فرنسا البقره الضاحكه واللعب عالسعوديه وايران

جان نصار

الحوار المتمدن-العدد: 5099 - 2016 / 3 / 10 - 16:43
المحور: كتابات ساخرة
    

فرنسا هي اللي تنتج اللافاش كيري جبنة البقره الضاحكه وبيناتنا هالايام هي ضاحكه على طول لانها بتلعب على الحبلين اي انها مع ايران ايرانيه ومع السعوديه سعوديه. اليوم هيي المستفيد الا كبر من ميمعة الشرق الاوسط والخلاف الشيعي السني اي الايراني والسعودي,,و عندهم ولا كانوا موجود في خلاف ويا سبحان من وفق راسين بالحلال.
الغريب انو حكام التراللي السعودي وحكام الملاللي الايراني عارفين انو فرنسا اليوم بتلعب عليهم وبتضحك على ذقونهم ورافعه شعار الله يزيدكم هبل ويزيدنا مصاري وهيك ختم بدهم هيك مزبطه زينا.
شوفوا يا جماعه الرئيس الفرنسي هولاند هو افشل رئيس عرفته فرنسا بالعصر الحديث يفتقر للكارزما والشعبيه وسياسة بلده على زمنه في مهب الريح واذا صارت انتخابات فالاخ راح يغني بالهوا طاير طاير .
لكن السعوديه وايران وهبلهم وخلافاتهم فادوه كتير ورفعوا من اسهمه .
راح تسألوني كيف؟
تعلمنا بالمدرسه واحنا ولاد صغار انو 1 زائد واحد يساوي تنين.والدول الواحد زائد واحد فيهم همي السياسي والاقتصاد وهمي عماد الدول.. الاقتصاد القوي والسياسي المنفتحه والقويه وتشعب العلاقات واختضان الفرقاء,, وهدول اجو على رجليهم للفرنسين نتيجة الميمعه واختلاط الحابل بالنابل في منطقتنا, وهولاند والسياسين اللي حوالي عرفوا من اين يوكل الكتف وغنوا للسعودين والايرانين اغنية تعاليلي يا بطه.
ايران بعد رفع الحصار والعقوبات واسترجاع المليارات المحجوزه في الغرب صاربدها تقوي اقتصادها وتتجه لاسواق الغرب غير السوق الروسي والصيني ,,ولاقت مردها و اللي بجيب على طلباتها فرنسا, لانو امريكا هي الشيطان الاكبر رغم الاتفاق معها على الملف النووي فالعداء طويل والشيعه يكرهون الشيطان الاكبر اما بريطانيا فهي الشيطان الاصغر وهي الحليف لامريكا فبلاهم.
فرنسا كانت تحت الطلب خصوصا وبعد زيارة الرئيس روحاني والذي استقبل فيها استقبال الفاتحين فرائحة المليارات تفوح من عبائته والفرنسين اخدوا على قد عقلوا وقالوا زي ما بقول المثل :التجاره شطاره.
برج ايفل والشانزلذيذي لابسوهم تشودر مشان ارضائه وتكلم كل الساسي الفرنسين بالفارسيه وشو بتحب ايران تسمع سمعوها..
الاخ روحاني صابتوه الحميه ونزل على صفقات وعطائات وعقود مع شركات الطيران طلب مجموعة اير باص وانفتاح على شركة بيجو وعقود بالمليارات شو بدكم اسمي لاسمي ورجع على بلاده وفي بجعبتوه صفقات واتفاقيات اقتصاديه احيت وراح تحي الاقتصاد الفرنسي لسنين طويله.
المفارقه الغريبه انو السعوديه وايران بتفقوش ولا على اشي, والكراهيه والعداء واصلين للسما ومع هيك بكلوا اليوم من صحن واحد ,,وعلى ما يظهر انو المطبخ السياسي الفرنسي عندو مينيو ولائحه طعام ترضي الطرفين.
وزير خارجية السعوديه الجبير صار شري مري على فرنسا فالاخ على ما يظهر يتقن الفرنسيه عدا الانكليزيه ويقال الالمانيه, وهو وهولاند متفقين و سبحان الخالق بحكوا نفس الجمل خصوصا في موضوع رحيل الاسد.
صفقة السلاح اللي كانت رايحه للبنان بلعوها السعودين ودفعوا ثمنها شندي كاش وحولت للمخازن.
ولي العهد نايف بزياره لفرنسا واعطائه اعلى وسام وبعدها او قبلها ولي ولي العهد محمد كمان بفرنسا وصارت فرنسا مربط خيولينا.والسعودين بقولوا للفرنسين اذا ايران كانوا معاكم كرماء فاحنا اكرم .
ليش السعوديه يا ترى داقه بفرنسا ومن وين هبط هالحب .
لانو السعوديه زعلانه على امريكا وحردانه لانهم طقعولهم بالملف السوري ومش معبرينهم وفي بروده في العلاقات ولانو بريطانيا كمان بلشت البروده بعد المطالب بعدم بيعهم السلاح ومحاسبتهم دوليا والاتحاد الاروبي كمان مولع على السعوديه ويطالب بمحكمتهم على جرائمهم في اليمن ودعمهم الارهاب .
مين فضل وبدو يحل مشكله الاقتصاديه والسياسي غير الفاشل هولاند فرنسا فاقتنص الفرصه.
رغم الهجوم الارهابي على فرنسا الا ان هولاند ما بحمل السعودين الذنب وبعتبرهم انهم بحاربوا الارهاب بعكس كل المجتمع الدولي اللي صحي لهالمسائله وصار يوجه اصابع الاتهام للسعودين.
غير تحمليهم همي والايرانين انهم اصل البلاء و الارهاب في المنطقه.
في شغله كمان كتير مهمه انو الدول اللي بحقلها التصويت بالفيتو همي امريكا وبريطانيا وروسيا والصين والعينتين فرنسا .
ساسة فرنسا والرئيس فرنسوا هولاند اليوم عاملين زي مهرج المسرحيه اللي اذا قالت ايران على شغله او موضوع سياسي بقولولها معك حق واذا السعوديه قالت على شغله بقولولها معك حق انت كمان يعني عاملين حالهم محايدين بين المجانين وبالاخير همي المستفيدين .
تصوروا فرنسا اليوم بتطرح مشروع لحل القضيه بس لما يتحسن الطقس يعني بالصيف على اساس انو القضيه مش مستعجله, وتتفكر اسرائيل بالموضوع مشان ما يردو جواب زي العاده او يتفركش الموضوع.
وزراء خارجية الخليج والسعودين اليوم بقولوا انو الحل بسوريا واليمن سياسي.
تصوروا بعد القتل والدمار والخراب وبدنا شي 100 سنه لاعادة اعمار سوريا واليمن غير الالاف اللي راحوا قتلى وشهداء توصلوا للحل العبقري اللي هو الاتفاق السياسي.
ما قلنا من الاول وكتبنا وصرخنا واحتجينا ونددنا وشجبنا واستنكرنا واستهجنا ورفضنا ولطمنا وبكينا وطالبنا بالحلول السلميه والبحث عن مخارج وانو الحروب ماهي الحل وعبس, واليوم قال شايفين انو ما في حلول الا سياسيه ..
مش طزفيكم واللي خلاكم تكونوا زعماء وقواد لهاي الشعوب...
بس انا برجع وبقول انو الحق مش عليكوا الحق على شعوبنا اللي راضيه تموت موت بطئ وما فضلت اما الموت السريع او اقتلاعكم واجتثاثكم من جذوركم.
اكثر بيت شعر خدر شعوبنا وغيبها هو
اذا الشعب يوما اراد الحياه.....فلا بد ان يستجيب القدر
لهيك شعوبنا بستنى القدر من ورا زعمائنا البقر
القدر يا شعوب الشرق هيا ,يصنعه الانسان مش بنزل مع المطر.
بجوز شعوبنا بستنى سفونية بيتهوفن السابعه اللي اسمها القدر وبسمعوها سمع ومستنين الفرج من السما.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل