جاسمية تغني أجلبنك ياليلي .. يا ابو جاسم

مؤيد عبد الستار

الحوار المتمدن-العدد: 6140 - 2019 / 2 / 9 - 12:35
المحور: كتابات ساخرة
    

مشهد تمثيلي ساخر 23

* يلوم المادره بعلتي شامرها ...
- ها .. أنا أخو المصرف جاسمية .. خير .. خو ما كو شي
* لا .. ما كو شي.. حكومتكم المابيها طعم .. لا شيش ولا كباب
- يا معوده.. بـس كَـولي... آنا عندج
* هاي من شوكت .. بعد ما فرهدت صندوك العرس
- أهو .. هم رجعنا على سالفة عام الاول .. هسه شتردين .. فلوس .. آنا حاضر !
* إي .. مبـيّـن عليك الخير .. شـو لابس نعال جديد ... من أين لك هذا !
- الله و اكبر .. هسّـه إنتي حاسدتني على هذا النعال ، كاعدتلي ركبه نص ، من عين لك هذا
* لا .. مو حجيك ثكيل اليوم .. مال شتردين آني حاضر .. هاي مو من عوايدك
- وداعتج جاسمية .. أخلي الزور خواشـيج والشط مرك .. إنتي تامرين .
* ما كَـتلي .. من أين لك هذا ؟
- شوفي جاسمية .. مجلوب السلف صار جبير بالوزارة .. واحنا راح نبربع
* هم رجعنا على المجلوب .. ما تفك ياخه من هالطلابة
- لا .. هسه أسـولـفـلج وانتي إحكمي .. مجلوب السلف صار
مدير التشريبات بالوزارة وآني أسـاعده بعد الدوام
* مدير تشريبات شـنو .. لا يكون تريد تكَـول مدير تشريفات
- ما أدري .. يكَـول صار مسعول الضيافة
* هاي هـيّه !!
- إي جا هيه قليلة... يا جاسمية .. ما يسوي الوزير شي الا هو يعرف ..واسطته
صارت يم نجم سهيل
* وانت شنو محلك من الاعراب .. تشرب شاي ويه الوزير بعد الدوام !
- لا .. شمالج كَلب سمجه .. أروح بعد الدوام ومجلوب يناوشني
هل الله قاسمه .. لان آني أمشّـي الواسطات
* يعني تاخذون رشوة .. خوش والله .. وجاي تكَـول إطلبي شتردين !
- إنتي ليش تسميها رشوة .. سميها عمل خير وهدية لوجه الله .. العقربون اولى بالمعروف .
* يا اقربون ! شـنـو إنت عم الوزير ... خال الولد .. لو مجلوب السلف من عـقـربون الحكومة
- خليها سكته يا جاسمية .. لاتـفـضحينه .. هاي الشغلة هم راح تسديها بوجهنه
* شوف ابو جويسم .. تجوز من هالسالفة تجوز .. لو أحلف بهاي المسية .. آخذ الفاسة
والبس السترة الصفرة والـم الناس عليكم
- جاسمية مجلوب السلف مواعدني بنعال تسكام حياوي .. إنتي ليـش تكَـطعين رزقنا
* اسمع ابو جويسم :
أجلبنك ياليل ثنعاش تجليبه .. طاري هالجلب أرجوك لاتجيبه



* رابط الحلقة السابقة
http://www.ahewar.org/debat/show.art.asp?aid=622632

#مؤيد_عبد_الستار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل