جاسمية تصجم ابو جاسم : استهلس الواوي على اكل الدجاج

مؤيد عبد الستار

الحوار المتمدن-العدد: 5910 - 2018 / 6 / 21 - 04:59
المحور: كتابات ساخرة
    

مشهد تمثيلي
* ايه .. هم هاي دنيه وتنكضي وحساب اكو تاليه ..
- يبين اليوم جاسمية صايره فيلفوسة اخر زمان
* شلون ما صير فليفوسة والدنيا مكلوبه
- خير .. هم شكو .. شنو الصار .. هم انكلبت الدنيا
* شلون ما تنكلب الدنيا وصويحبك يبين هم راح يصير بالحكومة
- ما تفكينه من الحكومة .. هو اكو دولة .. حتى تصير عدنه حكومة
* لا .. لا .. ما طول بالسلة عنب .. اكو حكومة
- هاي النوب شنو سالفة السلة والعنب .. ليش هو اكو عدنه ماي حتى يصير عدنه عنب
* يعني الا ماي .. انته شمالك ما تشوف ابعد من خشمك .
- انا اخوج .. انه ما اشوف ابعد من خشمي .. ولج والله اشوف الطير الطاير بالسما السابعة
* ابو جويسم .. انا مو كصدي عيونك تشوف .. انا كصدي عقلك
- والله جاسمية انت حيرتيني .. اريد اوصل وياج على راي ما مش لا بالسما ولا بالكاع
* هسه ما علينا .. العنب يعني النفط .. خليني اكولها لك بسراحة
- شجاب العنب على النفط .. اشو صرتي تحجين شيش بيش
* ابو جويسم .. يعني ما طول اكو عدنه نفط .. تصير عدنه حكومة
- ليش هو النفط جديد .. اشو من قالوا بلا عدنه نفط .. يعني شنو الجديد يرحم والديج
* الجديد .. الجماعة حادين سنونهم على النفط .. ويردون يلفطوه لفط .
- هو شبقه ما لفطوه .. دخليهم يلفطوه والله كريم .. احنا النا الله .
* شنو النا الله .. يعني قابل الله يدندل النا بالزنبيل .. لازم نشوف النا جاره .
- بس لا تكليلي جيب الفاس وتعال نطلع نسوي ثوره
* لا .. لا تخاف .. مو مال فاس ..
- لعد ما ليش بروح ابوج .. خو مو مال فشك وطك تفك .
* اهوه . .. ابو جويسم .. ينرادلك خلك
- اي دفهميني هي بت الحلال .. اذا لا مال فوس ولا مال تفك .. لعد ماليش ما تكليلي .مو راسي صار طبل من وره سوالفج العويصه والمعروجه
* ابو جويسم .. هاي مال صفنه .. يراد اله صفنه طويلة
- جا اذا صفنه بسيطه .. اخذي صفنات .. اسهل من الصفنه ما مش
* انشاالله تريد تصفن وتكعد كبالي
- جا شلون وين اكعد .. بالغار مثل النبي صلى الله عليه وسلم ، انتي مو تردين صفنه .. هاي انا راح اصفن
* خويه ابو جويسم .. الصفنه يعني ينرادله تشد حيلك وتشوف دربك
- اني ادري تاليها اشك زيجي واطلع من هدومي ، شاشد من حيلي ، هو بكه عندي حيل اشده ، انه اريد اكضي يومي واكل لكمة خبز وابوج الله يرحمه .. لا اشد حيلي ولا هم يحزنون .
* ابو جويسم هاي جديدة مال ولا هم يحزنون .. هاي منين لاكطها .. بس لا من صويحبك مجلوب السلف
- ما تجوزين من مجلوب السلف .. حتى الصناديك هم احتركن من وره سوالفج
* يعني لو ما محروكات الصناديك جان صويحبك يحصل على سلة العنب
- بويه هسه ما نريد العنب .. نريد السله
* كله لصاحبك مجلوب السلف يمش بوزه .. ما مش لا صنادك ولا اصوات ..
- ليش هو اش ناكصه .. باجر يحسبوهن ويطلع اول واحد بالمجلس .. ما طول عمامه شادين له راس بالعشاير والمضايف .
* شوف ابو جويسم .. اذا صويحبك طلع له مكان بالمجلس اني اكص ايدي .. ما يحصل كل شي ماطوله ياكل مال الوادم .. ما يصير براسه خير
- ما تكليلي شماكل .. قابل ناهب الخزينة
* والله الناس كلها تعرفه ، يبوك الكحل من العين
- لا .. هنه شويه فليسات مال مقاولات خسر بيهن
* والنوب يريد يا خذ مقاولات من جديد من يصير بالمجلس
خوش : يعني استهلس الواوي على اكل الدجاج .

#مؤيد_عبد_الستار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات