جاسمية زعلانه على ترامب وابو جاسم

مؤيد عبد الستار

الحوار المتمدن-العدد: 6096 - 2018 / 12 / 27 - 05:50
المحور: كتابات ساخرة
    

مشهد تمثيلي ساخر 22
* والله مو خوش دكه .. يكولون امريكا متقدمة وتمشي كدام العالم الحر ، جا شماله ترامب الاكشر يجي على غفلة ...
لا من درى ولا من سمع .. شنو حرامي ؟!!
- جاسمية .. شنو حرامي .. الرجال مو زين عايف عيد راس السنة بامريكا وجاي عدنا .. هذا لو رايح لعمامنا لو لخوالنا جان دكوله اصبعتين وسووله عراضه منا للشوملي .
* هاي فوكاها .. تريدنه نسويله عراضه .. غير اليجي ضيف يدك الباب .. يكول بسم الله .. يكول احم .. خو مو يجفت علينا جفت .
- انتي ما تجوزين من سوالفج .. قابل هو ترامب ابن عرب حتى يدك الباب .. الامريكان اذا رادوا يسلمون يكولون هليو هليو ...واكيد من الطيارة كال لجماعتنا بالحكومة الله يحفظهم : هليوووو هليوووو .
* وين كال هليو هليو .. يابه ... اشو لا احد من الحكومة كال جاينا خطار ولا احد جابه بالطاري .. جان حظرنا قوري جاي على الاقل.
- جاسمية .. انتي صاير بعقلج شي .. هو الامريكي يشرب جاي .. شنو هو ابو جويسم .. هذوله ما يشربون الا ويسكي ، وبدال الجاي يشربون دبسي وكوكا.
* الدبسي موجود مو مشكلة .. الا الويسكو منين نجيبه .. مو السيد حرمه وكال حرام على شاربه وبائعه وناقله وجالسه وجار جار شاربه ...
خليتو ويسكي .. عزه .. صخام .. اشو بس عرك ابو الواوي ينباع قجغ بالولاية وحبوب تسودن الوادم ، حتى ابن صبحه كام يشرب عرك ابو الكلبجة .
- هسه هو ترامب عايز على الويسكي المغشوش مال حكومتج المجرقعة ، هو اكيد جايب وياه صندوك صندوكين ويسكي بمناسبة اعياد راس السنة للحكومة والحبربش .
*ها ابو جويسم .. اشو صارت حكومتي مجرقعة ، مو انت وربعك تركضون ليل ونهار وتطشون ملبس ودولارات حتى يصير مجلوب السلف بالحكومة ، وجماعتك واحد يجر بالطول وواحد بالعرض ، واحد يجر بوزير الدفاع وواحد يجر بوزير الداخلية حتى انكطع قيطان الحكومة وعلى كولة حسين نعمة :
بت بعد بالدلال / جاهل يعت بيه .... يبجي من اصيح عليه/ يكطعه من اخليه .
- اي والله ذكرتيني بمجلوب السلف .. اكيد هسه كاعد وي ترامب ومخلي رجل على رجل ويجريع بالويسكي .. ايباه .. ما عزمني .. جان اصفي دماغي ببيك دوغلي بلاك اند وايت واضرب جكاره روثمان اصلية مو جكاير مغشوشة مال حكومتنا المليانه تبن .. عبالك زقنبوت .. الله يلعنكم من حكومة حرامية .
وداعتج جاسمية كلاص ويسكي بلاك اند وايت يخلي الواحد يروح بفاله ويدك صفكه للامريكان والانجليز على هالمشروب اللي ينزل يهلهل بالبلعوم .. بس شسويله لمجلوب السلف ... اكيد راح مستعجل وما لحك يخبرني .. يالله على الجايات ..... ما طول ترامب خله رجله براس حكومتنه .. راح يتعلم ويجي كل يوم .. النفط موجود والرجال كالها من اول يوم .. يريد فليسات النفط بالكوه مو بالمروة .. احنا شخسرانين همه يطلعون النفط وهمه ياخذوه .. الف عافية .
* اي مو هو النفط مال الخلفوك حتى تتبرع بي . .. الف زقوم بحلك ترامب الاكشر ,, هذا النفط مال الشعب وهاي الفاسه مالتي واني طالعه مظاهرة على الحكومة الساكته على الحرامية واشوف منو يوكف بوجهي .... لازم اجيب أجلهم على ايدي .

رابط الحلقة السابقة
http://www.ahewar.org/debat/show.art.asp?aid=621752

#مؤيد_عبد_الستار (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل