أخبار الإخوان من إذاعة اتقوا الله

حسن إسماعيل

الحوار المتمدن-العدد: 1439 - 2006 / 1 / 23 - 09:23
المحور: كتابات ساخرة
    

أخبار الإخوان من إذاعة " اتقوا الله "
مبروك عليك يا مصر ..
الإخوان كسبوا وكان ممكن يكسبوا أكتر لو الحكومة الفاسدة مزوَّرتش ومبلطجتش ..
لكن هتعملي إيه يا مصر .. نصيبك كده
إن ربنا يبتليكي بحزب فاسد ، وبجماعة عالمية بتحاصرك تحت الأرض وفوق الأرض وببشرك يا مصر اللي شفتيه في ماضيكي كوم واللي جاي كوم تاني خالص

كنت زعلانة من السينما النظيفة .. أهو جالك اللي مش هيخلي فيه سينما خالص .
ارتحتي يا مصر .. " اتبطيتي "
كنت زعلانة من قانون الطواريء .. أهو جالك اللي هيعملك " جماعة الأمر بالمعروف والنهي عن المنكر "
وبدل التعذيب في لاظوغلي وأبو زعبل .. هيبقى في الشوارع وعلى أعمدة النور ..
اللي بيتجلد علشان عاكس بنت منقبة " ما هو مبقاش فيه بنات سافرة متبرجة " .. خلاص
فاكرين يا اولاد الميني جيب .. والتي شرتات .. والبادي .. والستوماك .. والبنطلونات الجينز واللي مش جينز .. والبرمودا ..

واللي بيترجم بالحجارة مع صيحات الله أكبر " حاجة تفرح والله "
وأكوام من الروايات والقصص والشعر بتتحرق قدام عيون الزناديق اللي كتبوها " وزناديق البيبسي " .. اللي واقفين في طابور الاستتابة ..
واحد واحد يا كفرة

كنت زعلانة يا مصر من مقص الرقيب .. اشربي بقى
شالوا المقص وجابوا بداله مقصلة
وسجنوا الرقيب .. وجابوا بداله " مسرور السياف بتاع شهريار "
وهات يا قطع .. وهات يا دفن
مبروك الخطة الخمسية اللي جاية كلها للحانوتية

وكنتم زعلانين من وزير الإعلام وأنه مش مديكوا حرية تعبير للأحزاب وللجمعيات غير الحكومية ..
مبروك عليكم التليفزيون .. خلاص طلعلوا أمر ببث مباشر للخمس صلوات ولخطب المرشد العام ..
وإغلاق كل المصانع والمحلات والشركات في توقيتات الصلاة .. واللي هيتمسك ما بيصليش هيحطوا السيخ المحمي في صرصوره ....
وسوف يتم تأميم الأحزاب كلها وضمغها في حزب واحد اسمه حزب الطاغوت .
ولو فيكي راجل يا مصر يبقى يروح يعمل استمارة عضوية
وسوف تلغى كل التيارات من " كفاية " لحد جنوب الصعيد ويبقى فيه تيار واحد هو تيار
" ادعوا له .. ادعوا له "

وسوف تكون شروطه جلباب قصير وشبشب زنوبة ووجه مكفهر ..
ويا سلام على الأقباط اللي مقسمين نفسهم .. حبه مهجر .. وحبه وطني .. وحبه إخوان .. وواجعين دماغنا بالخط الهمايوني .. وبالقانون الموحد لدور العبادة .. وأسلمة القاصرات
كلهم دلوقتي يا مصر مشغلين أغنية الست أم كلثوم " قل للزمان ارجع يا زمان " .
ويا عيني عليهم مش عارفين حتى يبقوا مهجر . قفلوا عليهم الأبواب يا باشا ..
وبيلموهم كلهم في عربيات نقل أول كل شهر علشان يدفعوا الجزية ..
وسايبين حبه في الكاتدرائية بيطلعوا في التليفزيون كل شوية بيقولوا كله تمام والمصحف الشريف .. والعشرة الكرام .. مبسوطين واخدين حقوقنا تالت ومتلت .. " الله يرحمك يا همايوني " .

ومن أحلى الأخبار في قناة " اتقوا الله " خبر بيقول :
نحمد الله عز وجل لأنه تم كشف المستور وزيف تقارير الجمعيات غير الحكومية الطاغوتية ، التي كانت تعلن أنه يوجد في أرض الكنانة بهائيين وشيعة وقرآنيين وبعض الأقليات العقائدية الأخرى . ولكن نحمد الله ، بعد التنقيب والفحص والإستقصاء وجدنا أنه لا يوجد في أرض الكنانة ولا واحد لا يؤمن بدين الله .
والسلام عليكم ورحمة الله وبركاته .

مبروك يا مصر .. العدل انتشر والخير حضر ..
والإخوان نازلين .. مطر

#حسن_إسماعيل (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات