جمال مبارك .. وساعة الصفر !!

حسن إسماعيل

الحوار المتمدن-العدد: 1508 - 2006 / 4 / 2 - 05:51
المحور: كتابات ساخرة
    

يا مصيبة زرقا ..
جمال مبارك والمذيعة لميس عملوها فينا
فرغوا كل الرصاص والصواريخ واللغم اللي في رشاشات ومدافع وأرض المعارضة المصرية ..
من حركة " كفاية " اللي ملهاش غير قضية التوريث .. لمعارضة الحزبية اللي جالها " الحرحر " من قانون الطواريء .. مروراً بالأحزاب المرفوضة من لجنة الأحزاب .. للصحفيين اللي بيتسجنوا .. إلى قمة الهرم المصري – القضاة - .

كل دول بضربة قاضية خدوها من كلمات جمال مبارك ..
ده حتى المرأة يا مؤمن ، المكسورة الجناح احتمال يدوها " كوتة " . ولو هيدوا المرأة بالتأكيد هيدوا الأقباط . يعني مالكوش حجة .

جمال كان واضح جداً وقال كل الإجابات اللي مش متوقعة وبالذات قضية الرياسة ورغبته في السلطة .
هل فعلاً حالة الإصلاح اللي بيقودها هي السجادة الحمراء اللي بيحطها قدامه للطريق نحو العرش أم أنها حباً في الوطن بحق وحقيقي ؟

وما أخبيش عليكم ، جالي أكتر من 1000 تليفون بعد البرنامج - بإعتباري رائد من رواد حركة التثوير في مصر – لدرجة إني كنت عايز أعمل زي لميس وأنقل التليفونات اللي جاتلي على الهواء مباشرة من أجل شفافية الثورة اللي لازم نواجه بيها شفافية جمال .

وكان إجمالي التليفونات بيصب في خانة التشكيك في كلام جمال ، وكأنهم بيقولوا : أسمع كلامك أصدقك ، أشوف أمورك أستعجب .

وطبعاً انتوا عارفين إن شعبنا المصري مبيعجبوش العجب ولا " جمال اللي كله أدب " .
وكأنهم " مالقيوش في الورد عيب ، قالوا يا أحمر الخدين " .

لكن الحقيقة علشان محدش يتهمني بالعمالة ولا بالتمويل من جهات داخلية ولا أجنبية ، إن الشعب برضه يا جماعة معذور ، هيصدق إزاي وهو مشفش يوم حلو ، ومعش غير العيشة الهباب .
الشعب فعلاً محتاج وقت وهيصدق لوحده لما يلاقي الكلام ده بجد وبيتحقق مش دعاية إعلامية .
لما يشوف الطواريء اتشالت بجد ، وميغيروش إسمها ويخلوه " قانون الإرهاب " .
ويشوف الشرطة في خدمة الشعب ، وينتهي عهد التحرشات والتعذيب والانتهاكات ، والمخبرين ، وداء الأمن المركزي .
هيصدق لما يلاقي الإصلاح الاقتصادي قضى على البطالة .. ولما يشوف تداول السـُلطة بعينه .
ويسلم في الشارع على اللي كان رئيس ، مش يقرا له الفتحة ولا يدعي عليه ..
لما يلاقي مجلس حقوق الإنسان فعال ومؤثر والصحافة حـُرة بجد .

في الوقت ده يا جمال الشعب هيصدق . بس على العموم أنا عجبني جمال .
والحقيقة ، لو هو مش ابن النظام ده اللي عقدنا وخصانا .. ومش واحد من الحزب الوطني اللي بيظهر لي في الكوابيس بالليل ..
كنت غنيت له : اخترناك
لكن هنعمل إيه ؟ نصيبه كده ؟
ونصيبنا اللي تملي بيلاقي العضم في الكرشة ..
ولما ييجي اليوم اللي بيلاقي حاجة عدلة في الكرشة يكون زهق وقرف من ريحة الكرشة .

وعموماً يا أصدقاء الثورة البيضاء ..
يا رفاق النضال ..
يا شعب مصر العريق ..
الأيام القادمة سوف تشهد على مفاجئات لن تقل خطورة عن مفاجئات جمال مبارك لنا ..
واللي خلانا ننتظر من 1952 لغاية دلوقت ، ونصبر صبر أيوب ..
هيخلينا نستنا حبة الشهور اللي جاية ونشوف اللي هيحصل ..
يا إما مصر تاخد إفراج وتبقى دولة حـُرة
أو تبقى عزبة مـُرة ..
وساعتها هأغمز لكم ودي هتكون ساعة الصفر .

#حسن_إسماعيل (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل