حكاوي قهاوي في الإقتصاد

تامر البطراوي

الحوار المتمدن-العدد: 5571 - 2017 / 7 / 4 - 19:08
المحور: الادارة و الاقتصاد
    

هو اقتصاد الدولة ايه؟ يعني ايه دولة اقتصادها كبير او اقتصادها قوي... الاقتصاد الانتاج بمعنى دولة اقتصادها كبير يعني بتنتج كتير .. كتير يعني كام كيلو يعني؟ لا مش بيتقاس بالكيلو بيتقاس بقيمة الناتج دا بعملات كتير اهمها الدولار .. يعني مثلا دولة مفيهاش غير بير بترول كل انتاجها بيعمله البير دا وبيعادل 200 مليار دولار هتبقى دولة اقتصادها اكبر من دولة بتصنع وتزرع وخدمات ومكفيه نفسها وبتصدر لكن اجمالي انتاجها ب150 مليار دولار مثلا .. قالك طالما إن الانتاج هو اقتصاد الدولة .. والانتاج دا بيعمله المشروعات أو الشركات يبقى احنا لو شوفنا طريقة نكبر فيها المشروع أو الشركة وطبقها كل المشاريع في الدولة فكبرت وانتاجها زاد يبقى احنا كدا كبرنا الإقتصاد القومي للدولة ..
طب صحيح ليه اللي بيعمل مشروع صغير سواء محل تجاري أو ورشة أو مزرعة مبيكبرش خلال عشرة أو عشرين سنة ويبقى مشروع متوسطة ثم كبير ثم عملاق؟ وغالبا إما بيفضل مشروعه متقزم أو بيكبر بمعدل نمو بطئ؟! ..
قالك في عوائق السوق على قد ما السوق عايز أنا بنتج وبالتالي بكسب وبتوسع .. السوق نايم .. عبارة بنسمعها دايما من أصحاب الأعمال كتفسير لضعف انتاجهم وبالتالي محدودية مكسبهم .. مشكلة السوق كعائق انه شبه الحلقه على قد ما السوق بينتج على قد ما بتتولد فيه قوة شرائية تقريبا وعلى قد القوة الشرائية اللي بتتولد برضه تقريبا السوق بينتج .. ده حلقة السوق بيدور فيها سواء كبيرة أو صغيرة .. طب عشان نوسع الحلقة ده نعمل ايه؟ قالك انفتاح .. وسع قاعدة الطلب والناس تشتري منك أكتر .. بس المشكلة ان ممكن انت اللي تشتري منهم اكتر وبالتالي انتاجك يضعف وقوتك الشرائية تضعف والحلقة تصغر بدل ما تكبر.. الموضوع معقد!!
في عندك بقى يا معلم عوائق فنية .. يعني ايه؟ يعني انتاجك دا تمامه .. تعمل انفتاح .. تروح تبوس ايد الخواجه بره عشان يشتري منك .. محدش هيشتري اكتر من اللي بيشتروه.. طب ليه؟! يا اما شغلك تعبان .. يا غالي وسعره مش مناسب .. وبالتالي فضعف مهارتك في ادارة شغلك من حيث جودة الناتج أو تناسب سعره من وجهة نظر الزبون ومش من وجهة نظر سعادتك هي السبب في محدودية سوقك..
عائق تاني وهو محدودية عائد الأعمال الصغيرة وامكانية الادخار .. صحيح الأعمال الصغيرة نسبة العائد بتاعها كبير لكن حجم العائد نفسه صغير ، بمعنى مشروع تكلفته 12 الف ممكن يكسب في السنة 12 الف فعلا ، يعني نسبة 100% لكن الالف جنيه كل شهر دول يعملوا ايه؟ حتى لو أكبر من كدا .. هيبقى عنده التزامات معيشية كتير ليه ولأولاده وبالتالي فأي عائد هيروح بلا رجعة .. بعكس المشروعات الكبيرة فبالرغم من أن نسبة العائد بتكون صغيرة لكن حجمه كبير وممكن يتعمل بيه كتير .. مشروع بقيمة مليار جنيه لما يكسب 10% يعني كسب 100 مليون ممكن المشروع يحجزهم لأن المساهمين بيكسبوا بالمضاربة في سعر السهم ويعمل بيهم بلاوي...
في عوائق تانية لتوسع الاعمال من منظور الأعمال بس دول أبرزهم ..
ناس تانية قالتك الموضوع مرتبط بشكل أكبر بالدولة ودورها .. يعني مثلا لو الأعمال ده موجوده بمكان وشيلنا منه عنصر الدولة الوضع هيبقى أفضل .. لأن الدولة بتقيد بتنظيماتها وبتاخد جزء من الناتج بضرايبها .. دا غير اللي بتاخده لما بتطبع ورق وتسحب الإنتاج من السوق فالورق يكتر والإنتاج يقل ويغلى .. الدولة لو دخلت بتقلها وعملت مشروع بمبرر تقديم خدمة عامة مين هينافسها من مشروعات الأعمال الخاصة؟ محدش هيقدر ينافسها في ملعبها طبعا .. وبالتالي حتى الأعمال الموجوده هتضعف بدل ما هتكبر .. طب نحرر السوق والدولة تبيع أصولها الإنتاجية ومتنتجش حاجة عشان المشاريع الخاصة تكبر؟ طب ما انت كدا هتضيع أصول الدولة اللي هي جزء من ممتلكات الأفراد وهتتصرف الفلوس ده في كلام فارغ استفدنا ايه؟! .. طب ما نبيعها ونشتري بيها أسهم في شركات خاصة ونوزع الأسهم ده على الأفرد وتفضل تديرها الدولة برضة بطريقة ما؟! .. طب ينفع الدولة تتدخل لدعم الأعمال من مدخل تنمية عوامل الإنتاج زي مثلا تنمية عنصر الأرض بشق الترع ورصف الطرق .. وتنمية عنصر العمل بالتعليم والتدريب... عنصر العمل دا مشكلة المشكلات .. ليه؟! لان الموضوع مش مجرد فلوس بتترمى .. لكن دا مرتبط بالعمق التاريخي للمجتمع.. يعني المجتمع مش طالع من فراغ دا ليه ابعاد ثقافية وفكرية ونفسية معينة هي اللي هتتحكم في شكل تنميته .. مش هينفع تستورد ثقافة أو نفسيات حديثة وتركبهم على البني آدمين الموجودين وغالبا الجيل القديم ينقل اللي جواه للجيل الجديد.. عوامل كتير بتأثر في الموضوع فضائيات وسوشيال ميديا ودول بينية وعمران.. عمران؟! آه العمران طبعاً .. في مقولة في العمارة بتقول إحنا بنشكل المباني اليوم لتعيد تشكيلنا هي في المستقبل.! .. سلاموعليكو.

#تامر_البطراوي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل