مقطعان صغيران وقصيدة للعيد 82 للحزب الشيوعي العراقي

حامد كعيد الجبوري

الحوار المتمدن-العدد: 5123 - 2016 / 4 / 4 - 17:11
المحور: الادب والفن
    

مقطعان صغيران وقصيدة للعيد 82 للحزب الشيوعي العراقي
المقطع الأول مهدى الى الرفاق والأصدقاء المعتصمين بساحة التحرير وبساحات التظاهر في المحافظات العراقية
**
دنيه وصفت للطرطره/ الحفاي والمتغتره
المتسننه المتشيعه/ المتهوده المتنصره
أمي اليقود القافله/ ويستبعد المتحضره
ياهو التسأله يدعي/ أمحصل شهادة دكتره
والجان عاكب بالضعن/ هسا تخلف ليوره
صدام لبسنه النعل/ ونتعير أبهل المسخره
واللي تنيناهم عمر/ نزعونه حتى القندره
****
المقطع الثاني مهدى للرفاق والأصدقاء المهنئين بالعيد ال 82
للحزب الشيوعي العراقي
**
أحنه الفرح والطيبه/ وأحنه للمجد عامود
سوينه الفكر نبراس/ حراس الوطن وحدود
المشانق بيها بصمتنه/ واضح ما يريد شهود
شيوعي أموقع أبدمه/ وتاريخ الحزب موجود
ثقافتنه ابفكر موسيف/ ومرات الحزم مريود
عمرك ثاني وثمانين/ وجناتك حمر وخدود
نناطر عيدك الميه/ وعزمك عالشباب يزود
بناتك هلهلن نشوة/ ورفاقك نخوتك وزنود
باجر نحصد الفرحه/ ونذب الثياب السود
وأنطش الفرح شدات/ على راس الوطن وورود
أهدي الكل محب بوسه/ وبوسه الخد ( أبو داوود )
***
ديوان البخيت
قصيدة العيد 82 للحزب الشيوعي العراقي
يالشايل همومك والفرح عالباب/ يا يوم الـتبسم ثكلت أهمومك
عرفتك بالزغر هسا أبعمر شياب/ ما شـفـتك أمعيّد سود بهدومك
مـلجوم الجرح لسه الجرح ما طاب/ تزداد الجروح أجروح كل يومك
حـبيت الجنوب أبنخلة السياب/ ومن كاع الشمال أورودك أشمومك
لا هادنت ظالم لا بست أعتاب/ ولا دنكت راسك ربعك وكومك
فراشك مو حرير أفراشك العطاب/ نايم مطمئن أمشردغ بنومك
لا عاكك شتانه ولاشمس نص آب/ خاويت الشغيله وفلحك أنجومك
بُهرني بيرغك من شفته كله أخضاب / من دم الرفاق ونزفة أدمومك
**
تعلمت الشعر والمدرسه النواب/ قريت ( أم وبراءه ) وبانت أرسومك
ومشت دربك رفاقك والدرب تيزاب/ تهتف عالمشانق مجدت أعلومك
وغيرك بايع الأوطان والأحباب/ يسبح بالرذيله ولا رخص سومك
ينوجولك غدر ويكشّرون أنياب/ لا عفت الفريضه ولا بطل صومك
يا عالي البخت هذا الدهر دولاب/ لاويت الزمان أبحيلك أوزومك
يالتندل طريق الشعب باب أباب/ تجوّح كل جرح عطابة أكلومك
**
حـبيت الكصـب والحـلفه واللبلاب/ مسكين ويتيم أيصير مخدومك
تحب كل البشر تدريه من أتراب/ متحابي أخو ولاخال لاأعــمـومـك
أكصدت درب الشهاده أتصير ألك محراب/ وحـبيت العراق ومحد أيلومك
جـافيت السيوف وثقفت بكتاب/ وحدت للسيوف أبشعبك أخصومك
حـمـامـات السلام أتوكر أعله أحراب / ميهمها الذبح تستنطر أقدومك
مـهـظـومه الشطوط الجاورت أجـناب/ فرات ودجله ناشف ينتظر ديمك
يديوان البخيت ويا مضيف أطياب / يربعة كل عشيره أكليطهم دومك
***
يمدوخ الدنيه وتاج للأحزاب/ كلها غيوم صيف وتمطر غيومك
يبو الأيد النظيفة ولا خنت بحساب/ ربيت الرفاق أبهذا مفهومك
نبراسك (سلام ) وخيرة الأصحاب/ ( فهد صارم ) وفه وماخاب تعلومك
يا واسع الراي أبفكرك الثقاب/ يا صدر المضيف الغير لملومك
شل جرحك يغانم لا يصير أعـتاب/ شد أيدك الشعبك كومك أترومك
بعدنه أبصف شيوعي وللفكِر طلاب/ شيطان البزرنه ونجلي كل ظيمك
***

#حامد_كعيد_الجبوري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل