طياره .. والباقي مثله لو للندن لو للمضيف .. اما داعيج فبوجهي اعبر الحدود مثل الغزال ....ماتشوفيني الا الصبح بالواق واق .
- ما تلحكَون .. جان كَبلكم ابو صباح لحك على لندن .. والله يعلكَوكم من قلاقيلكم براس جسر الجمهورية وتصيرون سالفة للرايح وللجاي .
* يابه جاسمية .. حسبالج الوادم مثل كَبل .. واحدهم اليوم ماكو براسه غير القيمة والهريسة .. راح ذاك الزمان اللي جان بي الكرخي يطلع مظاهرة ببيت شعر لما يكَول :
ساعة وكسر المجرشة وانعل ابو راعيها .
هسه حتى المجرشة صارت حلم .
- ما تصير حلم واذا ببالك حلم ليلة صيف، فشكسبير ما يفيدكم بعد ، لان العاصفة قادمة .

رابط الحلقة السابقة
http://www.ahewar.org/debat/show.art.asp?aid=631047

#مؤيد_عبد_الستار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل