تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

جاسمية وطلابة عشيرة ابو جاسم

مؤيد عبد الستار

الحوار المتمدن-العدد: 6173 - 2019 / 3 / 15 - 00:07
المحور: كتابات ساخرة

مشهد تمثيلي ساخر 26
* بيش بلشت يا بو البشت
- اي جا شلون .. حسبالج الدنيا فالتون ... كلمن إلـه !
*شوف أكَـلـك ابو جويسم .. آنا لا أعترف بعشيرتك ولا بشيخكم
- خوش .. خلي يجي شيخ عشيرتكم ونتفاهم .. إحنا حسابنا بالمضيف
* لا مضيف و لا بطيخ .. آنا ما اعترف بهالسوالف .
- إحنا هم ما نعترف بالحكومة ولا بالمحاكم .. إحنا زلم
* يعني من تمشون على الباطل تصيرون زلـم .. ليش ما تعترف بالحكومة يابه ؟ مو تاخذ معاشك من عدها
- هي شجم دينار خرده حاسبتهَ منـيّـة حكومة علينا .. لوما مجلوب السلف جان متنا من الجوع .. !
* اي تركضون على النهب والفرهود ... مجلوب السلف يبوك وينهب مال الله وعباده .
- شنو شفتيه بايك جامع لو كنيسة ...؟ هي شويه دولارات مال النفط .. وكل الناس تشرب مـنّـه ، آنا ومجلوب السلف حالنا حال هالوادم .. بين اسبوع والآخر نحصّل إلـنا تانكي نفط بالواسطة ونبيعه على المولدات .. هاي هيه الله وكيلج ، محمد كفيلج .
* والتصريف مال البنك .. اللي يفرهده مجلوب السلف كل يوم جمعه بالمازاد .. ينهب الدولارات سكتاوي .
- جاسمية .. الدولارات مال امريكا ... مو مال الخلفوج ...خلي ينهبهن ألـف عافيه ..إحنا شراح نخسر .. هم تجينا شجم دولار صفح .. نطـلّع بيها مصرف لـيـلة الجمعة .
* من هذا ما تعترف بالحكومة .. تريدها شغل عشاير .. ثاري المضيف مالكم توزعون بيه المقسوم مال مجلوب السلف .
- اي جا منين مصاريف الشيوخ والمضيف .. قابل من تبرعات ربعج الحفاي .. واحدهم يقرأ ناصر حكيم بجيبه طويرجاوي .
* ربعي عايشين بعرق جبينهم .. مو مثل ربعك .. عايشين عاللغف . وين ترحون من غضب الناس ، والله لا يخلوكم مثل صديم تطمون نفسكم بنكَرة ظلمة .
- ايباه .. ظلي إحلمي بهذا اليوم .. الله لا ينطيج مرادج .. بـيـش طالـبـتـنه .. لا حكَـتـنه على هال جم دولار ... شوفيلج جاره وي شيخ العشيرة .. لازم تنطين فصل مال سوالفج العوجة .
* سوالفي عوجه .. ليش بايكه... ناهبه .. ؟
- اكثر .. شتكولين لربج بالاخرة .. تطلعين عالمودة .. وراسج مفرع .. العشيرة كلها كَابّه .. آني ما اكدر اوكَـفلج بالمضيف .
* يعني لو ألبس عمامة لو أدفع فصل .. منو يابه يحكم هنا .. شيخ عشيرتكم لو الحكومة ؟
- مو كَـتـلج إحنا ما نعترف بالحكومة .. إحنا نسمع الشـيخ والسـيـد .. همه يفصلون وإحنا نـلـبـس .. ماكو إعتراض .
* إذا إنـتـو ما تعترضون .. إحنه نعترض ... وباجر ألـم نسوان السلف ونطلع مظاهرة كَـدام المصرفية ، لو أكو حكومة وتدافع عن المواطن لو ناخذ الفاس والمكوار وندافع عن نفسنا .. والله نهجم المضيف على راسكم ... وان غدا لناظره قريبٌ.
- آنا أخو المصّرف ... ناظره قريــبـووووون ؟ هاي طلابه جديده ...!
رابط الحلقة السابقة
http://www.ahewar.org/debat/show.art.asp?aid=629697

#مؤيد_عبد_الستار (هاشتاغ)

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل