عذراً ياوطن

عادل الفتلي

الحوار المتمدن-العدد: 5105 - 2016 / 3 / 16 - 20:36
المحور: الادب والفن
    

اذا زعلان كل الحگ الك والله ... مانحچي ونقاطع حچيك نهابك
واذا تعتب علينة الموت ارحم صار ... هم ذنوبنة وفوگاهن عتابك
واذا خنَاك چا نرجة الشفاعة شلون ... يعني احنة كفرنة وگرب حسابك
واذا حگنة عليك اسمعنة نترجاك ... وبعدهه لوردت گطعنة بانيابك
شبگلبك علينة وخاف مغتاض ... يمك چنة ماعفناك والله بساعة صوابك
تكترنة صدگ بس والله معذورين ... وعدنة اسباب يمكن تغلب اسبابك
اعتبرونة لفو وماالنة كل حگ بيك ... وحسبونة نزل بس همه اصحابك
حصتنة المگابر هاي صح تمليك ... وشفت انتة بلحمنة اشنهشت چلابك
ماچهبوك غربة ونهبوا البيك ... وانتة التدري منك بيك سلابك
ولاجاك الغزاك ابكيفة واتعناك ... بس هو النذل لحلوگهم جابك
اتشلبه المعاصي وهو حظ مابيه ... ولاهو الگعد ضل ينعگ غرابك
اسد غاير علينة بلا ذنب دوم ... ومطي بصفوان دنگ وقَع كتابك
الگال انتة طحت يخسة بكثر ماگال ... بس رزقة انگطع من جيب عرابك
وانچلبوا عليك امن الصنم طاح ... حتى المايطلبك صار طلابك
ولاچنهم امس من ايدك يلگمون ... ولالبسوا ابد من فضلة ثيابك
گضت گلنة واجتنة انوب جوگات ... ماجاعوا مثلنة ولهموا ترابك
عالحاضر لگوهه وجاهزة التنصيب ... كراسي وعالجثث نصبوهن اجنابك
مفتوحه والك ياهو اليجي يفوت ... وسهله الطبَة والعلاس بوابك
فرصة وابلاش بلا جوازات ... وچانوا برَة مضطهدين غيابك
مو صعبه الشهادة مريدي يندلوه .... بس كلفة الجهال تصير طلابك
الطلع منك حرامي شو رجع دكتور ... وعمرة ماقراك وگلب كتابك
ومن لندن گبل لمجلس النواب ... وياكثر الجناسي ابجيب نوابك
وجيل يسلم لجيل المفاتيح ... وكلهه اتعلمت تتمحچل ابابك
خيرك لوتوزع يترس الكون ... ومن فضلات خيرك تكتفي احبابك
وصار اچم سنة ابلحمك يملخون ... يمتة يفرج الله وتشبع احزابك
عمت عين الوكت ولدك گضوا موت ... شتترجة بعد تحميك شيابك
گلوب اهلك عليك وتعرف شبيك ... بركان وتفور ولازم اعصابك

#عادل_الفتلي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات